سەنبى, 1 قازان 2022
قۇيىلسىن كوشىڭ 3460 13 پىكىر 6 شىلدە, 2022 ساعات 15:04

ۇلى كوش توقتاپ قالا ما دەپ الاڭدايمىن...

اسا مارتەبەلى نۇرسۇلتان ءابىشۇلى!

ءسىزدى 6 شىلدە – تۋعان كۇنىڭىزبەن شىن جۇرەكتەن قۇتتىقتايمىن. وزىڭىزگە اماندىق، ساۋلىق، تىنىش ءومىر تىلەيمىن.

ءسىز مەملەكەت تىزگىنىن ۇستاعان وتىز جىلدىڭ ىشىندە تاۋەلسىز قازاقستاندا ەشقانداي وزگەرىس بولمادى دەسەك، بۇل – ادىلەتتىلىككە جاسالعان قيانات بولار ەدى. وتىز جىلدا جاسالعان جانە ەشكىم ەشقاشان جوققا شىعارا المايتىن ۇلى ەڭبەكتەردىڭ باسىندا، داۋ جوق، شەكارا سىرتىندا قالعان قانداستارىمىزدى اتاجۇرتىنا ورالتۋعا ارنالعان كوشى-قون ساياساتى تۇرادى.
جاقسىلىق پەن جامانشىلىق ەگىز عوي. ەگەر، اتالعان وتىز جىلدىڭ ىشىندە قاتەلىكتەر مەن كەمشىلىكتەر ورىن الىپ، حالىق ودان زارداپ شەكتى دەسە، ول زارداپتى تارتۋشىلاردىڭ باسىندا دا شەتتەن ورالعان قانداستارىمىز تۇرادى.
دەمەك، ۇلى كوشتىڭ وتىز جىلدا باسىپ وتكەن جولى وقتاي ءتۇزۋ بولا قويعان جوق، ىشكى جانە سىرتقى كۇشتەردىڭ كەدەرگىسىنە كوپ ۇشىرادى. اسىرەسە، قانسورعىش تيمۋر قۇلىباەۆ پەن وپاسىز كارىم ءماسىموۆتىڭ ىقپالىمەن توقىراپ، توقتاپ قالا جازداعان كەزدەرى بولدى.

بىراق، سول ەكى سۇمىراي توندىرگەن قاۋىپ پەن قاتەردىڭ بارىنەن «...كەلىڭدەر دە، اينالايىن قازاعىم، كۇنىڭدى كورىپ، بايىڭدار!» دەپ، ۇلى كوشتى ۇنەمى ءوزىڭىز قۇتقارىپ الىپ وتىردىڭىز.
ءسىزدىڭ تاپسىرماڭىزبەن 1991 جىلعى 18 قاراشادا قازاق كسر مينيسترلەر كەڭەسى شىعارعان №711 قاۋلى جولىن اشقان ۇلى كوشتىڭ ارقاسىندا ءبىر جارىم ميلليونعا جۋىق قازاق تاريحي وتانىنا ورالدى.
ادىلەتتىلىك ءۇشىن ايتايىن، ۇلى كوش وتىز جىل بويى توقتاۋسىز جالعاستى.
قازىر، نەگە ەكەنى بەلگىسىز، «شەتتەگى قازاقتار»، «كوشى-قون»،
«قانداستار»، «دۇنيەجۇزى قازاقتارىنىڭ قۇرىلتايى» دەگەن سوزدەر مۇلدە ايتىلمايتىن بولىپ بارادى. تەك، پرەزيدەنتىمىز قاسىم-جومارت توقاەۆتىڭ 2019 جىلى ايتقان «دۇنيەجۇزىندەگى قانداستارىمىزدىڭ باسىن تۋعان جەردە بىرىكتىرۋ – ءبىزدىڭ قاسيەتتى پارىزىمىز!» - دەگەن جالعىز اۋىز ءسوزىن داتكە قۋات ەتۋمەن قالعاندايمىز.

قاسىم-جومارت كەمەلۇلى تۇرعاندا، ارينە، «قاسيەتتى پارىز» قاعاز جۇزىندە قالمايدى دەپ ويلايمىن. پرەزيدەنت كوشكە ءبىر قايىرىلىپ سوعادى دەپ سەنەمىن.
ال، ۇلى كوشتىڭ ودان ارعى جىلدارداعى تاعدىرى بۇلىڭعىر، توقتاپ قالا ما دەپ، قاتتى الاڭدايمىن...

يمپەريالاردىڭ وكتەمدىگىنىڭ كەسىرىنەن شەكارا سىرتىندا قالىپ، ءبىر-بىرىنەن اجىراپ قالعان اعايىننىڭ باسىن قوسقان «كوشى-قون» دەگەن وسى ۇلى ساياسات ءۇشىن مەن كەشە ءسىزدى قولداپ ارپالىسسام، بۇگىن قاسىم-جومارت كەمەلۇلىنىڭ ءبىر جاعىنان شىعىسسام، كومەكتەسسەم دەپ شىر-پىر بولىپ ءجۇرمىن.
بىراق، جولىم دا، قولىم دا باياعىداي ەمەس، تارىلىپ، قىسقارىپ بارادى...

اسا مارتەبەلى نۇرسۇلتان ءابىشۇلى!

مەنىڭ جەرلەستەرىم مەن تاعدىرلاستارىم ءسىزدىڭ ءبىزدى اتاجۇرتىمىزعا ورالۋىمىزعا زور مۇمكىندىك بەرگەن وسىناۋ قامقورلىعىنىزدى ماڭگى ۇمىتپايدى! ءار ۋاقىت شىنايى ريزاشىلىقپەن ەسكە الىپ، العىسىن ايتاتىن بولادى.

وسى ۇلى ەڭبەگىنىز ءۇشىن مەن سىزگە ءدان ريزامىن!!
جامبىل اتامىزدىڭ جاسىنا جەتىڭىز!!!

اۋىت مۇقيبەك

Abai.kz

13 پىكىر