كەشە قازاقستان پرەزيدەنتى قاسىم-جومارت توقاەۆ سوت جۇيەسى مەن سۋديالاردىڭ مارتەبەسى تۋرالى زاڭعا وزگەرتۋلەر مەن تۇزەتۋلەر ەنگىزۋ تۋرالى زاڭعا قول قويعانى بەلگىلى.

قولدانىستاعى زاڭدى وزگەرتۋ تۋرالى باستاما دەپۋتاتتار تارابىنان كوتەرىلگەن. زاڭ جوباسىنىڭ اۆتورلارى جاسالاتىن جاڭا وزگەرىستەر سوت قاتەلىگىن ازايتىپ، سوت ۇكىمدەرىنىڭ ساپاسىن ارتتىرادى دەپ ەسەپتەيدى. اپەللياتسيالىق ينستانتسيا قىلمىستىق جانە ازاماتتىق ىستەردى ءبىرىنشى ينستانتسياعا قايتارماي، ولاردى ءوزى تۇزەتە الادى. ءبىز سوت جۇيەسى مەن سۋديالاردىڭ مارتەبەسى تۋرالى زاڭعا ەنگىزىلگەن وزگەرىستەردىڭ ناقتى رولى تۋرالى قازاقستان زاڭگەرلەر وداعى الماتى فيلالىنىڭ باستىعى، «ادىلدىك جولى» قوعامدىق ۇيىمىنىڭ جەتەكشىسى باۋىرجان ماقۇلباەۆ مىرزانىڭ پىكىرىن بىلدىك.

باۋىرجان ماقۇلباەۆ:

- سوت جۇيەسى مەن سۋديالاردىڭ مارتەبەسى تۋرالى زاڭعا ەنگىزىلىپ وتىرعان وزگەرتۋلەر مەن تولىقتىرۋلار، جالپى سۋديالاردىڭ تاۋەلسىزدىگىن نىعايتۋعا باعىتتالعان دەپ ەسەپتەيمىز، ويتكەنى اتالعان زاڭ، سوتتاردىڭ جۇمىسىن جاقسارتىپ، سۋديالاردىڭ ناقتى تاۋەلسىزدىگىن ودان ءارى ارتتىرادى.

اتاپ ايتقاندا، زاڭ جوباسىنا، اۋداندىق سوت توراعالارىن سايلاۋ ارقىلى تاعايىنداۋدى كوزدەيتىن نورمالار ەنگىزىلىپ وتىر. اتالعان سايلانبالى جۇيەنى ەنگىزۋ، جاعدايدى تۇزەۋگە سەپتىگىن تيگىزەدى جانە ول بويىنشا سۋديالاردىڭ وزدەرى توراعالىق لاۋازىمعا ءوز قوعامى اراسىنان كانديداتتى ۇسىنا الادى. بۇل رەتتە، ايقىندىق پەن اشىقتىق قامتاماسىز ەتىلەدى.

مەملەكەت باسشىسى تاراپىنان 2021 جىلى 1 قىركۇيەكتە «حالىق بىرلىگى جانە جۇيەلى رەفورمالار – ەل وركەندەۋىنىڭ بەرىك نەگىزى» اتتى جاڭا جولداۋى جاريا ەتىلگەن بولاتىن.

سول سەبەپتى، بيلىك تاراپىنان زاڭ اياسىنداعى جاسالىنىپ جاتقان رەفورمالاردى ارى قاراي زاڭنامالاردى جەتىلدىرۋ ماقساتىندا جالعاستىرۋ كەرەك دەپ ويلايمىن، ويتكەنى ول اعىمداعى زامانىمىزدىڭ تالابى. بۇل ءوز كەزەگىندە، قازاقستاننىڭ ودان ءارى دەموكراتيالىق دامۋىنا سەبەپشى بولماق.

الايدا، بيلىك تاراپىنان جاسالىپ جاتقان ساياسي رەفورمالار حالىقتىڭ كوڭىلىنەن تولىقتاي شىعادى دەپ ايتا المايمىن، ويتكەنى ەنگىزىپ جاتقان وزگەرتۋلەر مەن تولىقتىرۋلار، سوت جۇيەسىندەگى بولىپ جاتقان سىبايلاس جەمقورلىقتىڭ تاۋەكەلدەرى مەن سوت وكىلدەرى تاراپىنان زاڭسىز سوت شەشىمدەرىن شىعارۋعا اكەلىپ سوقتىرعان ءىس-ارەكەتتەردىڭ الدىن الادى دەپ تولىق سەنىممەن ايتا المايمىز.

Abai.kz