Abai.kz پورتالىنىڭ قۇرىلعانىنا ون جىل تولۋىنا وراي

قازاقتىڭ باس اقىنىنىڭ اتىن تاعىنعان ينتەرنەت پورتالىن بۇرىننان ەستۋىم بار بولعانىمەن، جاقىنىراق تانىسۋىم بەرتىندە عانا – «قازاق ادەبيەتى» گازەتىندە جاريالانعان ءبىر سىن ماقالامنىڭ كولەم كوتەرگىش سايت بەتىنە تولىق كۇيىندە جاريالانعالى بەرى كۇندە تاڭەرتەڭ «ورازامدى» Abai.kz-پەن اشاتىن جامان اۋرۋعا ۇشىرادىم.

ونىڭ سەبەبى پورتال ماتەريالدارىنىڭ تاقىرىپ الۋاندىعىندا ياكي مازمۇن كۇشتىلىگىندە عانا ەمەس. Abai.kz مەن ونىڭ بەتىن اشپاعان ون جىلدا قازاق ويساناسىنىڭ، ۇلتتىق پىكىرلەردىڭ جىلىمىنا، مي قازانىنا اينالىپ ۇلگەرگەن ەكەن. ءتىپتى بۇگىنگى كۇنى ونىڭ الدىنا تۇسەتىن قاعازداعى ياكي ەلەكتروندى قازاقتىلدى اقپارات كوزى جوق دەپ كەسىپ ايتۋعا دا اۋزىم بارادى. جۋىردا پورتال رەداكتسياسى تاراپىنان بەرىلگەن مەرەيتويلىق شاعىن ماقالاداعى بۇل ءباسپاسوز قۇرالىنىڭ قارالۋى، وقىلۋى جانە باستاماشىلىعى جونىندەگى ستاتيستيكالىق مالىمەتتى وسى سوزىمە اقتاۋشى رەتىندە جۇرگىزۋگە بولادى عوي دەپ ويلايمىن. دەمەك، Abai-دى قازاقتىڭ باششاسىنان كەششەسىنە دەمەي-اق قويايىن، دەگەنمەن ۇلتقا جانى اشيتىن جانە ونىڭ كەلەشەگى جونىندە كەلەلى وي-پىكىر ايتا الاتىن ۇلپىكەر قايماعىمىز قالماي وقيتىنى جانە وعان ماتەريال، پىكىر جازاتىنى انىق.

جاقىندا مەن ءۇشىن توسىنداۋ ءبىر وقيعا بولدى: شاتقالدا قوس تىگىپ، ناماجازۋ جازىپ جاتقان وسى جولداردىڭ اۆتورىن اياق استىنان مادەنيەت ءمينيسترى وزىنە شاقىرىپ، سۇحباتتاستى. سويتسەم ارىستانبەك مۇحامەديۇلى مىرزا Abai-دا جاريالانعان مەنىڭ ديماش جايلى كىتابىمنىڭ ۇزىندىلەرىن وقىپ, ءوزى ديماش سىندى جاسىمىزدىڭ تالانتىنىڭ جارقىراي اشىلۋىنا كەسەك ۇلەس قوسىپ ءجۇرۋى سەبەپتى پىكىرىن بىلدىرگىسى كەلگەن ەكەن. مينيستر ءسوز اراسىندا ءار جۇمىس كۇنىن ەكى تىلدەگى ءباسپاسوزدى وقۋدان باستايتىنىن، سونىڭ ىشىندە Abai.kz-تەگى ماتەريالداردى دا ۇنەمى قاداعالاپ وتىراتىنىن ايتىپ قالدى. البەتتە، مۇنىڭ ءوزى جەردەن جەتى قويان تاپقانداي اپتىعىپ ايتار نارسە ەمەس، – ارقانداي باسشى جۇمىس كۇنىن وسىلايشا جانە ءوز تىلىندەگى ءباسپاسوزدى وقۋدان باستاۋى ءتيىس، بىراق قيىنى سول – بىزدە مينيستر بىتكەن ولاي ەتە بەرمەيدى عوي...

وقىرمانىنىڭ قاتارى قالىڭ جانە ءار وقۋشىسى ءجۇز وقۋشىعا تاتيتىن سالماقتى Abai.kz-ءتىڭ قوعامدىق پىكىر قالىپتاستىرۋداعى جانە ءبىر ايىرىم ەرەكشەلىگى – پىكىرلەر ءپليۋراليزمىن ساقتاۋى، كىمنىڭ دە بولسىن ءوز ويىن ىشتە قۇلتا قالدىرماي ايتۋىنا مۇمكىندىك بەرەتىندىگى. وسى ورايدا پورتالداعى كوممەنتاريلىك پىكىرلەردى ءوز باسىم الەۋمەتتانۋشىلىق SWOD-اناليزگە تەڭەر ەدىم. ءوز ماعىناسىنداعى بۇرىنعى سوتسيولوگيالىق زەرتتەمەلەردىڭ ورنىن قازىردە بىرتە-بىرتە وسى كوممەنتتەر باسىپ كەلە جاتىر. پورتالداعى كوممەنتتەر – قازاق قوعامىنىڭ ايناسى، ونداعى ستراتيفيكاتسيالىق جىكتەردىڭ الۋان ءتۇرلى جانە كوبىنەسە قاراما-قايشى پىكىرلەرى تانىلاتىن جەر. ارينە، ولارعا كەيدە پىكىر ايتۋ مادەنيەتى جەتپەي جاتادى، دەسە دە بىزگە ەڭ باستى كەرەگى – پىكىر، وي، سولار ارقىلى بىلىنەتىن قوعامداعى كوڭىل-كۇي. ايتا كەتەيىك، وسى باعالى اقپارات گۋگل «بۇلتتارى» ارقىلى اقش كونگرەسىنىڭ كىتاپحاناسىنا بارىپ ءتۇسىپ، سول جەردە ساراپتامادان وتكىزىلىپ وتىرادى.

جاس قۇتتى بولسىن، Abai.kz-تەگى جىگىتتەر مەن قىزدار! ايقىن ماقسات، ناقتى ىستەرىڭنەن جاڭىلماي، اقپارات تايقازانىن تاسىتا بەرىڭدەر. ەل يگىلىگى ءۇشىن بۇگىن جاساپ جاتقاندارىڭدى ەرتەڭ تاريح تولىق باعالايدى.

ماقسات ءتاج-مۇرات، جازۋشى-ەسسەيست

Abai.kz