بەيسەنبى, 28 ناۋرىز 2024
انە، كوردىڭ بە؟ 4169 16 پىكىر 19 جەلتوقسان, 2018 ساعات 13:34

سۇلەيمەنوۆ ورتاق اقشانى قولدامايدى

وتكەندە پەتەربوردا ەۋرازيالىق ەكونوميكالىق وداققا مۇشە بەستىك جيىلىپ جيىن وتكىزگەنىن بىلەسىزدەر. سول جيىننىڭ بارىسىندا قىرعىزدىڭ بەسىنشى پرەزيدەنتى سوورونباي جەەنبەكوۆ "روسسيا 24" ارناسىنا سۇحبات بەرگەن. ءسويتىپ، كۇندەردىڭ كۇنى وداق ورتاق اقشا قولدانادى دەگەندى ايتقان.

ورتاق اقشا تۋرالى وي جالعىز جەەنبەكوۆتىڭ ويى ەمەس ەكەنىن وسىعان دەيىن دە جازدىق. وسىعان دەيىن كىمدەردىڭ ۇسىنىس تاستاپ، كىمدەردىڭ قولداعانىنا دەيىن ەگجەي-تەگجەيلى جازدىق. ونى قايتالاپ جاتپايىق. وقىپ شىعامىن دەگەن جۇرت ءۇشىن سىلتەمەسى مىنە: https://abai.kz/post/82499

ورىس پەن قىرعىزدىڭ ويى ءبىر شىقتى. ال قازاقستاننىڭ رەسمي بيلىگىنىڭ رەسمي ۇستانىمى قانداي؟ بۇل دا ءبىر كوكەيدەگى كۇپتى ساۋالدىڭ ءبىرى ەدى.  جاقىندا ول دا بەلگىلى بولدى.

قازاقستان ەاەو اياسىندا ورتاق ەلەكتروندى اقشا ەنگىزۋ تۋرالى باستامانى قولدامايدى.

بۇل تۋرالى قر ۇلتتىق ەكونوميكا ءمينيسترى تيمۋر سۇلەيمەنوۆ سويلەدى. قر پارلامەنتى ءماجىلىسىنىڭ زالىندا مينيستر سۇلەيمەنوۆ  ەاەو اياسىندا ەلەكتروندى اقشانى اينالىمعا ەنگىزۋ تۋرالى قاۋەسەتتى تەرىستەدى.

"بۇنى (ەاەو اياسىندا ورتاق ەلەكتروندى اقشا ەنگىزۋ) قازىر رەسەيدەگى ۇلتتىق تولەم وداعى تالقىلاپ جاتىر. ولاردىڭ بىرقاتار ۇسىنىستارى دا بار ەكەن. الايدا بۇل رەسەي جاعىنىڭ رەسمي ۇسىنىسى ەمەس. تۋرا سول سەكىلدى قازاقستاننىڭ دە كەز كەلگەن قارجى ۇيىمدارى ۇسىنىس ايتا الادى", دەيدى مينيستر.

سۇيلەيمەنوۆتىڭ سوزىنە سەنسەك، قازاقستان ورتاق اقشا تۋرالى باستامانى قولدامايدى.

"جوق. ءبىز قولدامايمىز", دەپ قىسقا قايىردى. ۇلتتىق ۆاليۋتادان باسقا ەشقانداي اقشانىڭ قازاقستان تەرريتورياسىندا بولمايتىنىن كەسىپ ايتتى.

"مەنىڭ جەكە پىكىرىم وسى. مەن ساياساتكەر رەتىندە ايتار بولسام، ۇلتتىق ۆاليۋتامىز - ءانۇران، ەلتاڭبا مەن تۋىمىز سەكىلدى تاۋەلسىزدىگىمىزدىڭ، سيمۆولى. سوندىقتان ونى بارىنشا قورعاۋىمىز، ساقتاۋىمىز كەرەك. جانە وزگە كۆازي اقشالاردى جولاتپاۋىمىز كەرەك", دەپ تۇيىندەيدى مينيستر تيمۋر سۇلەيمەنوۆ.

جالپى سۇلەيمەنوۆ جۇرت ىشىندە سۇيكىمى بار مينيسترلەر ساپىنان ەمەس ەدى. انىعىندا ءوز سۇيكىمىن ءوزى كەتىرگەن. بيىل 40 جاسقا كەلگەن مينيستر وسىعان دەيىن ەۋرازيالىق ەكونوميكالىق كوميسسيادا قىزمەتتە بولدى.

2012 جىلدىڭ 1 اقپانىندا سول جاققا قىزمەتكە تاعايىندالدى. قارجى ساياساتى جانە ەكونوميكا ءمينيسترى، كەڭەس مۇشەسى بولدى. ءسويتىپ ول جاقتا 4 جىل تۇردى.

2016 جىلى بيشىمباەۆتىڭ بوستاندىعى بۇلىڭعىرلانا باستاعان تۇستا قازاقستانعا قايتا شاقىرىلىپ، سول بيشىمباەۆتىڭ كرەسلوسىنا قونجيا قالعان. سودان بەرى 2 جىل ءوتتى، مىنە.

"سۋ جاڭا ءمينيسترىمىز مەملەكەتتىك ءتىلدى بىلمەيتىن بولىپ شىقتى. دالىرەك ايتساق، بۇرىن بىلگەن ەكەن، تەك ۇمىتىپ قالىپتى، ماسقارا" دەدىك سوندا ءبىز.

سول كەزدەگى شاپ-شاعىن ديالوگتى ەسكە تۇسىرەيىكشى:

ءماجىلىستىڭ دالىزىندە ءمينيستردى كۇتىپ تۇرعان باق وكىلدەرى  سۇلەيمەنوۆ مىرزانى "تەرگەۋگە الىپ" ءتىل توڭىرەگىندە سۇراقتار قويعان. ءسويتىپ، جاڭا مينيستر مەن باق وكىلدەرى اراسىنداعى شاعىن ديالوگ بىلاي ءوربيدى:

مينيستر: - مەن ماسكەۋدە 5 جىل ءجۇردىم. انا ءتىلىمدى ۇمىتىپ قالدىم. بىراق، 6 ايدىڭ ىشىندە ۇيرەنىپ الامىن.

جۋرناليستەر: - سوندا 6 ايدان سوڭ، ءسىز قازاق تىلىندە سويلەيتىن بولاسىز عوي؟..

مينيستر: - ءدال سولاي.

ۋادەلى 6 ايدىڭ وتكەنى قاشان. مينيستر ءالى كۇنگە ەكى اۋىز ءسوزدى ەجىكتەپ جۇرگەن. سول ءۇشىن دە جۇرت ىشىندە سۇلەيمەنوۆتىڭ سۇيكىمى جوق ەدى.

جوعارىدا كورگەندەرىڭىزدەي، تاۋەلسىز قازاقستان پارلامەنتىنىڭ دەپۋتاتى ايقىن قوڭىروۆ دەگەن ازامات ماسكەۋگە مويىن سوزىپ، ايتقانىن الاقايلاپ قولداعان ەدى. ءتىپتى، ءبىر ەمەس، بىرنەشە رەت.

قوڭىروۆ قازاقستان تاۋەلسىزدىگىنىڭ بەلگىسىندەي ءتول تەڭگەنى تارك ەتىپ، ماسكەۋ ۇسىنعان اقشانى ارمانداپ جۇرگەندە، جۇرت سۇيمەيتىن سۇلەيمەنوۆ باتىل شىقتى. بارەكەلدى دەمەسكە بولمايدى، ەندى.

ءوزى ايتپاقشى، سۇيلەيمەنوۆ ساياساتتىڭ ادامى رەتىندە بۇگىن ايتقان سوزىنەن ەرتەڭ اينىماي، اقىرىنا دەيىن تاباندىلىق تانىتادى دەپ سەنەدى جۇرت.

نۇرگەلدى ابدىعانيۇلى

Abai.kz

16 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1559
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2250
عيبىرات

قايسار رۋحتى عازيز جان

مۇحتار قۇل-مۇحاممەد 3499