مەملەكەت باسشىسى اباي وبلىسىنا ارنايى بارىپ، جاعدايدى ءوز كوزىمەن كورگەنىن بۇعان دەيىن بايان ەتتىك. پرەزيدەنت ۇكىمەتتى سىنعا الىپ، وبلىس اكىمىنە سوگىس جاريالاعان. بۇدان شىققان قورىتىندى قانداي؟ اقشەيىت كەتكەن بەيبىت كۇننىڭ باتىرلارىنىڭ وتباسىنا قانداي جاردەم كورسەتىلمەك؟

11-ماۋسىم كۇنى كەشكە جەل تۇرىپ، ءورتتىڭ ءورشي باستاعانى حابارلانعان، ايماق باسشىلىعى ءورتتى ءسوندىرۋ جانە ونىڭ زارداپتارىمەن كۇرەسۋ جۇمىستارىن قالاي جۇرگىزىپ جاتىر؟ اباي وبلىسى اكىمدىگىنىڭ ءباسپاسوز قىزمەتىنىڭ مالىمەتىنشە،  تومەندەگىدەي جۇمىستار اتقارىلىپ جاتىر ەكەن.

12 ماۋسىمدا، قر پرەمەر-ءمينيسترى ءاليحان سمايىلوۆ اباي وبلىسىنداعى ءىرى تابيعي ءورتتى جويۋ جانە ودان زارداپ شەككەن وتباسىلارعا قاجەتتى قولداۋ شارالارىن كورسەتۋ ماسەلەلەرى جونىندە جەدەل كەڭەس وتكىزدى. كەڭەس توتەنشە جاعداي كەزىندە قازا تاپقانداردى ءبىر مينۋت ۇنسىزدىكپەن ەسكە الۋدان باستالدى.

توتەنشە جاعدايلار ءمينيسترى سىرىم ءشارىپحانوۆتىڭ بايانداۋىنشا، 11 ماۋسىم كۇنى كەشكە جەل ەكپىنى سەكۋندىنا 18 مەترگە دەيىن جەتىپ، ءورت نەگىزگى وشاقتان وڭتۇستىك باعىتتا تارالعان. اتاپ ايتقاندا، تاليتسا اۋىلىنا قاراي قالىڭ ءتۇتىن ءجۇرىپ، ورماننىڭ تومەنگى جاعى ورتەنگەن. ەلدى مەكەندى قورعاۋ ءۇشىن ءورت ءسوندىرۋ تەحنيكاسى جەدەل ىسكە قوسىلىپ، ناتيجەسىندە ءتىلسىز جاۋ اۋىزدىقتالدى. ءورتتى ءسوندىرۋ جۇمىستارى ءۇش باعىتتا ءجۇردى: وڭتۇستىك، باتىس جانە سولتۇستىك-شىعىس. وسىنىڭ ارقاسىندا نەگىزگى وشاق ءىس جۇزىندە قورشاۋعا الىندى.

ءاليحان سمايىلوۆ 10 كۇن ىشىندە وقيعانىڭ بارلىق ءمان-جايىن انىقتاپ، ءتيىستى قورىتىندى جاساۋدى تاپسىردى.

وعان قوسا مەملەكەت باسشىسىنىڭ اباي وبلىسىنداعى جەدەل شتاب وتىرىسىندا بەرگەن تاپسىرمالارىن ورىنداۋ ءۇشىن قازا تاپقانداردىڭ وتباسىلارىنا «قازاقستان حالقىنا» قورىنان 7 ملن تەڭگەدەن، سونداي-اق كامەلەتكە تولماعان ءار بالاعا 2 ملن تەڭگەدەن تولەنەتىن بولادى.

سونىمەن قاتار 40-تان استام قازاقستاندىق جوو ورتتەن زارداپ شەككەن وتباسىلاردىڭ ستۋدەنتتەرىنە گرانتتار مەن جاتاقحانادان ورىن بەرۋگە دايىن. وعان قوسا اقىلى نەگىزدە وقيتىن ستۋدەنتتەر مەن ماگيسترانتتاردى گرانتقا اۋىستىرۋ كوزدەلگەن.

كەڭەستە اباي وبلىسىنىڭ اكىمى نۇرلان ۇرانحاەۆ قابىلدانىپ جاتقان شارالار جونىندە بايانداما جاسادى.

بۇگىن وبلىس اكىمدىگىنىڭ ءباسپاسوز قىزمەتى ءورتتى سوندىرۋگە تجم، ورمان شارۋاشىلىعى كوميتەتىنەن، جاو جانە قورعانىس مينيسترلىگىنەن 1 800-دەن استام ادام، 350-گە جۋىق بىرلىك تەحنيكا جۇمىلدىرىلعانىن حابارلادى.

«كەشە ءورت وشاقتارىنا اۋەدەن 546 رەت كولەمى 1 500 استام توننا سۋ توگىلدى. ءورتتى ءسوندىرۋ جۇمىستارى باستالعالى بەرى ءورت وشاقتارىنا اۋەدەن 1323 رەت جالپى كولەمى 4000 تونناعا جۋىق سۋ توگىلدى»، – دەپ جازىلعان حابارلامادا.

تەحنيكانى وتىنمەن قامتاماسىز ەتۋ ءۇشىن اكىمدىك 20 توننا ججم جىبەردى، تاعى 50 توننا Kaz Minerals كومپانياسى ەسەبىنەن قامتاماسىز ەتىلەدى.

قازىرگى ۋاقىتتا بۇلاق، تاليتسا، پولوۆينكي ەلدى مەكەندەرى ەۆاكۋاتسيالاندى (463 ادام). كوشىرۋ ورىندارىندا پوليتسيا قىزمەتكەرلەرىنىڭ كەزەكشىلىگى ۇيىمداستىرىلدى. تۇرعىندار سەمەي قالاسى مەن بورودۋليحا اۋىلىنىڭ ەۆاكۋاتسيالىق پۋنكتتەرىندە ورنالاستىرىلدى. ءورت سوندىرۋگە تارتىلعان جانە ەۆاكۋاتسيالانعان ازاماتتار ءۇشىن  ازىق-تۇلىك جەتكىزىلىپ جاتىر.

جوعالعان تراكتورشى س. ارحيپوۆتى ىزدەۋ جالعاسۋدا. پوليتسيا قىزمەتكەرلەرى ونىڭ ورنالاسقان جەرىن انىقتاۋ بويىنشا جۇمىس جۇرگىزۋدە.

بۇعان قوسا، زارداپ شەككەندەرگە كومەك كورسەتۋ جانە ءورت سالدارىن جويۋ ءۇشىن ارنايى «اق ەرتىس» قايىرىمدىلىق قورىندا شوت قۇرىلدى.

سونىمەن قاتار، اتالعان ءباسپاسوز قىزمەتى الەۋمەتتىك جەلىلەردە قاتتى ءورت جالىنىنىڭ كادرلارى تارالىپ جاتقانىن، بىراق قازىرگى ۋاقىتتا وبلىستىڭ ەلدى مەكەندەرىنە قاۋىپ ءتونىپ تۇرعان جوق ەكەنىن ايتتى.

Abai.kz