رەسەي ەلشىسى قازاقستاننان تابانىن جالتىراتسىن!
قر پرەزيدەنتى اكىمشىلىگىنىڭ باسشىسى
م.ءا. نۇرتىلەۋ مىرزانىڭ،
قر سىرتقى ىستەر ءمينيستىرى
م.ب. تىلەۋبەردى مىرزانىڭ نازارىنا!
رەسەيلىك «نەزاۆيسيمايا گازەتاعا» بەرگەن سۇحباتىندا رەسەيدىڭ قازاقستانداعى توتەنشە جانە وكىلەتتى ەلشىسى الەكسەي بوروداۆكين «ورىس ءتىلىن بىلمەيتىن قازاقستاندىقتاردىڭ دەنى – باسقا مەملەكەتتەردەن قونىس اۋدارعاندار، ياعني قانداستار. بۇل ولاردىڭ زاماناۋي قازاقستاندىق قوعامعا تەز سىڭىسۋىنە كەدەرگى كەلتىرەدى، بۇل ەل بيلىگى ءۇشىن ايتارلىقتاي پروبلەمالار تۋعىزادى» دەگەن بولاتىن.
مىنە، سودان بەرى ءۇش ايعا تاياۋ ۋاقىت ءوتتى، الەكسەي بوروداۆكيننىڭ بۇل سوزىنە قازاقستان بيلىگى تاراپىنان ءبىر تۇلعا شىعىپ، جاۋاپ بەرگەن جوق. قانشاما رەت ماقالارىمدا، «اشىق حاتتارىمدا» وسى ماسەلە تۋرالى قايتا-قايتا ايتىپ كەلەمىن، سول باياعى ۇنسىزدىك. انشەيىندە قيت ەكەن ءبىر بولىمىز «وقيعاعا» ءبورىنىڭ كوتىندەي شۋلايتىن باق وكىلدەرى دە جۇمعان اۋزىن اشپادى.
قازاق قوعامى مەن بيلىگىنىڭ بۇل ارەكەتسىزدىگى ولاردىڭ شەتتەن ورالعان قانداستارىمىزعا دەگەن كوزقاراسى پەن پەيىلىنىڭ «و»-گە تۇسكەنىن كورسەتەدى.
قانداستار دەگەنىمىز – ءوزىمىزدىڭ قازاقتار. وسى رەسەي مەن قىتاي يمپەريالارىنىڭ وكتەمدىگىنىڭ كەسىرىنەن قازاق جەرى تالان-تارجىعى ءتۇسىپ، شەكارا سىرتىندا قالعان ءوزىمىزدىڭ تۋىستارىمىز. ءۇش عاسىر بويى قازاقتى بوداندىقتا ۇستاپ كەلگەنى از بولعانداي، رەسەي ەلشىسى تاعى بىزگە ايبار شەگىپ، ىشكى ىسىمىزگە كوزىمىزدى باقىرايتىپ قويىپ، ارالاسىپ وتىر. بوروداۆكيننىڭ بۇل ءسوزى، تۇپتەپ كەلگەندە، قازاقتى قورلاۋ، قازاقستاندى باسىنۋ!
ال، ءوزىڭنىڭ تۋعان حالقىڭدى قورلاتىپ، مەملەكەتىڭدى باسىنتىپ قويىپ قاراپ وتىرۋ – ەزدىك!
بۇعان دەيىن رەسەي شەندىلەرى موسكۆادا تۇرىپ ابار شەكسە، ەندى ەلورداسىزدىڭ تورىندە وتىرىپ الىپ قۇقاي كورسەتۋدى باستادى.
الباستى قاباققا قاراي باسىنادى دەگەن وسى عوي.
مەنىڭ قاسىم-جومارت توقاەۆتىڭ پرەزيدەنتتىك وكىلەتتىگى اياتاعاننان سوڭ شەتتەن كەلەتىن قازاق كوشى توقتايدى، سول ءۇشىن وسى جولعى ساياسي رەفورما اياسىندا قازاقستان كونستيتۋتسياسىنا «قازاقستان رەسپۋبليكاسىنىڭ شەگىنەن تىس جەرلەردە تۇراتىن قازاقتار باسقا مەملەكەتتىڭ ازاماتى بولعاندىعىنا قاراماستان جەڭىلدەتىلگەن تارتىپپەن قازاقستان رەسپۋبليكاسىنىڭ ازاماتتىعىن الۋعا قۇقىلى» دەگەن نورما ەنگىزىپ، شەكارا سىرتىندا قالىپ بارا جاتقان التى-جەتى ميلليون قانداسىمىزعا كونستيتۋتسيالىق قۇقىق بەرۋ كەرەكتىگىن شىرىلداپ كوتەرىپ جۇرگەنىمنىڭ باسى سەبەبى دە وسى – بوروداۆكيندەردىڭ ارام پيعىلى مەن تىلەۋبەردىلەردىڭ شەكتەن اسقان جالتاقتىعىن كورگەننەن كەيىن تۋعان قاۋىپ.
نە، سوندا بوروداۆكين ايتتى ەكەن دەپ، قازاق كوشىن توقتاتۋىمىز كەرەك پە؟!
مەنىڭ جوعارىداعى كونستيتۋتسيالىق رەفورماعا قاتىستى ۇسىنىسىما بولعان ۇنسىزدىك وسى رەسەي ەلشىسىنىڭ ىقپالى ما؟!
الەكسەي بوروداۆكيننىڭ ءسوزى ىشىمە سىيماعان سوڭ، «ا. مۇقاباي» دەگەن اتپەن قازاقستان رەسپۋبليكاسىنىڭ سىرتقى ىستەر مينيسترلىگىنە حات جازىپ، ونىڭ بۇل ارەكەتىن تەكتەۋدى سۇراعان بولاتىنمىن.
اتالعان وتىنىشكە قر ءسىم ءباسپاسوز قىزمەتى «اتالعان ماسەلەگە قاتىستى،سىرتقى ساياسيۆەدومستۆو ەلشىمەن جۇمىسبارىسىندا مۇنداي مالىمدەمەلەرگەجول بەرىلمەۋ قاجەتتىلىگى تۋرالى ۇستانىمىن جەتكىزەدى.» دەگەن جاۋاپ بەرىپتى.
كەسىپ ايتايىن، مەن بۇل جاۋاپقا مۇلدە قاناعاتتانبايمىن!
رەسەيدىڭ قازاقستانداعى توتەنشە جانە وكىلەتتى ەلشىسى الەكسەي بوروداۆكيننىڭ بۇل ءسوزى ءسىم ءباسپاسوز قىزمەتى دەڭگەيىندە شەشىلەتىن ماسەلە ەمەس!
بۇل ماسەلە ەكى مەملەكەتتىڭ، ەڭ كەمىندە، سىرتقى ىستەر مينيسترلىكتەرىنىڭ دەڭگەيىندە كوتەرىلىپ، ساياسي باعاسى بەرىلۋى كەرەك دەپ ەسەپتەيمىن!
سول ءۇشىن، قازاقستان رەسپۋبليكاسىنىڭ سىرتقى ىستەر ءمينيسترى مۇحتار تىلەۋبەردى مىرزانىڭ اتالعان ماسەلەنى ءوز نازارىنا الىپ، رەسەي فەدەراتسياسىنا نوتا جىبەرۋىن، رەسەيدىڭ قازاقستانداعى توتەنشە جانە وكىلەتتى ەلشىسى الەكسەي بوروداۆكيننەن قازاقستان حالقىنان كەشىرىم سۇراتۋىن جانە ونى قازاقستانداعى ەلشىلىك قىزمەتتەن قۋىن قاتاڭ تالاپ ەتەمىن!
اۋىت مۇقيبەك،
«قۇرمەت» وردەنىنىڭ يەگەرى
Abai.kz
