ءبىزدىڭ قازاق ءوزى قوڭىرقالتا كۇن كەشىپ جۇرسە دە سپورتشىلار مەن انشىلەردىڭ جەتىستىكتەرىن كوڭىلىنە مەدەت ەتەدى. قازاقستاندىق ءبىر ءانشى، نە ءبىر سپورتشى حالىقارالىق جارىستاردا جۇلدە السا بوركىن اسپانعا اتىپ، توي جاساۋعا دايىن. ەلىمىزدىڭ اتىن شىعارىپ، تۋىمىزدى جەلبىرەتتى دەپ ۇرانداعاندا ءۇنى التى قىردان اسادى.

الايدا، وسىنداي كىشىگىرىم جەڭىستەردەن ەلدىڭ اتاعى اسپانداپ كەتپەيتىنىن ءتۇسىنۋىمىز كەرەك. قىسقاسى، جەكە سپورتشى، نە ءانشىنىڭ جەتىستىگى ەشقاشان ەلدىڭ جەڭىسى ەمەس. قاراپايىم حالىققا تىپتەن قاتىسى از. سپورتشىنىڭ جەتىستىگىن ەل دامۋىنىڭ كورسەتكىشى رەتىندە كورسەتىپ، حالىقتىڭ كوڭىلىن اۋلاپ وتىرعان بيلىك وكىلدەرىنىڭ ايلا-ءتاسىلىن اڭعاراتىن كەز جەتتى.

سپورت دەگەندە ەسىمىزگە ەڭ الدىمەن بوكسشى گەننادي گولوۆكين تۇسەدى. ورتا سالماقتا WBC, WBA (Super) جانە IBO تۇجىرىمدارى بويىنشا الەم چەمپيونى گەننادي گولوۆكين (38-0-1, 34 كو) ەلىمىز ءۇشىن ەڭ بيىك بەلەستى باعىندىرعان سپورتشى. GGG-گە دەگەن ەلدىڭ ىقىلاسى دا ەرەكشە.

بۇگىن سول داڭقتى بوكسشىنىڭ باسى داۋعا قالدى. داۋدىڭ سەبەبى باسقا ەمەس ءدال وسى ءوزى «اسپانعا كوتەرىپ، الەمگە ايگىلەپ» جۇرگەن كوك تۋىمىز جايلى بولىپ وتىر. كاسىپقوي بوكستا جەكپە-جەك باستالار الدىندا قارسىلاس قوس بوكسشىنىڭ جانە اقش ەلىنىڭ ءانۇرانى ورىندالادى. الايدا، 15 قىركۇيەك مەكسيكالىق  ساۋل الۆارەسپەن (49-1-2, 34 كو) جۇدىرىقتاساتىن ءبىزدىڭ گەنا وسى راسىمنەن باس تارتقىسى كەلگەن.

بۇل جايلى «كانەلونىڭ» پروموۋتەرى وسكار دە لا حويا مالىمدەدى. بوكس مامانىنىڭ ايتۋىنشا گولوۆكيننىڭ كومانداسى جەكپە-جەك الدىندا ەكى ەلدىڭ ءانۇرانى ورىندالۋىن قاجەت ەمەس دەپ ەسەپتەگەن. ءارى ءانۇراننىڭ ورىندالماۋىن تالاپ ەتكەن.

ءبىز بۇل اقپاراتتى ەستىگەندە قارسىلاستىڭ قازاقستاندىقتى اياقتان شالۋ ءۇشىن جاساپ وتىرعان ايلاسى بولار دەپ ەلەۋسىز قالدىرعان ەدىك. الايدا، گولوۆكيننىڭ كومانداسىنىڭ بەرگەن جاۋابىنان شىنىمەن ءبىر شيكىلىكتىڭ بار ەكەنىن بايقادىق.

وتانداسىمىزدىڭ پروموۋتەرى توم لەففلەر اقش اقپارات قۇرالدارىنا سۇحبات بەرىپ ارىپتەسىنىڭ ءسوزىن تەرىسكە شىعارۋعا تىرىسقان ەكەن. ونىڭ سوزىنشە، گولوۆكيننىڭ كومانداسى قازاقستان، مەكسيكا جانە اقش-تىڭ ءانۇراندارى تىكەلەي تەلە ترانسلياتسيالار باستالماي تۇرىپ ورىندالۋىن سۇراعان. بۇل جەكپە-جەكتەردىڭ كىدىرىسسىز وتكىزىلۋىنە مۇمكىندىك بەرەدى ەكەن.

«جەل سوقپاسا ءشوپتىڭ باسى قيمىلدامايدى» دەپ قازاق وسىندايدا ايتقان. دەمەك، گەننادي ميلليونداعان وتانداسىن «كوك تۋدىڭ جەلبىرەپ، ءانۇراننىڭ شىرقالعان» ءساتىن كورۋ مۇمكىندىگىنەن ايىرعالى وتىر. مۇمكىن ولار ءۇشىن ءانۇران ورىندالۋ-ورىندالماۋى قاتتى ماڭىزدى ەمەس شىعار. الايدا، قازاقستاندىق تۇسىنىكتە گەننادي جەكپە-جەگىنىڭ الدىندا شىرقالعان ءانۇران «بۇكىل قازاقستاندى الەمگە تانىتادى». ءارى وسى ءبىر ساتتىك «باقىت» بۇكىل قازاق جانكۇيەرلەرىنە كۇندەلىكتى كۇيبىڭ تىرشىلىگىن ۇمىتتىرادى.

ءىستىڭ انىق ءمان-جايىن بىلمەسەك تە، قوس تاراپتىڭ ايتقان ۋاجىنەن اڭعارعانىمىز وسى. دەمەك، كەز-كەلگەن سپورتشى ءۇشىن ەڭ ماڭىزدى ماقسات ەلدىڭ تۋىن جەلبىرەتۋ ەمەس. مەيلى، ول گەننادي گولوۆكين بولسا دا! سول ءۇشىن ءبىزدىڭ حالىق انشىلەر مەن سپورتشىلاردىڭ جەتىستىگىنە مارقايىپ، ءوز-ءوزىن الداعاندى قويعانى ءجون.

ەستەرىڭىزگە سالا كەتەيىك، گولوۆكين مەن «كانەلو» اراسىنداعى ەكىنشى كەزدەسۋ 15 قىركۇيەكتە لاس-ۆەگاستاعى T-Mobile Arena-دا وتەدى. بۇل استانا ۋاقىتىمەن 16 قىركۇيەك تاڭەرتەڭگە تۋرا كەلەدى.

قۋانىش قاپپاس

Abai.kz