2023 جىلدان باستاپ گەرمانيا رەسەيدىڭ مۇنايىنان باس تارتىپ، قازاقستاننىڭ مۇنايىن ساتىپ الا باستايدى. بۇل تۋرالى «Bloomberg» باسىلىمى جازدى.

بۇعان دەيىن رەسەيلىك «ترانسنەفت» باس ديرەكتورى نيكولاي توكارەۆ: «گەرمانيا 2023 جىلدىڭ ءبىرىنشى توقسانىنا مۇنايعا تاپسىرىس بەردى»، - دەگەن بولاتىن. بىراق، گەرمانيا ەكونوميكا مينيسترلىگى: توكارەۆتىڭ جالعان مالىمدەمە جاساعانىن، گەرمانيا جاڭا جىلدان باستاپ رەسەي مۇنايىن ساتىپ المايتىنىن ايتتى.

«قازمۇنايگاز» قاڭتار ايىندا گەرمانياعا سىناق رەتىندە مۇناي شيكىزاتىنىڭ العاشقى پارتياسىن جونەلتۋدى قاراستىرىپ جاتىر. بۇل تۋرالى قمگ ءباسپاسوز حابارلادى.

«قازاقستان رەسپۋبليكاسىنىڭ ىشكى نارىعىنا مۇناي ونىمدەرىن جەتكىزۋ ءۇشىن قمگ مۇناي ءوندىرۋشى ۇيىمدارىنىڭ رەسۋرستارى وتاندىق ءموز-گە جىبەرىلەدى. قمگ مۇنايىنىڭ ەكسپورتتىق كولەمى بىرىڭعاي جۇيەلىك ترەيدەر – KMG Trading مەكەنجايىنا جەتكىزىلەدى. ول قمگ ءموز-ءنىڭ رۋمىنياداعى قاجەتتىلىگىن جاۋىپ وتىر. ال ەكسپورتتىق ءونىمنىڭ قالدىعى ۇزاق مەرزىمدى شارتتار شەڭبەرىندە ىسكە اسىرىلادى.

سونىمەن قاتار، قر پرەزيدەنتىنىڭ تاپسىرماسىنا سايكەس، «قازمۇنايگاز» 2023 جىلدىڭ قاڭتار ايىندا گەرمانياعا سىناققا مۇناي پارتياسىن جونەلتۋدى قاراستىرۋدا»، - دەدى قمگ باسقارما توراعاسى ماعزۇم مىرزاعاليەۆگەرمانيا ەكونوميكا جانە كليماتتى قورعاۋ مينيسترلىگىنىڭ پارلامەنتتىك ستاتس-حاتشىسى ميحاەل كەلنەرمەن جانە «قازمۇنايگاز» اق-دا استانا-گەرمانيانىڭ سولشىل پارتياسىنىڭ پارلامەنتتىك توبىنىڭ بۋندەستاگ دەپۋتاتى كريستيان گەركەمەن كەزدەسۋىندە.

كەيىن رەسەيلىك «ترانسنەفت» كومپانياسىنىڭ رەسمي وكىلى يگور دەمين: «قازاقستان مەن گەرمانيا اراسىندا مۇناي جەتكىزۋ تۋرالى ۋاعدالاستىق بولعان جوق»، - دەگەندى ايتتى. ونىڭ سوزىنشە، گەرمانيانىڭ رەسەيدەن الىپ وتىرعان مۇناي كولەمىن قازاقستان بەرە المايدى. قازاقستان تەك 3-5 ملن توننادان اسپايتىن مۇناي جىبەرۋى مۇمكىن، ال رەسەي نەمىس زاۋىتتارىنا جىلىنا 19-20 ملن شىكىزات جونەلتىپ وتىرعان.

ايتا كەتەيىك، وسىعان دەيىن گەرمانيا ءسىم باسشىسى قازاقستانعا كەلىپ، ەكىجاقتى كەلىسسوزدەر بولعان ەدى.

ايجان تەمىرحان

Abai.kz