«وتان ءۇشىن سوعىس - ماحابباتتان دا بيىك دۇنيە»
باسى: مايدانداعى ۋكراينا ارۋلارى: مارگاريتا ريۆچاچەنكو
جالعاسى: مايدانداعى ۋكراينا ارۋلارى: وكسانا رۋبانياك
جالعاسى: مايدانداعى ۋكراينا ارۋلارى: الەكساندرا
جالعاسى: مايدانداعى ۋكراينا ارۋلارى: قارلىعاش
جالعاسى: مايدانداعى ۋكراينا ارۋلارى: يرينا تسىبۋح
باسقىنشى رەسەي اگرەسسياسىنا قارسى ءوز وتانىن ەرلىكپەن قورعاپ جۇرگەن نازىك تە ەرجۇرەك – كريستينا بوگاتچۋكتىڭ اڭگىمەسىن بۇگىن وقىرمان تالقىسىنا ۇسىنباقپىز.
كەيىپكەر – كريستينا بوگاتچۋك
جاسى – 22 جاستا
شەنى – جاۋىنگەر دارىگەر
– 24 اقپاندا تاڭەرتەڭ كوزىڭىزدى اشقاندا ەڭ ءبىرىنشى نە ويلادىڭىز، نە ىستەدىڭىز؟
– ءبىر عانا ويىم بولدى. جاقىندارىمدى قاۋىپسىز جەرگە ورنالاستىرىپ، ءوزىم سوعىسقا اتتانۋ.
– سوعىسقا بارۋ تۋرالى شەشىمدى قالاي قابىلدادىڭىز؟
– سوعىسقا اتتانعاننان باسقا ەشتەڭە ىستەي الماس ەدىم. ۋكرايناعا قاتىستى نارسەنىڭ ءبارىنىڭ ماعان قاتىسى بار. ەلىمنىڭ نامىسىن اياققا تاپتاپ جاتقاندا، وتانىم ءۇشىن كۇرەسەتىن بولامىن. بۇل ماحابباتتان دا بيىك دۇنيە. مەن ءۇشىن ارقاشان وسىلاي بولعان.
– بۇل جەردەگى قىزمەتىڭىز قانداي، كۇنىڭىز قالاي وتەدى؟
– بىزدە مايدانعا شىعاتىن كۇندەر مەن جاتتىعۋ جاسايتىن كۇندەر عانا بولادى. قازىر ءبىز كۇن سايىن دەمالماي جاتتىعۋ جاساپ ءجۇرمىز. ودان بولەك مەن جاۋىنگەرلىك مەديتسينا تۋرالى ساربازدارعا ءدارىس جۇرگىزەمىن جانە جاراقات العانداردى، اۋىرىپ جاتقانداردى ەمدەيمىن.
– ءسىزدىڭ بولىمشەڭىزدە گەندەرلىك كەمسىتۋشىلىك بار ما؟
– كەرىسىنشە مەنى مۇندا قۇرمەتتەيدى. مايدانعا كەلگەن سوڭ، مەن ەرلەرمەن تەڭدەي، جاۋىنگەر رەتىندە قىزمەت ەتىپ كەلەمىن. ءازىلىمىز دە جاسارادى.
– قانداي قيىندىقتاردى باستان كەشتىڭىز؟
– مايدانعا كەلۋ ءۇشىن مەن ۇزاق ءارى قيىن جولدان ءوتتىم. ايەل ادامعا سوعىستا ءجۇرۋ قيىن. بىراق ول باسقا اڭگىمە. مەن ءۇشىن ەڭ قيىن بولعانى، بويىمداعى نازىكتىگىمدى، جۇمساق جۇرەگىمدى، مەيىرىمدىلىگىمدى «ساندىققا سالىپ، اۋزىن قۇلىپتاپ» قويا تۇرۋىما تۋرا كەلدى. مۇندا سالقىنقاندى بولۋىم قاجەت.
– تولىققاندى سوعىس كەزىندە ءسىزدى نە تاڭعالدىردى؟
– ۇلت بىرلىگى. ەل مەن ارمياعا قاتىستى قوعامنىڭ ساناسىنداعى سەرپىلىس.
– قازىر ءسىزدىڭ رۋحىڭىزدى تۇسىرمەي تۇرعان نە؟
– ءبىز كۇرەسىپ جاتقان ورتاق ماقسات جانە اسكەردەگى باۋىرلارىمنىڭ وتتى كوزدەرى.
– سوعىستان كەيىن ومىرىڭىزدەگى نە نارسەنى ماڭگىلىككە وزگەرتەسىز؟
– بۇرىن ۋايىمداتقان نارسەلەردى ويلاۋدى قويامىن. ءار كۇنىمنەن ءلاززات الىپ، باقىتتى ءومىر سۇرەمىن.
– ۋكراينالىقتار مەن الەمگە نە ايتاسىز؟
– سوعىس ۇزاققا سوزىلادى. بوساڭسىماڭىزدار. رەسەيلىكتەردىڭ بىزگە ىستەپ جاتقان ارەكەتتەرىن ۇمىتپاڭىزدار. ۋكراين تۇتقىندارىن ەستە ساقتاڭىزدار، ولار بوساپ ەلىنە قايتۋى كەرەك. ءومىر ءسۇرۋى كەرەك.
تىلداعى ۋكرايندارعا 3 كەڭەسىم بار:
بارلىعىنا دايىن بولىڭىزدار، فيزيكالىق جاتتىعۋلار جاساڭىزدار، تاكتيكالىق مەديتسينا كۋرستارىنان وتىڭىزدەر، تاكتيكانى، اتۋدى ۇيرەنىڭىزدەر;
ۋكراينا ارمياسىن سوڭىنا دەيىن قولداڭىزدار;
رۋسوفوبيانى ەشقاشان سانالارىڭىزدار وشىرمەڭىزدەر.
– ۋكراينانىڭ بولاشاعىنان قانداي پەرسپەكتيۆالاردى كورەسىز؟
– مەن بولاشاقتا ۋكراينانى مادەنيەتى گۇلدەنگەن، ەكونوميكاسى مەن ءبىلىم دەڭگەيى جوعارى، شىنايى باقىتتى، سانالى ادامدارى بار تاۋەلسىز مەملەكەت رەتىندە كورەمىن.
Abai.kz
