كوزىمىز كورگەن شىندىق

«...مەن، مەملەكەت باسشىسى رەتىندە، سايلاۋدىڭ تازا، اشىق ءارى ءادىل وتۋىنە كەپىلدىك بەرەمىن. بۇل مەنىڭ بەرىك ۇستانىمىم».

قاسىم-جومارت توقاەۆ،

قازاقستان رەسپۋبليكاسىنىڭ  پرەزيدەنتى

 وسىدان 3-4 جىل بۇرىن مەملەكەت باسشىسى ەلگە ارناعان ۇندەۋىندە وسىلاي دەدى. ءبىز بۇل سوزگە قۇدايداي سەنىپ، يمانداي ۇيىدىق. پرەزيدەنت الدىمىزدا زور مىندەتتەر تۇرعانىن، قازاقستان حالقىنا سەنىم ارتاتىنىن تاعى  ايتتى. تىپتەن، «التاۋ الا بولسا، اۋىزداعى كەتەدى، تورتەۋ تۇگەل بولسا، توبەدەگى كەلەدى»، - دەيدى دانا حالقىمىز. الداعى سايلاۋعا بارشاڭىزدى بارىنشا جاۋاپكەرشىلىكپەن قاراۋعا شاقىرامىن. ەلىمىزدىڭ كەلەشەگى، ءار وتباسى مەن ءار ازاماتتىڭ تاعدىرى سىزدەردىڭ شەشىمدەرىڭىزگە تىكەلەي بايلانىستى»، - دەگەن ءسوزىن ميىمىزعا قۇيىپ العانىمىز سونداي، 4 ماۋسىم كۇنى مۇنايلى اۋدانىنىڭ باسقۇدىق اۋىلىندا وتەتىن اۋىل اكىمىن سايلاۋعا سەنىمدى وكىل بولىپ قاتىسۋعا قۋانا كەلىستىك.

باسقۇدىق - اۋداندا حالقى ەڭ تىعىز ورنالاسقان اۋىل، 40 مىڭعا جۋىق تۇرعىنى بار.  مۇندا كاسىپكەرلىك تە قارقىندى دامىعان، اۋىلدى قاق جارىپ وتەتىن كۇرە جولدى جاعالاي بيزنەس نىساندارى قاز قاتار ورنالاسقان. سوندىقتان اۋىل تۇرعىندارى ەشكىمگە الاقان جايماي، ءوز كۇندەرىن وزدەرى كورىپ جاتىر دەپ ايتۋعا ابدەن بولادى. وسىنداي ەڭبەكقور اۋىلدىڭ ادامدارى دا اقجارقىن، ءبىر بىرىنە كومەكتەسىپ، قولدا بارىن بولىسۋگە دايىن.

بۇل اۋىلدىڭ مەن دە قاراپايىم تۇرعىنىمىن. سوڭعى 10 جىلدا وسى جەردەن باسپانا تۇرعىزىپ، قۇتتى مەكەن ەتتىم. وسىندا ۇرپاق ءوسىرىپ، جاستارى 80-نەن اسقان اكە-شەشەمدى باعىپ وتىرمىن. اۋىلداعى ءاربىر وزگەرىس، سالىنىپ جاتقان قۇرىلىستار،  تىپتەن، ءشوپ-شوڭگەسىنە دەيىن كوز الدىمىزدا. كەم-كەتىكتەرى دە كوكىرەكتە سايراپ تۇر.  جاسىراتىن نەسى بار، سوڭعى جىلدارى اۋىل ابدەن توزىپ كەتتى. اۋىز سۋدىڭ تاپشىلىعى، جينالىپ قالعان كۇل-قوقىس، كوشە شامدارىنىڭ جوقتىعى، بەي-بەرەكەت سالىنىپ جاتقان قۇرىلىستار، مەكتەپ، بالاباقشا ماسەلەسى، اسفالتتالعان جولدىڭ جوقتىعى، تاعى باسقا ماسەلەلەر ءبارىمىزدى مەزى ەتتى، ايتىلا ايتىلا ابدەن جاۋىر بولدى. وسى شارۋالاردى ىجداعاتتاپ، كۇرمەۋى كوپ ماسەلەنى رەتىمەن قولعا الاتىن جاڭا اكىمنىڭ بولعانىن ىشتەي قالاپ، ارمانداپ كوكسەيتىنبىز. «باقساق، باقا ەكەن» دەگەندەي ەلگە قىزمەت جاسايتىن اكىمدى سايلاۋ ءبىزدىڭ ءوز قولىمىزدا ەكەن، سوعان قۋاندىق.

بىراق، اۋىل ءۇشىن بەل شەشىپ كىم جۇمىس جاسايدى؟ ونداي ادامدى قايدان تابامىز؟ بار ەكەن. تابىلدى. ونداي ازامات ءوزى كەلدى. اسىلجان شاۋەنوۆ. مۇنايلى اۋداندىق حالىققا قىزمەت كورسەتۋ ءبولىمىنىڭ باسشىسى ەكەن. جاسى 40-تان اسقان، اقىل توقتاتقان. ماماندىعى – زاڭگەر بولىپ شىقتى. جۇمىس جوسپارىن كورسەتتى. ءبىز ايتىپ جۇرگەن ماسەلەلەر تولىق قامتىلىپتى. ىزدەگەنگە سۇراعان. اۋىلدىڭ بەلسەندى مۇشەلەرى بار، ءبارىمىز  ءبىر كىسىدەي قولدادىق. قولىمىزدان كەلگەنشە ۇگىت-ناسيحات جۇمىستارىن جۇرگىزدىك.

سونىمەن باسقۇدىق اۋىلىنىڭ اكىمى بولۋ ءۇشىن سايلاۋعا 5 ۇمىتكەر تىركەلدى. ولار:

1. نۇرالى دجۋماەۆ – باسقۇدىق اۋىلدىق اكىمدىك وكرۋگى اپپاراتى مم-ءنىڭ باس مامانى،

2. ايبەك جانگەلدين – باسقۇدىق اۋىلدىق اكىمدىك وكرۋگى اپپاراتى مم-ءنىڭ باس مامانى،

3. انۋار قالىموۆ – اتامەكەن اۋىلدىق وكرۋگى اكىمىنىڭ ورىنباسارى،

4. انەت كەمەجانوۆ – باسقۇدىق اۋىلدىق اكىمدىك وكرۋگى اپپاراتى مم-ءنىڭ باس مامانى،

5. اسىلجان شاۋەنوۆ – مۇنايلى اۋداندىق حالىققا قىزمەت كورسەتۋ ءبولىمىنىڭ باسشىسى.

ەندى مىنا قىزىقتى قاراڭىز. وزدەرىڭىز كورىپ وتىرعانداي، جوعارىداعى تورتەۋى دە اكىمدىك قىزمەتكەرلەرى. سونىڭ ۇشەۋىن حالىقتىڭ اراسىنان «بوتەن» بىرەۋلەر كىرىپ كەتپەسىن دەپ، سايلاۋعا ادەيى كىرگىزىپ قويعان، ايتەۋىر اتى بار ادامدار. ونىڭ ۇستىنە اۋىل اكىمىن سايلاۋعا 5 ادامنان ارتىق ۇمىتكەر بولماۋى كەرەك-مىس، سوندا بۇل لاس تەحنولوگيا ايتپاسا دا ءوزىن اقتاپ تۇر. ايتپەسە، ايدالاداعى انۋار قالىموۆتى اۋىلدان كىم تانيدى؟ ەشكىم. مۇنى ءبىر دەپ قويىڭىز. بۇل جەردە بوتەن ادام جالعىز ا.شاۋەنوۆ بولىپ تۇر. وبالى نە كەرەك، ونى سايلاۋدان الاستاۋ ءۇشىن قۇجاتىڭ دۇرىس ەمەس دەپ، بيلىك بۇتاعىنداعى بەلگىلى ادامدار جەكە شىعارىپ الىپ تا ءبىراز اۋرەلەدى. ونىسىنان ەش ناتيجە بولمادى. سايلاۋعا ساناۋلى كۇندەر قالعاندا انۋار قالىموۆ پەن انەت كەمەجانوۆ ءوز كانديداتۋرالارىن سايلاۋدان الىپ تاستادى. نەگە؟ ويتكەنى وزدەرىنىڭ كوزدەگەن ادامىنا داۋىس ءبولىنىپ كەتىپ، دىمسىز قالۋى مۇمكىن. نەگىزگى ايقاس – نۇرالى دجۋماەۆ پەن اسىلجان شاۋەنوۆتىڭ اراسىندا بولۋى كەرەك. سوندا داۋىس ۇرلاۋ وڭاي، ءارى جەڭىل بولادى. مۇنى ەكى دەپ قويىڭىز. ال ايبەك جانگەلدينگە بەرىلگەن داۋىس ەشتەڭە شەشپەيدى دەگەن بولۋى كەرەك، قوساق اراسىندا قالدىرىلدى. ءبىز بۇعان سايلاۋ بارىسىندا كوز جەتكىزدىك.

بۇرىن سايلاۋدىڭ مۇنداي قىزىعى مەن شىجىعىن كورمەگەن ماعان ءبارى تاڭسىق، ءارى وعاش بولىپ كورىندى. جۋرناليستىك جۇمىس بارىسىندا سايلاۋ تۋرالى كوميسسيا بەرگەن مالىمەتتەردى عانا پايدالانىپ، سولار بەرگەن اقپارعا كامىل سەنىپ كەلىپپىز. ونىمەن قويماي، سايلاۋدىڭ ءادىل، ادال وتەتىندىگىن  باسپاسوزبەن تەلەارنالاردا تىنباي جارنامالاپپىز. بىرەن-ساران نارازىلار بولسا، ولارعا ۇركە قاراپ، «ايكاپىر» اتتاندىرىپپىز. شىن مانىندە سايلاۋدىڭ  ىشكى سىرىنا مۇلدەم ۇڭىلمەيدى ەكەنبىز. ەندى بارماق تىستەپ وتىرمىز. ازعانتاي بيلىك ءۇشىن سونشالىقتى تومەن قۇلدىراپ، ار-ۇياتتان جۇرداي، قۇلدىق سانامەن ازعىنداعانىمىزعا سەنگىم كەلمەدى.

سويتسەك، بۇل «قىزىقتىڭ» باسى ەكەن. سونىمەن وتكەن جەكسەنبى كۇنى باسقۇدىق اۋىلىنىڭ №14 مەكتەبىندە ورنالاسقان 260 سايلاۋ ۋچاسكەسىنە بەت الدىم. كەلە سالا تورايىممەن كەلىسپەي قالدىق. ءبىر سايلاۋ ۋچاسكەسىندە ءبىر عانا سەنىمدى وكىل بولۋى كەرەك ەكەن. ءبىز ەكەۋمىز. بىلاي قاراساڭ، تۇككە تۇرمايتىن نارسە. اۋداندىق سايلاۋ كوميسسياسىنىڭ توراعاسى ب.سۇلەيمەنوۆكە جۇگىندىك. زاڭدا سولاي كورسەتىلگەن دەيدى. سوندا ول كىسى ءار سايلاۋ ۋچاسكەسىنە 2 سەنىمدى وكىلدەن نەگە ءوز قولىمەن بەكىتىپ بەردى؟ تۇسىنىكسىز. مەنىڭشە، ساعاتتاپ جالعىز وتىرعان ادام اجەتحاناعا بارادى، قالعىپ كەتىپ قىراعىلىعىن جوعالتۋى دا مۇمكىن. بۇل دا كەرەك ادامعا ۇرىمتال ءسات. بارماعىڭىزدى بۇگىپ ءۇش دەڭىز.

ءتورتىنشى – بارلىق سايلاۋدا «كارۋسەل» دەگەن بار ەكەن. ياعني ۇمىتكەر ءوزىنىڭ ادامدارىن ءبىر نەمەسە بىرنەشە كولىككە تيەپ الىپ، بارلىق سايلاۋ ۋچاسكەلەرىن اينالدىرىپ، داۋىس بەرگىزىپ شىعادى. تىزىمدە بولماسا، قوسىمشا ءتىزىم جاساتادى. بۇل جاعداي وسى سايلاۋدا دا بولدى. سەنىمدە وكىلدەر ولاردى سۋرەتكە ءتۇسىرىپ الىپ، قانشا دابىل قاقسا دا جاۋاپتى ادامدار سەلت ەتپەدى.

سونىمەن ساعات كەشكى 20.00. مەن باقىلاۋشى بولعان №260 سايلاۋ ۋچاسكەسىندەگى 1235 سايلاۋشىنىڭ تەك 105-ءى عانا داۋىس بەرىپتى. جاشىكتەگى بليۋتەننىڭ 4-ءى جارامسىز. ن.دجۇماەۆ – 71, ا.شاۋەنوۆ – 29, ا.جانگەلدين – 1 داۋىس الىپتى.  بىراق اياق استىنان داۋ شىقتى. داۋدىڭ باسى – داۋىس ۇرلاۋدان باستالدى.

مۇرات جەتەكباي – «مۇنايلى » اۋداندىق گازەتىنىڭ رەداكتورى:

-ءبىزدىڭ ەلدەگى قاي دەڭگەيدەگى سايلاۋ بولسىن داۋ-دامايسىز بىتپەيتىنىن ءبارىمىز دە بىلەمىز. ويتكەنى، ادىلەتسىزدىككە، كوزاپارا زاڭبۇزۋشىلىققا جول بەرىلەدى، حالىقتىڭ قۇقى تاپتالادى. اقيقاتىن ايتساق، قازاق حالقى سوڭعى رەت قاشان ادىلەتتى سايلاۋ وتكەنىن ۇمىتىپ قالۋعا اينالدى. شىرىلداعان شىندىعى سول.

باسقاسى باسقا، ءوزىمىز سەنىمدى وكىل رەتىندە باقىلاۋشى بولىپ قاتىسقان، كەشەگى جەكسەنبىدە وتكەن باسقۇدىق اۋىلى اكىمىنىڭ سايلاۋىن ءسوز ەتەيىن. مەكتەپكە جەتكەنگە دەيىنگى ءاسفالتسىز تالقانى شىققان تار جولدىڭ ماشاقاتى بولەك اڭگىمە. ىشتەي «حالىق سايلاعان اكىم وسى جولدى جوندەۋدەن باستاسا عوي جۇمىسىن» دەپ قيالداپ كەلەمىن...

تاڭعى التىدا باسقۇدىقتاعى №16 مەكتەپتە ورنالاسقان №245 سايلاۋ ۋچاسكەسىنىڭ الدىندا تۇردىم. ىشكە كىرىپ، زاڭعا سايكەس حاتشىعا اكىمدىكتەن ۇمىتكەر اسىلجان شاۋەنوۆتىڭ سەنىمدى وكىلى رەتىندە تىركەلدىم. ۋچاسكەلىك كوميسسيا توراعاسى انار تۋلياەۆامەن تانىسىپ، سايلاۋدى ءادىل وتكىزۋ، زاڭبۇزۋشىلىقتار جاساماۋ تۋرالى ءبىر اۋىز ەسكەرتۋىمدى ايتتىم. ۋچاسكەدەگى سايلاۋشىلاردىڭ جالپى سانى 2509 ادام ەكەن.

ساعات تاڭعى جەتىدە ءانۇران ورىندالىپ، سايلاۋ ۋچاسكەسى اشىلدى. ساعات ون بىرگە دەيىن وتىز ءۇش  ادام داۋىس بەردى... كەشكى سەگىزگە دەيىن بارلىعى 93 ادام بيۋللەتەن الىپ، داۋىس بەرگەنى سەنىمدى وكىلدەردىڭ فوتوبەينەتۇسىرىلىمى ارقىلى انىقتالدى.

قىزىقتىڭ كوكەسى داۋىستى ساناۋ كەزىندە بولدى! باقىلاۋشىدان كوز تاسا قىلىپ كوميسسيا قۇرامىنداعى ءتورت جىگىت بيۋللەتەندەر سالىنعان جاشىكتى يىق تىرەسىپ تۇرىپ ستولدىڭ ۇستىنە توكتى. قاعازداردىڭ ءبىر بولەگى لىقسىپ جەرگە توگىلدى. ءدال وسى جەردە بۇكتەلمەگەن، سىتىرلاعان بۋما اقشا سەكىلدى جاڭا بيۋللەتەندەر توپقا قوسىلدى دەپ كۇماندانامىز. ابدەن ۇيرەتىلگەن اككى جىگىتتەر ءبارىن جىمىن بىلدىرمەي جاسادى. سودان ساناپ كەلىپ كەتسە، 230 ادام داۋىس بەرىپتى! سوندا، سايلاۋعا مۇلدەم كەلمەگەن، ءبىز كورمەگەن 137 ادام اسپاننان ءتۇستى مە، جەردەن شىقتى ما؟ ونداي بولسا بەينەكامەراعا تۇسەر ەدى. جوق! حاتتاما سولاي تولتىرىلدى: ۇمىتكەر ن.دجۋماەۆ – 176 داۋىس، ۇمىتكەر ا.شاۋەنوۆ – 48 داۋىس! ءۇشىنشى ۇمىتكەرگە ءبىر داۋىس تا بەرىلمەگەن.

ارينە، ادىلەتسىزدىكتىڭ ارتى نارازىلىققا ۇلاسادى. تۇندە، ساعات 12-گە جاقىن اۋداندىق سايلاۋ كوميسسياسىنىڭ توراعاسى ب.سۇلەيمەنوۆكە ارىزىمدى جازىپ تاپسىرىپ، كوشىرمەسىن بەلگى سوقتىرىپ الدىم. ءبىزدىڭ قولدان كەلگەنى سول بولدى. ا.شاۋەنوۆتىڭ سەنىمدى وكىلدەرى، باقىلاۋشىلارى مەن جاقتاستارى اۋداندىق سايلاۋ كوميسسياسى ورنالاسقان اۋداندىق مادەنيەت ءۇيى الدىنا جينالىپ، نارازىلىعىن ءبىلدىردى، بەينەۇندەۋ جاسادى.

ەگەر، ءبىزدىڭ ءسوزىمىز جالعان بولدى، جالا جاپتى دەسە، سايلاۋ كوميسسياسى 137 ادامنىڭ كىمدەر ەكەنىن فوتوبەينەتۇسىرىلىم ارقىلى دالەلدەۋى كەرەك. ول ءۇشىن سول كۇنى ىشىندە ەكى سايلاۋ ۋچاسكەسى جۇمىس جاساعان مەكتەپتىڭ سىرتىنداعى، ىشىندەگى بەينەباقىلاۋ كامەرالارىن (ەگەر ىستەيتىن بولسا) تەكسەرسە جەتىپ جاتىر. زاڭ، قۇقىققورعاۋ ورىندارى بۇل جاعدايدى مۇقيات تەرگەپ، تەكسەرىپ، زاڭسىزدىققا جول بەرگەن كوميسسيا توراعاسى مەن مۇشەلەرىن ءتيىستى جاۋاپكەرشىلىككە تارتادى، سايلاۋ ناتيجەسىن قايتا قارايدى دەگەن سەنىمدەمىز.

وسىلاي، «سيقىرشى» سايلاۋ كوميسسياسىنىڭ قيتۇرقىلىعىمەن جوقتان پايدا بولعان داۋىستار ارقىلى سايلاۋدا زاڭسىزدىققا جول بەرىلدى، ەسكى قازاقستاننىڭ ەلدى تۇڭىلتكەن ەسكى ادەتى تاعى قولدانىلدى. حالىقتىڭ سەنىمى ۇرلاندى، ۇمىتكەرگە قيانات جاسالدى دەپ سانايمىز.

مەملەكەت باسشىسى ەلگە ۇران ەتىپ جولداعان ادىلەتتى قازاقستاندى قۇرۋ ءۇشىن سايلاۋلار ءادىل، اشىق باسەكەلەستىكتە ءوتۋى كەرەك!

نۇرلان قارامىرزا – قوعام بەلسەندىسى، سەنىمدى وكىل

-ەڭ ءبىرىنشى سوراقىلىق – سايلاۋ كوميسسياسىن اكىم-قارالار وزدەرى تاعايىنداپ، ولارمەن الدىن الا  «تۇسىنىك» جۇمىستارىن جۇرگىزىپ، كىم سايلاناتىنىن بەلگىلەپ  قويادى. الدىمەن وسىنى جويۋ كەرەك. كوميسسيا مۇشەلەرىن حالىقتىڭ ىشىنەن، بەلسەندىلەردىڭ اراسىنان الۋ كەرەك. ءبىز وسى ۇسىنىستى سايلاۋ باستالماستان بۇرىن مۇنايلى اۋداندىق سايلاۋ كوميسسياسىنىڭ توراعاسى بەيىمبەت سۇلەيمەنوۆكە كىرىپ ايتتىق. الايدا، ول كىسى بۇلاي بولمايدى، كوميسسيا مۇشەلەرى جوعارىدان تاعايىندالادى دەدى، دەمەك سايلاۋ تۋرالى ەلىمىزدىڭ زاڭى بيلىكتىڭ ىڭعايىنا قاراي جاسالادى دەپ وي تۇيۋگە ابدەن بولادى.

بۇدان كەيىن قانشاما ۇگىت-ناسيحات جۇمىسىن جۇرگىزە بەر، باقىلاۋشىلار مەن سەنىمدى وكىلدەر مىڭ جەردەن سايلاۋدىڭ ءادىل ءوتۋىن قاداعالاسىن، ناتيجە ءنول، بار پايدا بيلىك جاعىندا بولادى.  بيلىك تاعايىنداعان كوميسسيا مۇشەلەرى كوزىڭدى باقىرايتىپ قويىپ، زاڭسىز ءىس-ارەكەتتەرگە باراتىنى سوندىقتان، كوز الدىڭدا كوزگە كورىنبەيتىن قىلمىستار جاسالىپ جاتادى. قارسى شىعىپ كور، ۋچاسكەلىك ينسپەكتور شاقىرادى، حاتتاما تولتىرادى، كەرەك دەسەڭ، سەنى سىرتقا شىعارىپ تا جىبەرەدى. قىسقاسى بيلىك بەرىپ قويعان بارلىق قۇزىرەتتى پايدالانادى. بۇل ەندى ايداي اقيقات!

وسىنىڭ بارىنە پروكۋراتۋرا كوز جۇما قارايدى؟ سەبەبى ولار ءبىر شاينەكتەن ءشاي ءىشىپ وتىرعان ادامدار. وعان ءبىز تالاي مارتە كوز جەتكىزدىك. مەنىڭ ۇسىنىسىم – كوميسسيا مۇشەلەرىن حالىق تاعايىنداسىن، سوندا عانا ءبىر ناتيجە بولۋى مۇمكىن.

سونىمەن مۇنايلى اۋداندىق سايلاۋ كوميسسياسىنىڭ توراعاسى ب. سۇلەيمەنوۆ وزىنە ءتۇن ىشىندە كەلگەن سەنىمدى وكىلدەر مەن بەلسەندى توپتاردى بارلىق ماسەلەنى سايلاۋ تۋرالى زاڭ اياسىندا شەشەمىز دەپ، ارىزدارىن قابىلداپ، جىللى شىعارىپ سالدى. بىراق، نارازى توپ مۇنىمەن توقتامادى. اۋدان اكىمى ە.كۇمىسقاليەۆقا كىرىپ، بولعان ءمان-جايدى باياندادى. وبلىستىق سايلاۋ كوميسسياسىنىڭ توراعاسى ە.ابىلەۆكە دە ارىز حات جازىلىپ، ورىن العان ولقىلىقتار ايتىلدى. ناتيجەسىندە، سايلاۋ شەشىمىن شىعارۋ بىرنەشە كۇنگە كەيىن شەگەرىلدى.

ءبىز بۇل سايلاۋدان جۋرناليست رەتىندە ويىمىزعا نە تۇيدىك؟ بىرىنشىدەن، كەز كەلگەن دارەجەدەگى سايلاۋدىڭ ءادىل، اشىق، ءارى ادال وتۋىنە پرەزيدەنتىمىزدىڭ ءوزى كەپىلدىك بەرىپ وتىرعاندىعىنا جەرگىلىكتى بيلىكتىڭ پىسقىرمايتىندىعىن، ونى قولدان كەلگەنشە جەمقورلىقتىڭ كوزىنە اينالدىرىپ العاندىعىن بىلدىك. دەمەك، ەلىمىزدىڭ سايلاۋ تۋرالى زاڭى ابدەن ەسكىرگەن، بۇگىنگى كۇن تالابىنا جاۋاپ بەرە المايدى. زاڭدى جەدەل جاڭعىرتىپ، ەلەكتروندى تۇرگە كوشىرۋ قاجەت. اۋىل اكىمىن سايلاۋدا وسىنشاما زاڭسىزدىقتارعا جول بەرىلدى، قيتۇرقى امال-ايلالارعا كۋا بولدىق. ال الدا اۋدان، وبلىس اكىمدەرىن سايلاۋ كەلە جاتىر، وندا قايتەمىز؟!

ەكىنشى، باسقۇدىق اۋىلى اكىمىن سايلاۋدا داۋىس بەرۋگە قۇقىلى 16 مىڭ سايلاۋشىنىڭ 1 پايىزعا جەتەر جەتپەسى داۋىس بەردى، ونىڭ ءوزى ۇرلانىپ، جىرىم جىرىم بولدى. دەمەك، جەرگىلىكتى بيلىك سايلاۋ وتكىزۋگە سۇلەسوق قاراعان، حالىقتى سايلاۋعا قاتىسۋعا شاقىرماعان. باق قۇرالدارىندا جانە بەلگىلەنگەن جەرلەردە ۇگىت-ناسيحات جۇمىستارىن جۇرگىزبەگەن. مەملەكەتتىڭ حالىقتىڭ ءال-اۋقاتىن كوتەرمىز، ول ءۇشىن بىلىكتى دە ءبىلىمدى، ءىستىڭ كوزىن بىلەتىن كادرلاردى حالىقتىڭ ىشىنەن سايلايمىز، جاستاردى باسەكەگە قابىلەتتى بولۋعا تاربيەلەيمىز دەگەن ءسوزى قايدا؟  الدە الدەبىر ۇيىمداسقان توپ وبلىس باسشىسىنىڭ، ودان ءارى قر پرەزيدەنتى ساياساتىنا سابوتاج جاساپ وتىر ما؟!

ول جاعىن انىقتاۋدى قۇقىق قورعاۋ ورىندارىنا تاپسىرايىق.

ساعىندىق رزاحمەتوۆ

Abai.kz