ۋكراينا مەن رەسەي قاقتىعىسىنا جىل تولعاندا الەمدىك گەوساياسي قىتىناستار باسقاشا باعىت الىپ، مەملەكەت باسشىلارىنىڭ اسىرەسە، ەلشىلەردىڭ ءجۇرىس-تۇرىسىنىڭ كوبەيگەنى بايقالادى.

كۇنى كەشە الەمدىك باق بەلارۋس باسشىسى لۋكاشەنكونىڭ 28 اقپاندا قىتايعا ساپارلاي باراتىنىن، ال امەريكا مەملەكەت ىستەر حاتشىسى بليكەننىڭ ورتا ازياعا كەلەتىنىن جەتكىزدى.

لۋكاشەنكو قىتايدا ەكى كۇن ەرەۋىلدەپ، مەملەكەت باسشىسى شي توراعامەن كەڭەس قۇرماق. ءپۋتيننىڭ سالەمىن الىپ بارا جاتىر ما، ول جاعى بەلگىسىز. ونىڭ الدىندا عانا قىتاي سىرتقى ىستەر كەڭسەسىنىڭ باسشىسى ۋاڭ ي ماسكەۋگە كەلىپ، پۋتينمەن كەزدەسكەن ەدى. كرەمل باقتارى الداعى ايلاردا قىتاي باسشىسى ماسكەۋگە ساپارلاي كەلەتىن بولدى دەپ الاقايلاعان.

اق ءۇيدىڭ سىرتقى ىستەرىنە جاۋاپتى بلينكەن استانادا وا+1 ساميتىنە، اتاپ ايتقاندا  ورتالىق ازيا مەن امەريكا سىرتقى ىستەر مينيسترلىك وكىلدەرىنىڭ ىنتىماقتاستىق جيىنىنا قاتىسادى. پرەزيدەنت توقاەۆپەن كەزىگەدى، ودان ارى تاشكەنگە بارادى دەپ كۇتىلۋدە.

لۋكاشەنكونىڭ قىتاي ساپارىنان بۇرىن، ءوزىمىز ءۇشىن اق ءۇي وكىلىنىڭ ءبىز جاققا ات باسىن بۇرۋى ەلەڭ ەتەرلىك وقيعا ەكەنى بەلگىلى. رەسەيدىڭ ۋكراينا سوعىسىنداعى الەۋەتى بەلگىلى بولعاننان كەيىن، ساياسي ساراپشىلار ايماقتا قىتايدىڭ ىقپالى ارتاتىنىن جاپپاي جازا باستاعان.

وتكەن جىلى استانادا وتكەن تاۋەلسىز ەلدەر دوستاستىعى ەلدەرى جيىنىندا تاجىكستان باسشىسى راحموننىڭ پۋتينگە قازىرگى تاۋەلسىز ەلدەرگە بۇرىنعى كەڭەس وداعى ەلدەرىندەي مامىلە جاساماۋعا ۇندەۋى سونىڭ كورىنىسىندەي بولعان. پۋتين جاقىنداعى جولداۋىندا قيىر شىعىس ارقىلى قىتايعا، قازاقستان ارقىلى ورتا ازياعا شىعاتىن باعىتتى دامىتۋعا باسا ءمان بەرىلەتىنىن جەتكىزگەن.

بليكەننىڭ كەزەكتى ساپارى سوعان جاۋاپ سياقتى. بايدەن بيلىگى اۋعانستاندى ءبىر-اق كۇندە تاستاپ كەتكەن قادامدارىنىڭ قانداي گەوساياسي سالدارعا الىپ كەلگەنىن جەتە ءتۇسىنىپ، ساباق العانداي. دەسە دە ساياسي ساراپشىلار «تەڭىز جولى جوق ورتا ازيا ەلدەرىنە اقش بيلىگى ەكونوميكالىق كومەك، دەموكراتيالىق قۇندىلىقتار ۇسىنۋدان ارى اسپايدى» دەگەن پىكىردە. كۇنى كەشە بليكەننىڭ ورىنباسارىنىڭ وزبەك بيلىگىنىڭ بالالاردى ماقتا تەرۋگە تارتۋدى كۇشىنەن قالدىرۋىن وڭدى قادام دەپ باعالاۋى سول بولجامنىڭ راستىعىن دالەلدەگەندەي. دەسە دە كوڭىلى كۇپتى كوپشىلىكتىڭ امەريكا مەملەكەت ىستەر حاتشىسىنىڭ ساپارىنان كۇتەرى كوپ.

Abai.kz