26 قاراشا كۇنى الماتى جۇرتى اقىن، ديسسيدەنت، «شاڭىراق» وقيعاسى كەزىندە تۇتقىندالىپ، 15 جىل تەمىر توردا وتىرىپ، دەنساۋلىعى كۇرت ناشارلاعان سوڭ، اباقتىدان بوساتىلعان ارون اتابەكپەن قوشتاستى. جۇزدەگەن ادام ارون اتابەكتى اقتىق ساپارعا شىعارىپ سالدى.

ارون ەگىدەەۆ (اتابەك) تۇرمەدەن شىققان سوڭ بىرنەشە اپتادان سوڭ الماتى قالاسىنداعى اۋرۋحانادا قايتىس بولدى. ول وزىنە تاعىلعان ايىپتى مويىنداعان جوق. كەرىسىنشە، ءوزىن تولىقتاي اقتاپ شىعۋدى تالاپ ەتكەن.

قازاقستاندىق ءھام حالىقارالىق قۇقىق قورعاۋشىلار ارون اتابەكتىڭ 18 جىل تۇرمەگە كەسىلىپ، ونىڭ 15 جىلىن تار قاپاس، تەمىر توردا وتەۋىنىڭ ساياسي سەبەپتەرى بارىن ايتادى. جاقتاستارى ونى «بيلىكتى وتكىر سىناعانى ءۇشىن» تۇرمەگە قامادى دەپ سانايدى. بيلىك بۇل پىكىرمەن كەلىسپەيدى. ساياسي قۋدالاۋ بارىن جوققا شىعارادى.

ال قر قىلمىستىق اتقارۋ جۇيەسى كوميتەتى توراعاسىنىڭ ورىنباسارى مەيرام ايۋباەۆ ارون اتابەكتىڭ قازاسىنا قاتىستى پىكىر ءبىلدىرىپتى. «ديسسيدەنتتىڭ اۋىر قازاسىنا بيلىكتىڭ كىناسى جوق»، دەپ سويلەپتى. «ازاتتىق» راديوسى سولاي دەپ جازادى.

«ارون ەدىگەەۆ 2019 جىلدان باستاپ بارلىق مەديتسينالىق تەكسەرۋدەن باس تارتتى. كەيىنگى كەزدە ارىقتاي باستاعانى بايقالدى. جىل باسىنان بەرى ۇلتتىق پرەۆەنتەنتيۆتى مەحانيزم، قوعامدىق باقىلاۋ كوميسسياسى وكىلدەرىن، سىرتتان دارىگەرلەر شاقىردىق. ولار دا دارىگەرگە قارالۋدىڭ ماڭىزدى ەكەنىن ءتۇسىندىردى. تۋىستارىنا دا ايتتىق. دارىگەرگە قارالۋ، قارالماۋ كەز-كەلگەن ادامنىڭ كونستيتۋتسيالىق قۇقىعى. دارىگەرگە قارالۋعا زورعا كەلىستى. 22 قىركۇيەكتە پاۆلودار قالاسىنىڭ N1 اۋرۋحاناسىنا جاتقىزىلىپ، دياگنوزدارى انىقتالدى (دياگنوزدارى مەديتسينالىق قۇپيا سانالادى - م.ا). 1 قازاندا پاۆلودار قالاسىنىڭ سوت شەشىمىمەن جازا مەرزىمى قىسقارتىلىپ، بوساتىلدى. سول كۇنى اپكەسى كەلدى. مەديتسينا قىزمەتكەرىمەن بىرگە الماتىداعى ۇيىنە دەيىن جەتكىزىلدى»، – دەپتى مەيرام ايۋباەۆ.

ال «ازاتتىقتىڭ»: «قاجك ءوزىن ارون اتابەكتىڭ ولىمىنە جاۋاپتى ساناي ما؟»، - دەگەن سۇراعىنا: «جاۋاپتى سانامايدى»، - دەپ قىسقا قايىرىپتى.

68 جاستاعى ديسسيدەنت، اقىن ارون اتابەك 24 قاراشادا الماتى قالاسىنداعى اۋرۋحانادا كوز جۇمعان. ديسسيدەنت «شاڭىراق وقيعاسى» بويىنشا سوتتالىپ، 15 جىل تۇرمەدە وتىرعان.

20 قازان كۇنى اقىننىڭ قارىنداسى ءرازيا نۋتىشەۆا ارون اتابەكتىڭ جاعدايى ناشارلاعانىن ايتتى. كەيىن جەدەل-جاردەم شاقىرتىپ، ديسسيدەنتتى جەكە كلينيكاعا جاتقىزعان. ارون اتابەكتىڭ سول ۋاقىتتا جاساندى تىنىس اپپاراتىمەن دەم الىپ جاتقانى ايتىلدى. كەيىن ونىڭ جان ساقتاۋ بولىمىنە تۇسكەنى تۋرالى حابارلاندى. ونان كەيىن كوماعا تۇسكەنى ايتىلدى.

بۇعان دەيىن حالىقارالىق قۇقىق قورعاۋ ۇيىمدارى مەن جەرگىلىكتى بەلسەندىلەر ونىڭ ولىمىنە بيلىكتى كىنالاپ، تۇسىنىكتەمە بەرۋدى تالاپ ەتتى. حالىقارالىق دارەجەدە تەرگەۋ جۇرگىزۋ قاجەتتىگىن دە العا تارتتى.

وسىعان دەيىن Abai.kz اقپاراتتىق پورتالىندا تۇرمەدە وتىرعان ارون اتابەككە اراشا سۇراعان قازاقستان جانە شەت ەل قالامگەرلەرىنىڭ حاتتارى مەن ارون اتابەكتىڭ بىرنەشە مالىمدەمەلەرى جاريالانعان.

«ارون اتابەككە اراشا سۇرايمىز!» اتتى اشىق حات قر پرەزيدەنتى قاسىم-جومارت توقاەۆتىڭ اتىنا جولدانعان. ءۇشبى حات اۆتورلارى: ۇلىقبەك ەسداۋلەت، ولجاس سۇلەيمەنوۆ، مۇرات اۋەزوۆ باستاعان ءبىر توپ زيالى قاۋىم وكىلدەرى.

وندا:

«جان ازابى ءوز الدىنا، تۇرمەدەگى قيناۋ مەن ازاپتاۋدىڭ الۋان ءتۇرىن باسىنان كەشىرگەن ارون اتابەكتىڭ دەنساۋلىعى بىرنەشە جىلدان بەرى كۇرت ناشارلاپ كەتتى. جاسى 70-كە تاياعان قارتتىڭ ەكى قول مۇلدەم كوتەرىلمەيدى، جۇرەكتىڭ يشەميالىق اۋرۋى قان قىسىمى، بۇيرەك-وكپە، بۋىن اۋرۋلارىنا ت.ب. ومىرىنە قاۋىپ توندىرەتىن، تۇرمە جاعدايىندا ەمدەلۋگە كەلمەيتىن كەسەلدەرگە دۋشار بولدى.

 «ەلىم-قازاعىم!»، - دەپ جانىن شۇبەرەككە تۇيگەن باتىرىمىزدان تاس زىنداندا ايىرىلىپ قالساق، ارىمىزعا سىن بولارى حاق! ۇرپاق الدىندا ۇياتتى بولمايىق، پرەزيدەنت مىرزا!»، - دەپ جازىلعان ەدى.

ونان سوڭ رەسەيلىك قۇقىق قورعاۋشى ۇيىمدار - پەن-موسكۆا مەن «سۆوبودنوە سلوۆو» اسسوتسياتسياسى قازاق قالامگەرلەرىنىڭ تۇرمەدەگى ديسسيدەنت اقىن ارون اتابەككە اراشا سۇراعان ۇندەۋىن قولداپ، ونى قاماۋدان بوساتۋدى سۇراپ، قازاقستان پرەزيدەنتى قاسىم-جومارت توقاەۆقا قايرىلۋ جاسادى.

ال 18 تامىز كۇنى ازاپتاۋلاردىڭ الدىن الۋ جونىندەگى توپ وكىلدەرى پاۆلودار وبلىسىنداعى اپ-162/1 تۇزەتۋ مەكەمەسىندە جازاسىن وتەپ جاتقان ساياسي تۇتقىن ارون اتابەككە بارىپ قايتىپتى. بۇل تۋرالى ادام قۇقىقتارىن قورعاۋ بيۋروسى حابارلادى.

1 قازاندا پاۆلودار قالالىق №2 سوتى شاڭىراق وقيعاسى بويىنشا سوتتالعان ارون اتابەكتىڭ جازاسىن دەنساۋلىعىنا بايلانىستى جەڭىلدەتۋ جونىندە ءوتىنىشتى قاناعاتتاندىرعانى، ونىڭ بوستاندىققا شىعاتىنى حابارلاندى.

21 قازاندا ارون اتابەكتىڭ دەنساۋلىعى كۇرت ناشارلاپ، كوماعا تۇسكەنى بەلگىلى بولدى. ال 11 قاراشا كۇنى ارون اتابەكتىڭ قارىنداسى ديسسيدەنتتىڭ ءالى رەانيماتسيادا، كومادا جاتقانىن حابارلاعان.

24 قاراشا كۇنى ارون اتابەكتىڭ الماتى قالاسىنداعى اۋرۋحانادا قايتىس بولعانى جاريا بولدى.

Abai.kz