قر سەناتىنىڭ توراعاسى ماۋلەن اشىمباەۆتىڭ،

قر مەملەكەتتىك كەڭەسشىسى ە.ت. قاريننىڭ نازارىنا!

ارازداسىپ اعايىن كەتەر ەدى،
ءبىر قاريا بولماسا ءبىر اۋىلدا...

مۇقاعالي ماقاتاەۆتىڭ وسى ولەڭىن بىلمەيتىن قازاق جوق.

ءبىزدىڭ بۇگىنگى داۋىرىمىزدەگى سول مۇقاعالي ايتقان سول قاريانىڭ ءبىرى، ءبىرى بولاعاندا دا بىرەگەيى – رىسبەك سارسەنبايۇلى دەر ەدىم.

وكىنىشكە وراي، ءبىز سول رىسبەك سارسەنبايۇلى اعامىزدى قادىرلەۋدىڭ، اقىل-كەڭەسىن تىڭداۋدىڭ ورنىنا، ونى سوڭعى كەزدە ۇنەمى قۋعانداۋمەن كەلەمىز. YouTube كانالىن اشىپ قالساق بولدى، «رىسبەك سارسەنباي اعامىزدىڭ ۇيىنە پوليتسيا كەلدى...»، «سوت رىسبەك سارسەنبايۇلىنا ايىپپۇل سالدى»، «رىسبەك سارسەمبايۇلىنا سوت شەشىمى شىقتى»... دەگەن «جاڭالىقتاردان» كوز اشپايتىن بولدىق.

ءيا، رىسبەك سارسەنبايۇلىنىڭ وپپوزيتسيونەر ساياساتشى ەكەنى راس.

بىراق، تاۋەلسىز قازاقستاننىڭ وتىز جىلدىق تاريحىندا مۇنداي شىنشىل، بىربەتكەي، ادىلەتتى وپپوزيتسيونەردى الاتاۋدى التى اينالساق تا تابا المايمىز. رىسبەك اعا وتە مادەنيەتتى ساياساتكەر. ول دالەلسىز سويلەمەيدى.

بار بولعانى، «سايلاۋ ادىلەتسىز ءوتتى!» دەپ، «حالىق پارلامەنتى» دەگەن اتپەن جينالىس وتكىزىپتى، بەيبىت ميتينگ وتكىزىپتى. سول جينالىستاردا ءبىر-ەكى اۋىز اششى پىكىر ايتىپتى. ا، بىراق توڭكەرىس جاسايمىن، بۇزىپ-شاعامىن دەگەن جوق قوي!

سول ءۇشىن جاسى جەتپىستەن اسقان قادىرمەندى اقساقالىمىزدى سونشا قۋعىنداۋعا بولا ما!؟ اكەمىزدەي ادمنىڭ بۇكىل ەل-جۇرتتىڭ الدىندا سوت زالىنا سۇيرەتكەنىمىز ۇيات ەمەس پە؟! ەسەسىنە، اقورداعا شاقىرىپ پىكىرىن تىڭدامايسىزدار ما؟!

كەزىندە ونىڭ تۋعان ءىنىسى التىنبەكتىڭ بولاشاق جايلى ايتقان ۇشقىر بولجامدارى بۇگىن اينا قاتەسىز ورىندالىپ جاتقان جوق پا؟!!

ەرتەڭگى ۇرپاق رىسبەك اعامىزدىڭ دا بۇگىنگى كۇرەسىن باعالاپ، ونى ۇلگى تۇتاتىن بولادى!

ءوز باسىم وسى وپپوزيتسيا دەگەن اۋىلدان اۋلاق جۇرەتىن اداممىن. ەلگە ورالعان 25 جىلدىڭ ىشىندە ەكى-اق وپپوزيتسيالىق باعىتتاعى ساياساتكەرمەن جاقىن ارالاسىپ، ءىنى بولىپپىن. ونىڭ ءبىرى – وسى رىسبەك سارسەنباي، ەكىنشىسى – قازىرگى دەپۋتات ەرمۇرات باپي. قالعانىمەن كەزىكسەم امانداسقان شىعارمىن، ال بىلاي وتىرىپ سويلەسكەن ەمەسپىن.

سەبەبى، بۇل ەكەۋى دە تەكتى اعالار! ەڭ باستىسى حالىققا، مەملەكەتكە دەگەن نيەتى ءتۇزۋ تۇلعالار.

نۇرجان التاەۆ پەن مۇحتار تايجاندى، جانبولات مامايدى اۋىق-اۋىق قاماپ تۇرعان ەشتەڭە ەتپەيدى. ولار – جاس. پىسۋى كەرەك! ەندىگى جەردە كابينەتتەن شىقپاعان، تۇرمەنىڭ ءدامىن تاتپاعان تۇلعانىڭ دۇرىس پرەزيدەنت نەمەسە پرەمەر-مينيستر بولمايتىنى بەلگىلى بولىپ قالدى. تاريحتاعى ەڭ ىقپالدى مەملەكەت باسشىلارىنىڭ ءبارى وسىنداي قۋعىن-سۇرگىننىڭ قۇربانى بولىپ، تۇرمەدە وتىرىپ شىققاندار ەكەنى بەلگىلى.

سول ءۇشىن كەلەشەك مەملەكەت باسقاراتىن تۇلعالداردى وسىلاي دايىنداي بەرگەننىڭ ارتىقتىعى جوق دەپ ويلايمىن.

ال، مەن جاقسى بىلەمىن، رىسبەك سارسەنبايۇلى اعامىزدا پرەزيدەنت نەمەسە ۇكىمەتباسى بولا قويايىن دەگەن نيەت جوق ەكەنىن بىلەمىن. ارى كەتكەندە، ءبىر كەزەك ءماجىلىس دەپۋتاتى بولىپ، پارلامەتكە ءبىراز وزگەرىس اكەلگىسى عانا كەلگەن.

مەنشە، قاسىم-جومارت توقاەۆ «انا رىسبەك سارسەنبايۇلى نەگە ميتينگ ءۇيىمداستىرادى؟! ونى نەگە قامامايسىڭدار؟!» دەپ، بۇيرىق بەرمەسى انىق. ەگەر، قاسىم-جومارت كەمەلۇلى رىسبەك سارسەنباي اعامىزبەن كەزدەسىپ سويلەسىپ جاتسا، ءبىراز پىكىرىنە قۇلاق اسارى ءسوزسىز!

سول ءۇشىن، رىسبەك اعامىزدى قۋدالاۋدى توقتاتىڭىزدار!

اكەلەرىڭىزدەي ادامدى سوتقا سۇيرەپ ءجۇرۋ ۇيات بولادى!

قايتا، وسىنداي اعامىزدىڭ بولعانىنا ماقتانۋىمىز كەرەك!

اۋىت مۇقيبەك

Abai.kz