نۇرعازى نۇركەن - 1997 جىلدىڭ 28 ماۋسىمىندا تۇركىستان وبلىسى تۇلكىباس اۋدانى ءسارىتور اۋىلىندا دۇنيەگە كەلگەن. 2018 جىلعى م. اۋەزوۆ اتىنداعى وقمۋ-دى فيلولوگيا ماماندىعى بويىنشا تامامداعان...

ولەڭدەرىنەن ءومىرى مەن قيالىنىڭ ءيىسى اڭقىپ تۇراتىن بۇ جاس تالانتتىڭ سوڭعى كەزدەرى ىزدەنىپ جۇرگەنى بايقالادى. نەنى ىزدەپ ءجۇر، قالاي ىزدەپ ءجۇر..؟ ءبىر سوزىندە «وزىندىك ستيل قالىپتاسۋى ءۇشىن، ءوزىڭدى ىزدەۋ مەن توم-توم كىتاپتى اقتارۋدىڭ قاجەتى شامالى ەكەن. تەك وزىندىك ىزدەنىس كەرەك ەكەن...» - دەپ ازىلدەپ ەدى. ءازىل بولعانىمەن، ميىندا بۇل ويدىڭ ءازىلسىز نۇسقاسى ورمەكشىدەي تور قۇرىپ العانى سەزىلىپ-اق تۇر. ول ويى شىعارماشىلىعىنا قانشالىقتى پايدالى، ۋاقىت كورسەتەر... وسى ورايدا باقىتجان الدياردىڭ ءسوزى ويىما ورالىپ وتىر: "مەنىڭ ەڭ ۇلى اقىن بالام بار. ول - نۇركەن نۇرعازى..."

  ...ءوزى قاتارلى اقىنداردىڭ كوبى ورىس اقىندارىن اۋدارىپ جۇرگەنىنەن حاباردارمىن. ال مىنا نۇركەن ورىسشا ولەڭ جازۋدى باستاپ كەتىپتى. «گوسپود» - دەگەن ولەڭىندە ءبۇي دەيدى:

نە بۋدۋ سموترەت گلازامي وسترومي،
موي ۆزگلياد – (پروستو) دىم...
ناستال توتچاس، كوتورىي يا جدال،
ي تى پريەحالا:
و، گوسپادي! – قىزىق ءا؟ ومىردە ورىستارمەن تىلدەسكەنىن كورگەم. اڭگىمە اراسىندا ويىن جەتكىزە الماي قالاتىن كەيدە. «ا ۆى زناەتە پو كازاحسكي؟» - دەپ، قينالىپ تۇرعانىن بىلدىرمەي جىبەرەتىن. ال مىنا ولەڭىندە قينالماي ويىن جەتكىزە الىپتى. ازىن-اۋلاق لوگيكالىق، ورفوگرافيالىق كەم-كەتىكتەرى بولماسا، ورىس تىلدىندە ولەڭ جازۋعا ءازىر تۇرعانداي... بۇدان بىلاي ەكى تىلدە دە ولەڭدەر كۇتەتىن بولامىز...

...اقىنداردىڭ كوبىندە قيسىق-قىڭىر مىنەز بولادى عوي. بۇل جىگىتتىڭ قيسىق-قىڭىرلىعى تىم بولەك. قيسىق كۇندەردى وتكەرىپ جۇرگەن جىگىتتى «ماقتاي بەرمەي»، ولەڭدەرىنە دەن قويايىن:

ءازىمحان يسابەك

پاك پەيزاج

 

ءوتىپ جاتىر قيسىق كۇن،

ءوتىپ جاتىر قيعاش ءتۇن.

عاسىرلارعا سيعانمەن، سەكۋندتارعا سيماسپىن.

قيراندى ءۇيدىڭ ىشىنەن تاپپاي جۇرەم ءوزىمدى،

جانىمدى الىپ كەتكەندەي ەڭ العاشقى قيماستىق.

 

قاپتالداعى بولمەدە بىقسىپ جاتىر كورپەلەر،

پەش ۇستىندە بالالىق ارماندارىم ورتەنە...

كوزىم جاسىن سۇرتەم دە، ءوز-وزىمنەن كۇلەمىن،

ەڭ سۇيىكتى ادامنىڭ ەلەسىنە ەركەلەپ.

 

تەرەزەنىڭ سىرتىندا ءبىر ۇياڭ قىز جىميدى،

كىم جۇباتتى سول قىزدى..؟

كىم ورتەدى بۇل ءۇيدى..؟

اپام نەگە ساباققا وياتپادى ءشاي قويىپ..؟

نەگە جاڭبىر جاۋىپ تۇر..؟

مويناق نەگە ۇليدى..؟

 

وسى بولار كوكتەمىم...

وسى بولار جەتكەن ءۇن...

اتكەنشەككە وتىرعىم كەلىپ تۇرعان جوق مەنىڭ!

ءبىر باقىتىم بۇرتيىپ جاتىپ قالدى. تۇرمادى.

سودان بەرى الاڭدا تەڭبىل دوپ تا تەپپەدىم.

 

تاس تا جىلاپ قالىپتى كوزدەرىنەن قان اعىپ،

تاستى قويشى، گۇلدىڭ دە جىلاماۋىن قالادىق...

جىلاماعان كىم قالدى؟

ءۇي دە بالكىم جىلادى...

جالعىز تۇرعان قيراندى ءۇي – قيراپ قالعان بالالىق.

 

1. 06. 17

 

مەن كىممىن؟

نيكا تۋربينادان

 

قارايمىن با الەمگە الدەگىمنىڭ كوزىمەن،

ءوزىم ەمەس وزگە بوپ قاراپ ءجۇرمىن، سەزىنەم...

الدەگىم بوپ ەرنىمە شىق قوندىرام بەيۋاق،

ءوتىپ كەتكەن جاپىراقتاي ۋاقىتتىڭ تەزىنەن...

 

تىم دارمەنسىز، تىم نازىك، تىم قاۋقارسىز ال ەندى

وزگە جاننىڭ قولىمەن قۇشاقتايمىن الەمدى.

ورماندار مەن القاپتار، جاۋىندار مەن تۇندەردىڭ

اراسىندا تۇنشىعىپ مەن ايتاتىن ءان ءولدى.

 

سوندا كىممىن؟

ءوزىمدى نە سەبەپتى ىزدەيمىن؟

تابيعاتتىڭ سۇراعىنان توسىلدى ەكەن بىزدەي كىم؟

ماما

ولشەۋسىز باقىتپەن جولدارىڭ ءتۇيىسسىن،
جانىڭا سەبەدى جۇپارلى ءىسسۋ.
ول ءۇشىن ەسەرسوق ەرەسەك ومىرگە 
بالالىق كوزىڭمەن قاراۋعا ءتيىسسىڭ،
ماما!

نەگە ولار ءناپ-نازىك جۇرەككە مۇڭ ارتتى؟
نەگە ولار جۇيكەنى جانشۋعا قۇمارتتى؟
قاي تاستى جارايىن جالاڭاش قولىممەن؟
كىمدەرگە قويايىن كۇلكىلى سۇراقتى،
ماما؟!

جايقالعان گۇلدىڭ دە ءومىرى – ساندىراق،
بايقالعان كۇننىڭ دە ءومىرى – ساندىراق.
سولاردىڭ بارىنە ماعىنا سيلايتىن
ءبىر كوكتەم كەلەدى ءسان قۇراپ،
ماما!

كوگىلدىر ەكراندا جۇلدىزدار كوپ، تەگى،
انەبىر ءانشىنىڭ داۋىسى جەتپەدى.
كوگىلدىر ەكراندى قايتەسىڭ، تەك ءوزىڭ،
ەڭ جارىق جۇلدىزسىڭ كوكتەگى،
ماما!

جۇرگەندە ەسسىز بوپ جىگىتتىك جەلىكپەن،
جىر وقىپ كەشتەردە، جۇيىتكىپ كولىكپەن،
قانشاما سۇلۋدىڭ ەسىمىن ايتىپپىن،
ماما دە ايتپاعام وزىڭە، نەلىكتەن،
ماما؟!

سەن جايلى مىنا الەم نە دەسە و دەسىن...
ءبارىبىر بۇزبايدى ۋاقىت ۋادەسىن...
ولمەستەن ءالى دە امان-ساۋ ءجۇرۋىم –
سەندەگى تاعدىرمەن ەگەسىم،
ماما..!

ولشەۋسىز باقىتپەن جولدارىڭ ءتۇيىسسىن،
جانىڭا سەبەدى جۇپارلى ءىسسۋ.
ول ءۇشىن ەسەرسوق ەرەسەك ومىرگە 
بالالىق كوزىڭمەن قاراۋعا ءتيىسسىڭ،
ماما!

20.07.2015

* * *

 

بىلەم، جانىم،بىلەمىن!

سەن دە ءبىلشى.

سەنىڭ جانىڭ –جانىما دەم بەرۋشى.

دەم بەرۋشى جۇرەككە – سەندىك جۇرەك.

ال مەن بايعۇس شيپاسىز ەمدەلۋشىڭ

 

بولايىنشى.

بولايىن جاسىڭ سەنىڭ،

دوسىڭ سەنىڭ بولايىن،

سوسىن سەنىڭ

ماحابباتىڭ بولايىن،

جۇرەگىڭدە

جارىق جاعام،

قالمايمىن توسىن ءسونىپ.

 

وتىن الىپ كىرەمىن ءۇي ىشىنە،

وياتامىن كوفەنىڭ يىسىمەن.

جاستىعىڭا توگىلىپ شاشىڭ جاتار،

جو-جوق وعان بولمايدى تيىسۋگە.

 

پەردەلەردى سىرامىن،

تەرەزەنى

ايقارا اشام!

بۇزامىن ەرەجەنى.

ءبىرى وياۋ،

بىرەۋى ۇيقىداعى

جۇبايلارعا جۇپارلى جەل ەسەدى.

 

ساعان...

ساعان:

كەرەمەت جانسىڭ دەيمىن.

كوزدىڭ جاسى شامالى تامسىن مەيلى...

ءتىپتى دارحان داۋلەتى تاسىسا دا،

ءبىزدىڭ عاجاپ ءومىردى حان سۇرمەيدى.

 

ەكەۋمىزگە جالعىز ءسات جەتپەيتىنى.

ەكەۋمىزگە جالعىز ءسوز جەتپەيتىنى،

جانىم! – دەگەن ءسوزىڭدى قيا سالشى،

پەرىشتەگە اينالىپ كەتپەي تۇرىپ.

 

101

 

30-دان 20-نى الساڭ، 10 بولادى.

عالامنان جۇرەكتى الساڭ، 0 بولادى...

جولداردىڭ ءبارىن الساڭ جەر بەتىنەن،

تەك سىزگە باستايتۇعىن جول قالادى.

 

سانداردى ءمىنىپ الىپ تاۋ استىق پا؟

سانداردىڭ قالاسىندا اداستىق پا؟

2 ءسوز ايتۋ ءۇشىن جولىعىسىپ،

1 ءبۇتىن بولۋ ءۇشىن تاراستىق پا؟

 

سانداردىڭ ءبارى نەگە قارعا ءتۇستى..؟

لەسىپ قارعالارمەن ارمان ۇشتى –

ەكەۋمىز عانا اسپاندا قالىقتايىق،

20-دان 17-ءنى الماڭىزشى...

 

15.07.2018.

 

 

جاسىرىنباق

مۇڭنىڭ ءبəرىن كوڭىلدى əنمەن ءسۇزدىم،
كۇيىن كەشىپ قايتەمىز دəرمەنسىزدىڭ...
جاسىرىنباق وينايىق،(!)
جاسىرىنىپ،
ءسىز مەنىڭ جۇرەگىمە
ال مەن ءسىزدىڭ...

 

كوزىڭىزدى جۇمىڭىز،
نۇر كورىڭىز،
جۇما الساڭىز - 
ءومىردى سۇرگەنىڭىز.
جۇزگە دەيىن ساناڭىز،
ساناپ جاتىپ
مەن جايىندا ءتۇس كورىپ ۇلگەرىڭىز.

كوزدەرىمدى جۇمايىن...
جاسىرىنۋ -
ويىن ەمەس بالاعا، اسىل ۇعىم.
پەرزەنتىمىز بالدىرعان ەكەۋمىز دە
جاسىرىنباق جايلاعان عاسىرىنىڭ...

 

...ەھ،
اسپان-اي!
وزىنە بولعان يە!
پەرىشتەلەر جۇلدىزدى قولدان ۇيەر!
جۇزگە كەلىپ كىدىرىپ قالماڭىزشى،
مəڭگى ساناي بەرەيىك، 
Bon, la lumière?

 

تۇنگى اسپانعا قارالىق اۋىق-اۋىق،
قوس جۇرەگى ءتۇننىڭ دە اۋىرادى...
تاۋىپ الىپ جۇرمەسىن 
ەش-كىم ءبىز-ءدى!
تاۋىپ الىپ جۇرمەسىن... 
تاۋىپ الىپ...

 

09.08.2018

 

 

ساعىم

سەنى قۇلاي ءسۇيۋىم ءسۇيۋىم – سوراقىلىق،

ماڭدايىڭا قوندىرىپ بوز الەمدى.

بىلە تۇرىپ قىزىل شوق بولاتىنىن،

جۇرەگىڭە قولىمدى سوزا بەردىم.

 

قاي كوشەدە سەنىمەن بيلەمەدىم،

قاراعاي مەن قايىڭدى... قىزعاندىرىپ.

قالار ما ەدىم قالقىعان كۇيدەن ءولىپ،

پەرنەلەردىڭ ءتارتىبىن بۇزعان كۇنى.

 

...قاي كوشەدە،

قالقاجان،

قاڭعىمادىم...

قاراشانىڭ قايرىلماس سۋىق ءتۇنى.

ەلەسىڭە قارادىم جاڭبىرداعى،

كۇيىك شالعان جانىمدى جۋىپ تۇرىپ.

 

قىزىعىنان بەزىندىم بۇل ماڭايدىڭ،

بۇلقىنا كەپ قانىمنىڭ قىزۋىنداي.

تامىرلارىم ءتانىمدى تىرمالايدى

شىتىناعان اينەكتىڭ سىزىعىنداي.

 

بولاشاققا ەكەۋمىز سەزىلەمىز،

سەزىلەمىز ەكەۋمىز ەكى بولەك.

ەكى بولەك باقىتقا كەزىگەمىز...

ۇڭىلەمىز اينانىڭ بەتىنە كەپ:

 

قىزىل شوقتى كورەمىن سوندا اينادان،

كورەسىڭ سەن قايىڭ مەن قاراعايدى.

جابىرقاۋدان جانىمدا قالمايدى ادام،

ووھ، سودان سوڭ ايناعا قارامايمىن.

 

...وزگە

وزگە

وزەندەر كەشىلەدى...

وزىمىزگە سول كەرەك.

دۇرىس ءبارى!

قاراشانى بيىل دا كەشىرەمىن،

جاپىراقتى مىجعىلاپ ۋىستاعى.   

 

16.03.17.

 

اڭسار

 

ساتتەر ءوتتى...

ساتتەردەن بىزدەر وتتىك.

ءسىز، - دەپ وتتىك،

ەھ، سوسىن ءبىز، - دەپ وتتىك...

(تاڭبا بولىپ قالاتىن) ماحابباتتىڭ

تابىلمايتىن تۇراعىن ىزدەپ وتتىك.

 

كەشە ەدى عوي،

ءبارى دە كەشە ەدى عوي...

كەشەگى كۇن كەشىكپەي كوشەدى عوي.

تەرەزەدەن قارايدى تەلمىرىپ كەپ،

ەسىگىمدى قاعادى نەشەبىر وي.

 

قالاي عانا ۇعايىن ەركەم مۇنى؟ –

ساعىنۋ بار بەلگىسىز ەرتەڭگىنى.

كەشەگىدەي بار ما ەكەن ەرتەڭگىدە –

اي ساۋلەسى،

كوكتەمنىڭ كوركەمدىگى،

جاڭبىر ءيىسى،

جاز تاڭى،

قۇستىڭ ءۇنى،

تۇماۋراتقان ءسابيدىڭ تۇشكىرىگى..؟

...ءبىر كۇندەرى اسپانمەن سىرلاسارمىن،

توقتاماسا جۇرەكتىڭ ىشقىنۋى.

 

كۇتەتىن دە شىعارمىن بۇزاۋ-كوزدى...

بارلىق زاڭدىلىقتاردى بۇزار كەزدى...

تۋ بيىككە قالىقتاي جونەلەرمىن،

شەشىپ كەتىپ جانىما تۇساۋ ءسوزدى...

 

ساتتەر كەلەر...

تاعى دا ساتتەر كەلەر.

ءومىر سۇرمەۋ ءتيىستى اتتەڭمەن ەر.

ماڭدايىنان سۇيەمىن بولاشاقتىڭ،

وتكەنىمدى ەسىمە ساپ بەرمەگەن.

 

2018.06.19.

 

* * *

 

ءتۇن دە قىرسىق.

اياعىن باياۋ باستى.

اي – الباستى...

وڭىنەن بوياۋ قاشتى.

دۇعاسى ءۇشىن ءبىر جۇلدىز اقپاي قالسا،

قىز كۇتپەسىن – تاڭەرتەڭ ويانباسپىن.

 

بۇلدىراعان ءتۇس كورسە، جامان ىرىم...

ەلەسىمنەن ەسىنە تامادى نۇر.

مەن ولگەندە اسپانعا قارامايدى –

ويتكەنى ونىڭ جالعىز-اق جانارىمىن.

 

باسقا قىزبەن تىم جاقىن تانىسپاپ ەم،

عارىشتا ەدى ول كورمەيتىن الىستان ەل.

قيا المايتىن، قيمايتىن كۇندەرىممەن،

ساعاتىمنىڭ تىلدەرى الىستى ارەڭ.

 

التىن مەن دە الماسپاس، كۇمىسپەن دە،

حاتتاردى دوس، ساتتەردى تۋىس كورگەن

ەكەۋمىز دە كىنالى ەمەسپىز-اۋ،

كومەسكى جاۋ – ۋاقىت – قۋىسكەۋدە.

 

سەزىم شىعار ءبارى دە سوزدەن ورگەن،

ەندى سودان مىنا الەم وزگەرە مە؟

ەستەلىكتى ورتەۋ دە قيىن ەمەس،

تىپتەن وڭاي ۇمىتۋ،

وزگەنى ەلەۋ...

 

جالعىز باعىم قالىپتى ۇشىرماعان،

جالعىز باقتىڭ ءوزى دە ءتۇسىم بولار...

وسى قازىر اۋلىنا بارسام با ەكەن،

تۋ سىرتىنان ءبىر كورۋ ءۇشىن عانا...

 

02.07.2017

 

* * *

 

جاڭبىر جاۋسا سايالاۋ جاپىراقتى -

اڭعالدىق تا بولىپتى، اقىماقتىق...

ءبىز ەكەۋمىز جۇرمەيتىن جولعا سول ءبىر

الا مىسىق بۇكتەلىپ جاتىپ اپتى...

 

ولەڭ بولىپ، ءوڭ بولىپ ءوتتى ءبارى،

اق سەزىمگە ۋاقىتتىڭ جوق تۇراعى -

جەردىڭ ەڭ بيىك نۇكتەسىنە شىعىپ الىپ،

نەگە-ە-ە! - دەپ ايعايلاعىم كەپ تۇرادى.

 

قالىپ ەدى ءتاڭىرى اياپ قاشان؟

...ءسوز ويلاسام، تۇنىمەن وي وتتاسام،

ماڭگى ۇيقىعا كەتەردەي قورقۋشى ەدىم،

تاڭعى ساعات سەگىزدە وياتپاساڭ.

 

وياتپادىڭ... ايتسە دە وياۋمىن مەن،

جاياۋمىن مەن بۇگىندە، باياۋمىن مەن.

ەرتەڭىمە اسىقپان، جەتىپ الام،

جۇرەگىمە تۇسىرمەن قاياۋ مۇلدەم.

 

ەندى سەنى توسادى شالعاي مەكەن،

باياعى كۇن قاشانعى باۋرايدى ەكەن؟

مۇڭدى قانشا سۇيسەم دە، اياۋلى ارۋ،

باقىتتى ءومىر ءسۇرۋدى تاڭدايدى ەكەم...

 

1.06.2018.

 

اتتانۋ

تۇندەردىڭ شۋىلى، 
ءتاڭىردىڭ جازباسى، 
سەندەردى (!) 
سەبەپسىز (!) 
جەك كورەم ءوز باسىم. 
بىلعانعان ارى ءۇشىن جالعىز قاپ جىلايتىن 
جەزوكشە قىزداردىڭ ءسۇي-ە-ءمىن (!) 
كوز جاسىن. 
سۇيمەيمىن (!) 
جانداردى سانالى تۇردە دە 
باراتىن مۋزەيگە، 
(مۋزەي مە، تۇرمە مە؟) 
ءيا، سونسوڭ اينەكتىڭ ىشىندە شىڭعىرعان 
شىندىققا ۇڭىلە قارايتىن، 
تۇرلەنە... 
سۇيمەيمىن (!) 
سۇيمەيمىن... 
جوق، الدە سۇيەمىن، 
ءبارىنىڭ ماڭدايىن! 
ءبارىنىڭ يەگىن! 
كۇندەردىڭ قولىنان سۇيەمىن، جانە دە 
ايلاردىڭ بەتىنە جاعىلعان كۇيەنى... 
ايلاردى جالعاعان، 
ويلاردى بۇزعان نە؟ 
ءبىزدى ەمەس، 
ءتاڭىردى بار ەتكەن ءبىز بە الدە؟ – 
اقىلدى ومىرگە كوپ سۇراق قويۋشى ەم... 
ءبارىبىر ەريدى ەكەن عوي مۇز-داۋرەن... 
دانەڭە ەتپەيدى، 
ەرىسىن، ەرىسىن! 
سىزدەردەن – رەستوران! 
بىزدەردەن – جەپ-ءىشۋ! 
ستاكان سۋ اكەپ بەرسە ەكەن داياشى، 
مۇز-داۋرەن ساپ ىشەم، 
و، نەتكەن كەلىسىم! 

**************************

...ورتەنگەن اشۋدان ءوزىمدى اپ قالدىم... 
سەرتى ولگەن ارۋدان سەزىمدى اپ قالدىم... 
وسىناۋ قاپ-قارا ءتۇن ءىشى جۇرەكپەن 
شاعالا شاڭقىلىن ەستۋگە اتتاندىم...

18.08.2018. 

 

ءدارۋMAN

ءوزىڭ دە...
وزگەلەر دە
«ءوزىم!» - دەيدى.
تەك ءسابي مەيىرىمى كوز ىلمەيدى.
ولگەندەر تىرىلمەيدى،
ەسەسىنە
تىرىلەر ءولىم جايلى ازىلدەيدى.

ەسىگىن بالالىقتىڭ اشساڭ شىلاپ:
كۇلەسىڭ ەلدەن ەرەك،
دوستان جىراق.
«بۇل ءومىر – قانىپەزەر!»
«ءومىر – عاجاپ!»
قىسقاسى، ەكەۋى دە بوس ساندىراق...

سۇلۋمەن تانىسارسىڭ تويعا بارىپ، 
ءجۇزىم جەپ... ءشايدان الىپ، ويدان الىپ...
كەلەرسىڭ جارىم تۇندە...
كەلمەيمىسىڭ؟
كەلەسىڭ، ورالاسىڭ، ءاي، قاراعىم...

سوسىن كەپ حات جازاسىڭ، 
مۇڭ شاعاسىڭ،
شيشاعا شىلىمىڭنان كۇل سالاسىڭ.
كۇل ەمەس كۇللى ءومىرىڭ شىعار مۇمكىن، 
ءومىر مەن كۇلسالعىشتىڭ ءبىلشى اراسىن...

اتاعىڭ الىستاعى ەلگە جەتكەن،
وتكەندى باۋىزدايسىڭ كەربەز وتكەن.
ءبىر دوسىڭ سەنەن گورى اقىماقتاۋ،
بىراق تا سەنەن گورى ەلگەزەكتەۋ...

قورىقپا، 
ءبارى وڭالار،
ءبارى وڭالار!
ءتاۋىپ شال تاسبيىعىن سانامالار.
نامازعا جىعىلارسىڭ ءجاينامازدىڭ
ۇستىندە جۇرەگىڭنەن جارا قالار...

قۇداي دا قارامايدى كەي كەزدەرى،
اسپاننىڭ بۇلتتانعاسىن وي-كوزدەرى.
ءبىر ساۋلە كەزىكپەيدى جەر بەتىنەن،
بولماسا قارا اسپاندى اي كەزگەنى.

- «كۇللى ءومىر – ءبىر ساتتىك ءتۇس» - دەگەن راس پا؟
بار ما ەكەن باسقا تۇستە الەم باسقا؟
- تۇسىڭە قارا مىسىق كىرمەۋ ءۇشىن، 
ۇيقتاماۋ كەرەك ەدى اۋەل باستا...

19.07.2018

 

بيىكتىك

تابىلدى دوسىموۆتىڭ رۋحىنا 
«بيىكتىك» ءانىنىڭ ماقامىمەن

تابىلدى اعا، ءبىزدىڭ جاقتا تاۋلار كوپ، 
تاۋسىز بولساق، شاقپاق جەلدەن جاۋرار ما ەك! 
تاۋمەن قورعاپ قويعان ءبىزدى ءتاڭىرى 
تىستاعىلار جۇماق جەردى جاۋلار دەپ.

تۇك ەتپەيدى... بۇل تابيعات كىناسىز... 
تولاعاي بوپ تۋىلعانسىز ءسىرا ءسىز. 
ءبىزدىڭ ءۇيدىڭ اۋلاسىنان تاۋلار مەن 
باتىس جاقتان ءسىز كورىنىپ تۇراسىز...

كوش كەتكەلى قاراتاۋدىڭ باسىنان، 
كوكجيەككە كۇن-ءتۇن دەمەي اسىعام. 
قىرانداردىڭ كوزدەرىنە تىك قاراپ، 
قارعالاردان كوز جاسىمدى جاسىرام.

شۋاق ەمەس، تاراسا ەگەر كۇننەن سور، 
تاۋ جاقتاعى سىرلاسامىن گۇلمەن سول... 
كوكجيەككە اسىقپايمىن كەيدە مەن، 
توبەشىك بوپ قالارىمدى بىلگەن سوڭ.

كىم بىلەدى، تاۋ دەر ءبىزدى باسقالار، 
تاۋ بوپ كەتسەم اق جۇرەگىم تاس بولار. 
تاس بولعانى دۇرىس شىعار جۇرەكتىڭ، 
تاپتاپ ەزىپ وتپەۋ ءۇشىن قاسقالار...

قورعان بولعان قاپ قارا بۇلت اۋعاندا، 
قايتپاس تۇلعا ءمۇسىن بوپ تۇر اۋداندا، 
قاراتاۋدىڭ قۇشاعىندا جەتىلگەن 
رىسقۇلوۆتىڭ رۋحى بيىك تاۋدان دا.

تابىلدى اعا، ءبىزدىڭ جاقتا تاۋلار كوپ، 
تاۋسىز بولساق، شاقپاق جەلدەن جاۋرار ما ەك! 
تاۋمەن قورعاپ قويعان ءبىزدى ءتاڭىرى 
تىستاعىلار جۇماق جەردى جاۋلار دەپ.

تۇك ەتپەيدى... بۇل تابيعات كىناسىز... 
تولاعاي بوپ تۋىلعانسىز ءسىرا ءسىز. 
ءبىزدىڭ ءۇيدىڭ اۋلاسىنان تاۋلار مەن 
باتىس جاقتان ءسىز كورىنىپ تۇراسىز...

Abai.kz