نيۋ-يوركتەگى «مەديسون سكۆەر گاردەن» ارەناسىندا قازاقستاندىق بوكسشى گەننادي گولوۆكين (39-1-1, 35 كو) مەن ۋكراينالىق سەرگەي دەرەۆيانچەنكو (13-1-0, 10 كو) جۇدىرىقتاستى.

بوكس جانكۇيەرلەرى اسىعا كۇتكەن بۇل جەكپە-جەكتە وتا سالماق ساناتىنداعى IBF جانە IBO تيتۋلدارى باسكە تىگىلگەن.

كەزدەسۋ كۇتپەگەن كورىنىسپەن باستالدى. ۋكراينالىق بوكسشى ءبىرىنشى راۋندتا نوكداۋنعا ءتۇسىپ قالدى. بىراق بۇل جوعارى قارقىن جەكپە-جەك سوڭىنا دەيىن جالعاسقان جوق. ءۇشىنشى راۋندتان باستان بىرسىدىرعى كەزدەسۋ باستالدى. ۋكراين بوكسشىسى قاباعى جارىلىپ كەتكەنىنە قاراماستان 12 راۋند بويى بوكستاسىپ شىقتى.

قوس بوكسشى 12 راۋند جۇدىرىقتاسىپ بولعان سوڭ، تورەشىلەر قازاقستاندىقتىڭ قولىن كوتەردى. وسىلايشا، وتانداسىمىز بۇرىن وزىنە تيەسىلى بولعان IBF جانە IBO تۇجىرىمدارىنىڭ چەمپيوندىق بەلدىگىن قايتارىپ الدى.

نەگىزى دەرەۆيانچەنكو مەن گولوۆكين 2018 جىلى كەزدەسۋى كەرەك بولاتىن. 2017 جىلدىڭ تامىز ايىندا سەرگەي باگام ارالدارىنىڭ بوكسشىسى تۋرەانو دجونسوندى جەڭىپ، IBF بەلبەۋىنىڭ يەگەرى گەننادي گولوۆكيننىڭ مىندەتتى قارسىلاسى اتانعان. الايدا GGG سەرگەيمەن ەمەس، ساۋل الۆارەسپەن جۇدىرىقتاسۋدى ءجون كورىپ، IBF تيتۋلىنان باس تارتقان.

2018 جىلدىڭ قازان ايىندا سەرگەي امەريكالىق دەنيەل دجەيكوبسپەن ورتا سالماقتاعى ىۆع چەمپيوندىق بەلبەۋىن ساراپقا سالىپ، ناتيجەسىندە تورەشىلەردىڭ شەشىمىمەن جەڭىلىپ قالدى. ال ىۆع بەلدىگى كەيىن دجەيكوبستى جەڭگەن ساۋل الۆارەستىڭ قولىنا ءوتتى. بيىل ساۋىردە سەرگەي نەمىس بوكسشىسى دجەك كۋلكايدى جەڭىپ، تاعى دا IBF تيتۋلىنا مىندەتتى ۇمىتكەر اتاندى. بىراق مەكسيكالىق بوكسشى دا دەرەۆيانچەنكومەن جەكپە-جەك وتكىزگەن جوق. ءسويتىپ، ىۆع بەلدىگى تاعى بوس قالعان. مىنە ەندى اتالعان بەلدىك قايتادان گولوۆكيننىڭ بەلىنە ورالىپ وتىر. ىۆع بەلبەۋىنىڭ قىسقاشا "شەشىرەسى" وسىنداي.

ءبارىمىز بىلەتىندەي، گەننادي گولوۆكين ورتا سالماقتا WBC, WBA (Super), IBF جانە IBO تۇجىرىمدارى بويىنشا الەم چەمپيونى بولاتىن. الايدا وتكەن جىلى 16 قىركۇيەك لاس-ۆەگاستا مەكسيكالىق ساۋل الۆارەستەن جەڭىلىپ، WBC, WBA (Super) جانە IBO تۇجىرىمدارى بويىنشا چەمپيوندىق بەلدىكتەرىنەن ايىرىلىپ قالدى (ودان ءسال بۇرىن IBF بەلدىگىن قايتارىپ بەرگەنىن جوعارىدا جازدىق). 2018 جىلى بار بەلدىگىنەن ايىرىلعان وتانداسىمىز اراعا ءبىر جىل سالىپ الەم چەمپيونى اتاعىن قايتارىپ الدى. ول ەندى IBF جانە IBO تۇجىرىمدارى بويىنشا الەم چەمپيونى.

وقي وتىرىڭىزدار: گولوۆكيننىڭ گونورارى نەگە از؟

ايتا كەتەيىك، بۇل كەشتە تاعى ءبىر قازاقستاندىق بوكسشى ءالي احمەدوۆ امەريكالىق بوكسشى ەندريۋ حەرناندەسپەن (20-7-2, 9كو) جۇدىرىقتاستى. 10 راۋندقا جوسپارلانعان جەكپە-جەك بار بولعانى 30 سەكۋندتا قازاقستاندىقتىڭ جەڭىسىمەن اياقتالدى.

قۋانىش قاپپاس

Abai.kz