ۇيعىر اۋدانى اكىمدىگىنىڭ اپپارات باسشىسى سۇلتان يسلاموۆ مەملەكەتتىك مەكەمەگە تيەسىلى كولىكتى جۇرگىزۋشى كۋالىگىنسىز باسقارىپ كەلگەن، - دەپ حابارلايدى اباي-اقپارات "ۆرەميا" باسىلىمىنا سىلتەمە جاساپ. 

قازىر شۋحرات نۋراحۋنوۆ باسقاراتىن ۇيعىر اۋدانى اكىمىنىڭ اپپارات باسشىسىن سۇلتان يسلاموۆتى جول پوليتسەيلەرى 4 تامىز كۇنى تاڭعى سەگىزدەر شاماسىندا قر اكىمشىلىك كودەكسىنىڭ 612 بابىن بۇزعانى ءۇشىن توقتاتقان.  كولىكتى اپپارات باسشىسىنىڭ ءوزى جۇرگىزىپ وتىرعان.

قىزىعى، سۇلتان يسلاموۆ 2015 جىلدىڭ 6 جەلتوقسانىندا مەملەكەتتىك مەكەمەنىڭ ۆ 178 ۆۆ كولىگىن ماس كۇيىندە جۇرگىزگەنى ءۇشىن جۇرگىزۋشى كۋالىگىنەن 3 جىلعا ايرىلعانى بەلگىلى بولعان.

قازاقستان رەسپۋبليكاسىنىڭ زاڭدارىنا پىسقىرىپ تا قارامايتىن سۇلتان يسلاموۆ اۋدان اكىمى اپپاراتىنىڭ باسشىسى بولىپ جۋىردا تاعايىندالعان كورىنەدى. سوندا اۋدان اكىمى شۋحرات نۋراحۋنوۆ اكىمشىلىك جازاسىنىڭ مەرزىمى اياقتالماعان ادامدى اۋداندىق دەڭگەيدەگى اسا جاۋاپتى لاۋازىمعا قالاي تاعايىنداعان؟

ءبىز مەملەكەتتىك اۆتوكولىكتى كۋالىكسىز، زاڭسىز ايداعان شەنەۋنىك جايلى داۋدىڭ انىق-قانىعىن بىلمەك بولىپ، الماتى وبلىس اكىمىنىڭ ءباسپاسوز حاتشىسى عالىممۇرات جۇكەلگە حابارلاستىق.

عالىممۇرات جۇكەل، الماتى وبلىس اكىمىنىڭ ءباسپاسوز حاتشىسى: 

- بۇل ماسەلە بويىنشا قازىر تەكسەرىس ءجۇرىپ جاتىر. ۇيعىر اۋدانى اكىمىنىڭ اپپارات باسشىسىنىڭ شىندىعىندا مەملەكەتتىك كولىكتى جۇرگىزىپ كەلە جاتتى ما، جوق ءوزىنىڭ جەكە كولىگىمەن بولدى ما، ونى جاۋاپتى ادامدار ماي قىزمەتكەرلەرىنىڭ ۆيدەو-دايەكتەرى ارقىلى انىقتايتىن بولادى. جانە شىنىندا زاڭ بۇزىلسا، مەملەكەتتىك قىزمەتكەر جازاسىز قالمايدى دەپ ويلايمىن. 

قۋانىش قاپپاس

Abai.kz