وتكەن شاقىرىلىمدا ماجىلىستە دەپۋتات بولىپ، رەسەيدىڭ ۋكرايناعا قارسى باسقىنشىلىعىن اشىق قولداعان، ونىسىمەن قوعامنىڭ نارازىلىعىن تۋدىرىپ، پارتيادان ءھام ماجىلىستەن قۋىلعان ازامات ابىلداەۆ تاعى شىعىپ، سۇحبات بەرىپتى، - دەپ جازادى Mezgil.kz. 

«وردا س احمەتوۆوي» You Tube ارناسىندا جاريالانعان سۇحباتتىڭ كولەمى ءبىر ساعاتتان اسادى. تاقىرىبى: «ازامات ابىلداەۆ: مەن نەگە ۆلاديمير پۋتين مەن «ارنايى اسكەري وپەراتسيانى» قولدايمىن؟». سوزبە-ءسوز وسىلاي.

ءبىز اتالعان سۇحباتتا ايتىلعان ءبىرلى-جارىم پىكىردى وقىرمان تالقىسىنا ۇسىنعاندى ءجون سانادىق.

« ءسىز رەسەيدىڭ «ارنايى اسكەري وپەراتسياسىن» جانە رف-نىڭ پرەزيدەنتىن نە سەبەپتى قولدايسىز؟»، - دەگەن سۇراققا:

«تاريحتان جانە گەوساياساتتان از-كەم بولسا دا حابارى بار جانە ۇلى وتان سوعىسىنىڭ نەدەن باستالىپ، قالاي اياقتالعانىن، ودان كەيىن مەملەكەتتەر اراسىنداعى قاتىناستىڭ قانداي بولعانىن بىلەتىندەر مۇنىڭ رەسەي مەن ۋكراينا اراسىنداعى ەمەس، گلوباليستەردىڭ رەسەيگە قارسى اشقان سوعىسى ەكەنىن جاقسى تۇسىنەدى. وكىنىشتىسى، بۇل رەتتە ۋكراينا باتىستىڭ قولشوقپارى عانا بولىپ وتىر. ۋكراينا – سوعىستى باستاۋدىڭ سىلتاۋى عانا. ال وسىناۋ سوعىستا الەمنىڭ تاعدىرى شەشىلگەلى تۇر. قازاقستاننىڭ بولاشاعى دا وسى سوعىستىڭ ناتيجەسىنە بايلاۋلى»، - دەيدى.

شاۋىلدەگەن شوۆينيست «قاڭتار قىرعىنى» جايلى دا پىكىر ءبىلدىردى.

«ساياساتتى ىشتەن بىلەتىن ادامدار «قاڭتاردىڭ» ءالى اياقتالماعانىن، بىلتىر تەك «رەپيتيتسيا» وتكەنىن بەسكە بىلەدى. قازاقستاننىڭ ورنالاسقان ايماعى باتىس ءۇشىن رەسەي جانە قىتايمەن سوعىسۋعا تاپتىرماس جەر. «قاڭتار» كەزىندە ءبىز ۋكراينانىڭ كەبىن كيۋگە شاق قالدىق. بۇل (ۋكرايناداعى) سوعىستى گلوباليستەر بۇرىننان ويلاستىرىپ قويعان. مۇنى پۋتين باتىستاعى ناتو ءورىسىن شىعىسقا قاراي كەڭىتە باستاعاندا مىنبەرگە شىققان سايىن ۇنەمى ايتىپ ءجۇردى. پۋتين ناتو-نىڭ ۋكرايناعا قارۋ جاراقتى بەكەردەن-بەكەر تاسىپ جاتپاعانىن ءتۇسىندى. سول سەبەپتى ول 2021 جىلدىڭ 21 جەلتوقسانىندا باتىسقا قارۋ-جاراقتارىن 1997 جىلى قاي شەكارادا تۇرسا، سوندا اپارىڭدار دەپ تالاپ قويدى»، - دەيدى.

ءارى قاراي: «2022 جىلدىڭ 10 قاڭتارىندا شۆەتساريا مەن رەسەي وسى سەبەپتى كەزدەسۋى كەرەك ەدى. 9 قاڭتاردا رەسەي دەليگاتسياسى شۆەتسارياعا ۇشۋعا دايىندالدى. ال «ءبىزدىڭ قاڭتار» 4 قاڭتاردا باستالدى. قازاقستان مەن رەسەي اراسىنداعى شەكارانىڭ كولەمىنە سايكەس پۋتين نازارىن ۋكراينادان ورتالىق ازياعا اۋداردى. رەسەي 21 اقپاندا «دنر» مەن «لنر-ءدى» مويىندامادى. ال رەسەي باسىشىلىعى «قاڭتاردى» كىم نە ءۇشىن ۇيىمداستىرعانىنان حاباردار بولدى. پۋتين وسىنىڭ ءبارىن ەسەپكە الىپ وتىرىپ، ءتۇپتىڭ تۇبىندە سوعىسپاي قويمايتىنىن ءبىلدى. سوندىقتان ارنايى اسكەري وپەراتسيانى ءبىرىنشى بولىپ باستادى. مىنە، ءااو-نىڭ باستالۋىنا تۇرتكى بولعان – قازاقستان («قاڭتار»). پۋتين 1941 جىلدىڭ 21 ماۋسىمىنداعى ءستاليننىڭ قاتەلىگىن قايتالاعان جوق»، - دەپتى.

Abai.kz