كەشە قازاقستان پرەمەر-ءمينيسترى ءاليحان سمايىلوۆ ەكاتەرينبۋرگ قالاسىندا وتكەن «يننوپروم» 12-ءشى حالىقارالىق ونەركاسىپ كورمەسىنە ارنالعان پلەنارلىق وتىرىسقا قاتىسىپ، رەسەيدىڭ ۇكىمەت باسشىسى ميحايل ميشۋستينممەن كەزدەستى.

جيىندا رەسەي مەن قازاقستانننىڭ بولاشاعى زور ينفراقۇرىلىمدىق جانە كولىكتىك جوبالاردى ىسكە قوسۋدى جوسپارلاپ وتىرعانى تۋرالى ايتىلدى. ءميشۋستيننىڭ ايتۋى بويىنشا، ەكى ەلدىڭ ونەركاسىپ سالاسىنداعى بايلانىسىن تەرەڭدەتۋ جانە جاڭا بىرلەسكەن جوبالاردى ىسكە اسىرۋ ماسكەۋ مەن نۇر-سۇلتان اراسىنداعى ساۋدا-ەكونوميكالىق ىنتىماقتاستىقتى ودان ءارى دامىتۋعا جاقسى سەرپىن بەرەدى.

"رەسەي نارىعىنان كەتكەن دوس ەمەس مەملەكەتتەردىڭ كومپانيالارىن الماستىرۋعا قازاقستاندىق ارىپتەستەردىڭ جاقسى مۇمكىندىگى بار دەپ سانايمىز، ويتكەنى تاۋار اينالىمىنىڭ باعىتىن وزگەرتۋ ۋاقىتشا دۇنيە ەمەس. بۇل ءبىزدىڭ ەكونوميكامىزدىڭ تۇراقتىلىعىن نىعايتاتىن جانە دامۋدىڭ جاڭا مۇمكىندىكتەرىن اشاتىن ۇزاق مەرزىمدى پروتسەسس", – دەدى ميشۋستين.

ول سونىمەن قاتار بىلتىر رەسەي مەن قازاقستاننىڭ تاۋار اينالىمى $25 ملرد-تان اسىپ رەكوردتىق دەڭگەيگە جەتكەنىن اتاپ ءوتتى. بيىلعى جىلدىڭ العاشقى ءتورت ايىندا بۇل كورسەتكىش تاعى دا 10,5% - عا وسكەن. ميشۋستين قازاقستاندىق ارىپتەستەرىمەن بىرگە «رەسەيمەن دوستىق ءجىبىن ۇزگەن ەلدەردىڭ زاڭسىز ەكونوميكالىق سانكتسيالارىنان» قورعانۋ ءۇشىن پارمەندى شارالار قابىلدايتىنىن ايتتى.

ءوز كەزەگىندە سمايىلوۆ قازاقستان ۇكىمەتى رەسەي-قازاقستان ستراتەگيالىق ارىپتەستىگىن نىعايتۋعا مۇددەلى ەكەنىن ايتتى.
رەسەي ۇكىمەتىنىڭ باسشىسى ەكى ەلدىڭ مادەني-گۋمانيتارلىق سالاداعى ىنتىماقتاستىعى ماڭىزدى ەكەنىن دە اتاپ ءوتتى.

«رەسمي مارتەبەسى بار ورىس تىلىنە قازاقستاندا قامقورلىقپەن قارايتىنىن اتاپ وتكىم كەلەدى. بۇل ءبىزدىڭ ازاماتتارىمىزدىڭ ەركىن قارىم-قاتىناس جاساۋىنا، ىسكەرلىك قارىم-قاتىناس ورناتۋىنا جانە مادەني بايلانىس ورناتۋىنا مۇمكىندىك بەرەدى»،-دەدى ميشۋستين.

ول رەسەيدىڭ جوو-نىڭ قازاقستاندا اشىلۋعا دايىندىق جاساپ جاتقانىن ەسكە سالدى.

رەسەلىك ساياساتتانۋشى دميتري سولوننيكوۆ بۇل جيىن تۋرالى "ەكى ەلدىڭ ۇكىمەت باسشىلارىنىڭ كەزدەسۋى ولاردىڭ بولاشاققا بىرگە بارا جاتقانىن" كورسەتەتىنىن ايتىپتى.

«قاسىم-جومارت توقاەۆتىڭ پەتەربۋرگتە وتكەن حالىقارالىق ەكونوميكالىق فورۋمعا كەلۋى قازاقستان كوشباسشىسىنىڭ سالماقتى ءارى جاۋاپتى ساياسي تاڭداۋىن كورسەتەدى. ول فورۋمعا قاتىستى. بۇل الەمدىك ەليتاعا بەرىلگەن بەلگى. «يننوپروم» سونىڭ جالعاسى. ميشۋستين مەن سمايىلوۆتىڭ كەزدەسۋى سوزىمىزگە دالەل. رەسەي مەن قازاقستان كۇردەلى كەزەڭدە جاڭا قارىم-قاتىناس قۇرىپ جاتىر»،-دەپ باعالادى رەسەيلىك ساراپشى.

ايتا كەتەيىك، بۇعان دەيىن ءاليحان سمايىلوۆ ماشينا جاساۋ، مەتاللۋرگيا جانە حيميا ونەركاسىبى جانە بىرقاتار نەگىزگى سالالاردا شامامەن 4 ملرد دوللور شاماسىندا رەسەي مەن قازاقستاننىڭ بىرلەسكەن 22 ءىرى جوباسى ىسكە اسىرىلعالى جاتقانىن ايتقان بولاتىن.

Abai.kz