بەيسەنبى, 28 ناۋرىز 2024
الاساپىران 3697 10 پىكىر 17 قازان, 2022 ساعات 15:46

داۋىل الدىنداعى تىنىشتىق

سوڭعى اپتادا ۋكراينا سوعىسى ءبىرشاما پوزيتسيالىق نەگىزگە ءوتتى. وعان ەكى جاقتىڭ دا ءىرى شايقاستارعا دايىندالىپ جاتقانى اسەر ەتۋدە. ۋكرايناعا باتىس سەرىكتەستەرى "رامشتاين-5" پەن "رامشتاين-6" كەزدەسۋلەرىندە ۋادە ەتكەن قارۋلاردى جەتكىزۋدە. 

ۋكراينا اۋماعىنا زىمىران سوققىلارىن جيىلەتكەن رەسەي كيەۆكە ناتو ەلدەرى تاراپىنان اۋە جانە زىمىران كەشەنىنەن قورعاۋ جۇيەلەرىن جىلدام ارادا بەرۋگە ماجبۇرلەۋدە. زىمىرانعا قارسى جۇيەلەر ۋكراينانىڭ ءىرى قالالارىن قورعاماق. اقش ۋادە ەتكەن NASAMS جۇيەسى قازان ايىنىڭ سوڭىنا دەيىن كەلىپ جەتەتىنى بەلگىلى بولدى. ال گەرمانيا كيەۆكە العاشقى IRIS-T قورعانىس جۇيەسىن جەتكىزدى. ول بۇگىنگى تاڭدا ەلدىڭ وڭتۇستىگىن قورعاۋعا جىبەرىلگەنى ايتىلۋدا، ماماندار ودەسسا قالاسىن زىمىران شابۋىلىنان قورعايتىن بولادى دەگەن پىكىر ايتۋدا.

سوعان قاراماستان رەسەي قورعانىس مينيسترلىگى ۋكراينا اۋماعىنا زىمىرانمەن جانە كاميكادزە دروندارمەن شابۋىل جاساۋدى ۇدەتۋدە. شويگۋدىڭ باستى ماقساتى ماڭىزدى ازاماتتىق ينفراقۇرىلىم جۇيەلەرىنە سوققى جاساپ، جارىق پەن سۋسىز قالعان قاراپايىم حالىق ارقىلى كيەۆكە دەگەن پيسحولوگيالىق قىسىمدى كۇشەيتۋ. الايدا بۇل ادىستەرى كەرى ەففەكت بەرىپ، قوعامدى ۇيىستىرۋ پروتسەسستەرىن جىلدامداتىپ جاتقانداي.

رەسەي يراننان العان كاميكادزە دروندارىن قولدانۋدى ارتتىرىپ، كۇنىنە ونداعان شابۋىل ۇيىمداستىرۋدا. بۇل زەلەنسكي ءوفيسى مالىمدەگەن اقپاراتقا ساي كەلەتىندەي. زەلەنسكي ءوفيسى ءبىر اپتا بۇرىن "رەسەي يراننان 2400 دانا كاميكادزە درونىن ساتىپ الۋعا تاپسىرىس بەردى" دەپ بارلاۋ قىزمەتتەرىنە سىلتەمە جاساي وتىرىپ مالىمدەگەن بولاتىن. كۇنى كەشە عانا "يران رەسەيگە زىمىران بەرۋى مۇمكىن" دەگەن اقپارات شىقتى. The Washington Post-تىڭ جازۋىنشا يران رەسەيگە زىمىران كەشەندەرىن بەرمەك. ولار "Fateh-110" زىمىرانى (300 شاقىرىمعا جەتەدى), "Zolfaghar" زىمىرانى (700 شاقىرىمعا جەتەدى). تەگەران مەن ماسكەۋ بۇل اقپاراتتى ارينە جوققا شىعاردى، وسىعان دەيىن ەكى ەل كاميكادزە دروندارىن دا جوققا شىعارعان ەدى.

ماسكەۋ بەلارۋس بيلىگىنە دە قىسىمدى ارتتىردى. سەگىز ايعا جۋىق امالىن تاۋىپ، سوعىستان قاشىپ جۇرگەن لۋكاشەنكو ەندى بۇل سوعىستىڭ تىكەلەي قاتىسۋشىسى بولۋى ىقتيمال. ۋاقىت سوزىپ كەلگەن بەلارۋس باسشىسىندا ەندى ۋاقىت جوق سياقتى. بەلارۋس جەرىنە رەسەيدىڭ 9 مىڭ جاۋىنگەرى مەن شابۋىلداۋشى ۇشاقتارى كەلە باستادى. بۇل "وداقتاس ەل" جوباسى اياسىندا ىسكە اسىپ جاتىر دەيدى لۋكاشەنكو. مينسك ءوز اسكەري قويماسىنداعى قارۋلارىن، ەسكى-قۇسقى تەحنيكالارىن سۇيرەپ شىعىپ، ماسكەۋگە بەرۋگە كەلىستى. وسىلايشا رەسەي ۋكرايناعا شابۋىلدى ۇدەتۋدى كوزدەپ وتىر.

ال قازىرگى جاعدايدى داۋىل الدىنداعى تىنىشتىق دەسەك بولادى. ۋكراينا باتىستىق اسكەري تەحنيكانى، قارۋدى الۋدا. ۇلىبريتانيادا اسكەري جاتتىعۋدان ءوتىپ، تاجىريبە جيناعان 10 مىڭ ۋكراين ساربازى ەلىنە ورالدى. بۇل جاقىن ارادا ۋكراينا اسكەرى بىرنەشە باعىتتا شابۋىلعا شىعادى دەگەندى بىلدىرەدى. ال رەسەي موبيليزاتسيالانعانداردىڭ جاپپاي فرونتقا كەلۋىن كۇتۋدە. سونىمەن بىرگە يراننان زىمىراندار الىپ، سولتۇستىك باعىتتا بەلارۋس اۋماعىن ارقىلى دا سوققى جاساۋدى ويلاستىرۋدا. بۇل داۋىل الدىنداعى تىنىشتىق.

Abai.kz

10 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1562
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2254
عيبىرات

قايسار رۋحتى عازيز جان

مۇحتار قۇل-مۇحاممەد 3521