نەگە قىزىلوردا؟ قازاقتىڭ تاريحىنا ەتەنە اق وردا، كوك وردا، التىن وردا اتاۋلارىن كەلمەسكە كەتىرسەك تە، قىزىلوردا اتىنا نەگە جابىستىق تا قالدىق؟

«قىزىل» اتاۋى كەشەگى كۇشپەن كوللەكتيۆتەندىرۋ جاساپ، مالىن تارتىپ الىپ، قازاقتىڭ تەڭ جارتىسىن اشتان قىرعان، ودان قالا بەردى قازاقتىڭ بەتكە ۇستارلارىن اتىپ، اسىپ، قۋدالاۋعا سالعان كەڭەس ۇكىمەتىمەن، قىزىلدار پارتياسىمەن بايلانىستى ەكەنىن بىلە تۇرا نەگە بۇل اتاۋدى وزگەرتۋگە تالپىنبايمىز؟ الدە، باياعىدا كۇيرەگەن كەڭەس ۇكىمەتىنەن قالعان ۇرەي مەن قۇلدىق سانا جىبەرمەي تۇر ما؟

وسى ورايدا قالانى جانە وبلىستى قالاي اتاۋعا بولادى دەگەن وي تۋارى انىق.

تاريحقا ۇڭىلسەك، قىزىلوردانىڭ بايىرعى اتاۋى – قامىسقالا. كەيىن اقمەشىت اتاندى. بۇل ايماقتا ەرتەدە ورداكەنت، سىعاناق قالالارى بولعان. بۇلار دا قالا اتىن يەلەنۋگە لايىق. جالپى، قىزىلوردا وبلىسى - ارال تەڭىزىنىڭ شىعىسىندا، سىرداريا وزەنىنىڭ تومەنگى اعىسىندا جəنە تۇران ويپاتىندا ورنالاسقان. سوندىقتان قازاقستان، سىر بويى التى الاشتىڭ اناسى، تۇركى دۇنيەسىنىڭ ءتۇپ تامىرى ەكەنىن تاعى ءبىر بەكىتە ءتۇسۋ ءۇشىن قىزىلوردانى سىرداريا وبلىسى، تۇران قالاسى دەپ وزگەرتۋدى ۇسىنامىن.

بەيىمبەت مايلين، ساكەن سەيفۋللين، ءسابيت مۇقانوۆ، ءىلياس جانسۇگىروۆ، ءابدىلدا تاجىباەۆ، سابىر ءشارىپوۆ، قالماحان ابدىقادىروۆ، اسقار توقماعانبەتوۆ ءتارىزدى قازاق زيالىلارىنىڭ ءىزى قالعان، الاشتىڭ اناسى اتانعان كيەلى مەكەندى شىنىمەن قۇرمەت تۇتساق، ۇلتتىق سانانى جاڭعىرتقىمىز كەلسە، تاريحي ادىلەتسىزدىكتەردەن ەل تاريحىن اراشالاپ العىمىز كەلسە، وزگەرتۋ كەرەك. بىلەمىز، وعان ءبىرشاما قاراجات كەتەدى. الايدا ۇلتتىق رۋح، نامىس ودان دا بيىك ءارى قىمبات.

ادىلبەك قابا

Abai.kz