جۇما, 29 ناۋرىز 2024
2406 0 پىكىر 27 قاراشا, 2018 ساعات 17:45

كورەيالىق دارىگەرلەر تۇركىستان وبلىسىنداعى جەتى ايلىق سابيگە تەگىن وتا جاسادى

كورەيالىق دارىگەرلەر تۇركىستان وبلىسىندا تۇراتىن جەتى ايلىق سابيگە تەگىن وتا جاساپ بەردى,- دەپ حابارلايدى Abai.kz قازاقپاراتقا سىلتەمە جاساپ. قايىرىمدىلىق شاراسى «سۋن-چحۋن-حيان» كلينيكاسى (وڭتۇستىك كورەيا) مەن تۇركىستان وبلىستىق دەنساۋلىق ساقتاۋ باسقارماسى اراسىندا قول قويىلعان مەموراندۋم اياسىندا جۇزەگە اسقان. 

نۇركەن ەلشىبەك ەسىمدى نارەستە قازىر پۋچحون قالاسىندا ورنالاسقان «سۋن-چحۋن-حيان» كلينيكاسىندا ەم قابىلداۋدا.

تۇركىستان وبلىستىق دەنساۋلىق ساقتاۋ باسقارماسىنىڭ مالىمەتىنشە، ناۋقاس بالا جوعارعى ەرىننىڭ بىتپەۋى، ياعني «قويان جىرىق» دياگنوزىمەن تۋىلعان. ءسابيدىڭ اناسى نۇريلا يساەۆا بالاسىنا كورەيادا 10 مىڭ دوللارلىق وپەراتسيا جاساتۋدى ءتىپتى ارمانداماعانىن دا ايتادى.

«ۇلىمنىڭ جاعدايىن اللانىڭ بەرگەن سىناعى دەپ قابىلدادىق. اۋىر بەت اقاۋىمەن ءومىر سۇرۋگە ۇيرەنۋگە تۋرا كەلدى. ۋاقىت وتە بۇل بالادان گورى مەنىڭ جانىما قاتتى باتتى. سەبەبى، اياعىم اۋىر كەزدە قاتتى تۇماۋراتىپ، ۇزاق ەمدەلۋگە تۋرا كەلدى. كەيىن دارىگەرلەر بالامنىڭ كەسەلىنە وسى اسەر ەتۋى مۇمكىن دەپ بولجادى. ۋاقىت وتە كەلە تىنىس الۋى اۋىرلاپ، ەمگەندە ءسۇتتىڭ كوبى دالاعا اعىپ كەتەتىن بولدى. شاشالىپ قالا بەرەدى. ءىشى كەۋىپ كەتەدى. وتىرعىزىپ ەمىزىپ، تۇنىمەن تۇنشىعىپ قالماسىن دەپ قولدا ۇستايتىنبىز. وپەراتسيانى جاساتۋ ءۇشىن بارلىق جاقتان سۇراستىرىپ، كەزەككە تۇردىق. وتانى التى ايدان كەيىن جاساتۋ كەرەك بولدى. وسى كەزدە بىزگە كورەيا ماماندارىنىڭ قايىرىمدىلىق شاراسى تۋرالى ايتتى. مۇنداي مۇمكىندىكتىڭ بولا بەرمەيتىنىن ءتۇسىنىپ، تۇركىستان وبلىسىنىڭ دارىگەرلەرىمەن وسىندا كەلدىك»،-  دەيدى ءسابيدىڭ اناسى نۇريلا يساەۆا.

جەكەمەنشىك كلينيكا ناۋقاس بالانىڭ مەديتسينالىق تەكسەرۋىن، وپەراتسياسى مەن بارلىق شىعىنداردى ءوز موينىنا العان. مامانداردىڭ سوزىنشە، وتا بەس ساعاتقا سوزىلعان. اۋىر سانالاتىن وپەراتسيانى ەڭ مىقتى پلاستيكالىق حيرۋرگ، پروفەسسور كيم ەنگ پە جاساعان. وپەراتسيا ءساتتى وتكەننەن كەيىن «سۋن-چحۋن-حيان» ۋنيۆەرسيتەتى جانىنداعى پۋچحون گوسپيتالى مەڭگەرۋشىسىنىڭ ورىنباسارى، پروفەسسور مين گەنگ دە كىشكەنتاي ناۋقاستىڭ جاعدايىن سۇراپ كەلىپ، وعان سىيلىق تابىس ەتتى.

ايتا كەتەيىك، ەكىجاقتى كەلىسسوزدەر  ناتيجەسىندە كۇنگەيدىڭ اق حالاتتىلارى اتالعان كلينيكاعا بارىپ، شەتەلدىك دارىگەرلەردەن ءدارىس الدى. سونداي-اق، تاجىريبە الماستى. وسى ۋاقىت ىشىندە 50-گە جۋىق دارىگەر، مەديتسينالىق قىزمەتكەر، اناستەزيولوگتار مەن حيرۋرگتار، سونداي-اق گينەكولوگتار اقىسىز ءبىر ايلىق وقۋ كۋرسىنا بارىپ قايتتى.

تەك وتكەن جىلى تۇركىستان وبلىسىندا 78 بالاعا وسىنداي وتا جاسالدى. اعىمداعى جىلى ونداي ناۋقاستاردىڭ  سانى 108-گە جەتكەن.

Abai.kz

0 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1582
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2282
عيبىرات

قايسار رۋحتى عازيز جان

مۇحتار قۇل-مۇحاممەد 3618