بايبوتا قوشىم-نوعاي، اقىن: تىنىش ولگىم كەلەدى
Abai.kz اقپاراتتىق پورتالىنىڭ "پۋرۋست ساۋالناماسى" ايدارىنىڭ بۇگىنگى قوناعى - اقىن بايبوتا قوشىم-نوعاي.
– ءسىزدىڭ ويىڭىزشا، ەڭ قاتەرلى جاعداي دەگەنىمىز نە؟
– اقىرزامان.
– ءسىزدىڭ قاي جەردە ءومىر سۇرگىڭىز كەلدى؟
– الماتىدا.
– ءسىز ءۇشىن ەڭ ءمىنسىز باقىت دەگەن نە؟
– قانداي جاعدايدا دا ادام بولىپ قالۋ.
– ءسىز قانداي قاتەلىكتەردى كەشىرۋگە بولادى دەپ ەسەپتەيسىز؟
– اقىلى تولماعان بالانىڭ جاڭساق باسۋىن كەشىرۋگە بولادى.
– ءسىزدىڭ ەڭ سۇيىكتى ادەبي كەيىپكەرلەرىڭىز؟
– مەنىڭ سۇيىكتى ادەبي كەيىپكەرلەرىم كوپ. بىراق م.اۋەزوۆتىڭ «اباي جولى» رومانىنداعى اباي مەن بازارالى كوز الدىما ەلەستەي بەرەدى.
اقىننىڭ جاس كەزى
– ءسىزدىڭ ەڭ سۇيىكتى تاريحي كەيىپكەرىڭىز؟
– ادەبي شىعارمالارداعى تاريحي كەيىپكەرلەردىڭ ءبارى دە قولدان «قاشاپ» جاسالعان. بىراق م.ماعاۋيننىڭ «الاساپىران» رومانىنداعى وراز-مۇحاممەد جانىما جاقىن سياقتى.
– ءسىزدىڭ شىنايى ومىردەگى ەڭ سۇيىكتى كەيىپكەرىڭىز؟
– قازاق قىزى.
– ءسىزدىڭ ادەبيەتتەگى ەڭ سۇيىكتى ايەل كەيىپكەرىڭىز؟
– جۇماتاي جاقىپباەۆ جىرلارىنداعى ءلايلا.
– ءسىزدىڭ ەڭ سۇيىكتى سۋرەتشىڭىز؟
– قازاقستاندىق سۋرەتشىلەردەن ەۆگەني سيدوركين مەن ساليحيتدين ايتباەۆتى ايتۋعا بولار ەدى.
– ءسىزدىڭ ەڭ سۇيىكتى مۋزىكانتىڭىز؟
– مەن مۋزىكانى سۇيەمىن. دومبىراشى ايگۇل ۇلكەنباەۆا، پيانيست ريچارد كلايدەرمان، ساكسافونشى كەنني دجي.
– ءسىز ەر ادامنىڭ بويىنداعى قانداي قاسيەتىن جوعارى باعالايسىز؟
– بىرسوزدىلىك.
– ءسىز ايەل زاتىنىڭ بويىنداعى قاي قاسيەتتەردى باعالايسىز؟
– ادالدىق پەن يبالىلىق ايەلدەرگە جاراسادى. ازداعان ەركەلىك تە جامان ەمەس.
– ادام بويىنداعى ىزگى قاسيەتتەردىڭ قايسىسى ءسىز ءۇشىن تارتىمدى؟
– قاراپايىمدىلىق.
– ءسىزدىڭ مىنەزىڭىزدىڭ باستى ەرەكشەلىگى قانداي؟
– تۇيىقتىق جانە كومبىستىك.
– ءسىزدىڭ ەڭ سۇيىكتى ەرمەگىڭىز؟
– كىتاپ جيناۋ.
– تانىمال ادامداردىڭ ىشىندە كىم بولعىڭىز كەلەدى؟
– بايبوتا قوشىم-نوعاي بولعىم كەلەدى.
– دوستارىڭىزدىڭ قانداي قاسيەتىن باعالايسىز؟
– جاناشىرلىق. ونسىز دوستىق بولمايدى.
– ءسىزدىڭ ەڭ باستى كەمشىلىگىڭىز؟
– توماعا-تۇيىقتىق.
– ءسىزدىڭ باقىت تۋرالى ارمانىڭىز قانداي؟
– باقىتتى بولۋ ءۇشىن بارلىق مۇقتاجدىقتان ارىلۋ كەرەك.
– ءسىز ءۇشىن ەڭ ۇلكەن باقىتسىزدىق نە بولار ەدى؟
– ەل جادىنان ۇمىتىلۋ، ەلەۋسىز قالۋ.
– ءسىز قانداي بولۋدى ارمانداعان ەدىڭىز؟
– سەگىز قىرلى، ءبىر سىرلى ادام بولۋدى.
– ءسىزدىڭ سۇيىكتى ءتۇسىڭىز؟
– كەمپىرقوساقتا كەزدەسەتىن بارلىق ءتۇستى جاقسى كورەمىن. كوگىلدىر ءتۇستى ەرەكشە جاقسى كورەمىن.
– ءسىز ۇناتاتىن گۇل؟
– قىزعالداق. بۇل گۇلدىڭ اتىن مەن ءبىر قىزىما ەسىم ەتىپ قويعانمىن.
– ءسىزدىڭ سۇيىكتى قۇسىڭىز؟
– بۇلبۇلدىڭ قۇيقىلجىعان كۇيى مەن تاۋىستىڭ سۇلۋلىعى ۇنايدى. وسى ەكى قاسيەت ءبىر قۇستىڭ بويىندا بولسا عوي.
– ءسىزدىڭ سۇيىكتى جازۋشىلارىڭىز؟
– مەنىڭ جاقسى كورەتىن جازۋشىلارىم كوپ. قازاق جازۋشىلارىن اتاسام، بەيىمبەت مايلين، تاكەن الىمقۇلوۆ، اسقار سۇلەيمەنوۆ، تىنىمباي نۇرماعامبەتوۆتەردى قايتا-قايتا وقيمىن.
– ءسىزدىڭ سۇيىكتى اقىندارىڭىز؟
– قايسىبىرىن ايتارسىڭ؟.. ءوزىمىزدىڭ تولەگەن ايبەرگەنوۆ پەن جۇمەكەن ناجىمەدەنوۆ تە الەم اقىندارىنىڭ الدىڭعى قاتارىنان كورىنە الار ەدى.
– ومىردەگى سۇيىكتى ادەبي كەيىپكەرلەرىڭىز؟
– بۇل سۇراقتى كامەلەت جاسىنا جەتپەگەندەرگە قويۋ كەرەك شىعار...
– سۇيىكتى كومپوزيتورىڭىز؟
– كوپتەگەن كومپوزيتورلاردىڭ كلاسسيكالىق شىعارمالارىن تىڭدايمىن. قۇرمانعازى مەن تاتتىمبەتتەن باسقا موتسارت، بەتحوۆەن، چايكوۆسكي تۋىندىلارىن جاقسى كورەمىن.
– شىنايى ومىردەگى ەڭ سۇيىكتى تاريحي ايەل كەيىپكەرىڭىز؟
– ءسابيىن وبەكتەگەن ايەلدەردىڭ ءبارى دە سۇيىكتى.
– سۇيىكتى ەسىمدەرىڭىز؟
– بالالارىمنىڭ اتتارى: سىمبات، قىمبات، قىزعالداق، اقجارقىن، نازىم، ينابات.
– بارىنەن دە بەتەر نە نارسەنى جەك كورەسىز؟
– ساتقىندىقتى.
– ءسىز جەك كورەتىن تاريحي كەيىپكەرلەر؟
– اتتارىن اتاۋدىڭ ءوزى جەككورىنىشتى.
– ءسىز قايران قالاتىن اسكەري وقيعا؟
– اسكەري وقيعالاردىڭ ەشقايسىسىنا دا قايران قالۋعا بولمايدى.
– ءسىز جوعارى باعالايتىن رەفورما؟
– شىركىن-اي، سونداي ءبىر رەفورما بولسا ەكەن دەپ تىلەيمىن.
– قانداي قاسيەتتى بويىڭىزعا دارىتقىڭىز كەلەدى؟
– شيراقتىقتى.
– قالاي ولگىڭىز كەلەدى؟
– تىنىش ولگىم كەلەدى.
– ءدال قازىرگى كوڭىل كۇيىڭىز؟
– بەيجاي.
– ءسىزدىڭ ۇرانىڭىز؟
– «الاش!».
ءسوز سوڭى
"اباي پورتالى" زامانداستارىمىزدى، جاس عالىمدار، جۋرناليستەر مەن قالامگەرلەردى مارسەل پرۋستتىڭ ساۋالناماسىنا جاۋاپ بەرىپ، سايتقا جىبەرۋگە شاقىرادى. ادام مەن ونىڭ كوزقاراسى وزگەرمەي تۇرمايدى. تاعى دا جىلدار وتكەننەن كەيىن ءوز جاۋاپتارىڭىزعا ءوزىڭىز تاڭ قالاتىن كەز تۋى دا ىقتيمال. امان بولساق، سول ساۋالداردى ون، جيىرما جىل وتكەن سوڭ قايتالاپ قوياتىن بولامىز.
دايىنداعان تىلەك ىرىسبەك، باۋىرجان مايتاي
Abai.kz
