ءبىزدىڭ سايتتا «اق جول» فراكتسياسى دەپۋتاتتارىنىڭ «قازاق مەكتەپتەرىنە قيانات جالعاسا بەرە مە؟» دەگەن قر وقۋ-اعارتۋ ءمينيسترى ع.بەيسەنباەۆقا جانە شىعىس قازاقستان وبلىسى اكىمى د.احمەتوۆكە ارزۋ ساۋالى جاريا بولدى. 

بىراق، ءبىزدى سايلاۋشى رەتىندە كوپتەن بەرى ماجىلىستە كەلە جاتقان پارتيانىڭ وكىلدەرىنىڭ «ارالاس مەكتەپكە» قاتىستى زاڭ جوباسىن ۇسىنباۋى قالاي دەگەن وي مازالايدى.

جالپى ارالاس مەكتەپ دەگەندە كوپشىلىكتىڭ ويىندا «ءبىرى – ورىس، ءبىرى – قازاق تىلىندە وقيتىن وقۋشىلاردىڭ ءبىر مەكتەپتە وقۋى» دەگەن شولاق تۇسىنىك قالىپتاسقان. ءبىز، قازاق ءتىلدى سايلاۋشىلار، مالاي ەلىنىڭ تۇرعىندارىنىڭ 50 پايىزىن قۇراعان قىتاي مەن ۇندىلەردىڭ انا تىلىندە ءبىلىم بەرەتىن مەكتەپتەرىن جاپپاي جاپقان تاجىريبەسىن قولدانۋدى تالاپ ەتپەيمىز. تەك قازىرگى قوعامدى قاققا جارىپ، ءبىر وتباسىنداعى بالالاردىڭ ءبىرى – ورىس، ءبىرى – قازاق تىلىندە ءبىلىم الىپ جاتقان ءۇردىستى دوعارۋدى پارلامەنتتە وتىرعاندار قولعا السا ەكەن دەگەن وي.

ءبىزدىڭ سايت «ارالاس مەكتەپكە» قاتىستى تالاي ماتەريال جازدى. سونىمەن جۇرتتى ساندالتقان، ءتۇرلى پىكىر ايتقىزىپ، قوعامدى قاققا جارعان، وتباسىلاردى ويران ەتىپ، بالا تاعدىرىن تالكەككە اينالدىرىپ وتىرعان «ارالاس مەكتەپ» دەگەن نە پالە!؟

ارالاس مەكتەپ دەگەنىمىز – قازىرگى ورىس تىلىندە ءبىلىم بەرىپ، شاكىرت تاربيەلەپ جاتقان مەكتەپتەردىڭ مۇمكىندىگىن ەسكەرە وتىرىپ، 70, 50 جانە 30 پايىز پاندەردىڭ تەك قازاق تىلىندە وقىتاتىن ءبىلىم وشاعى. وسى كوشۋ ارقىلى ءبىرتۇتاس ۇلتقا اينالامىز. وسىنى «اق جول» فراكتسياسى دەپۋتاتتارى قولعا الىپ، قر وقۋ-اعارتۋ ءمينيسترى ع.بەيسەنباەۆپەن تىزە قوسىپ ەلىمىزدەگى ورىس ءتىلدى ەتنيكالىق توپتاردى تيتۋلدى ۇلتتىڭ ماڭىنا توپتاستىراتىن «ارالاس مەكتەپ» كونتسەپتسياسىن ومىرگە اكەلىپ، ونى زاڭمەن بەكىتسە دەگەن تىلەگىمىز بار.

ال، قازىرگى ورىس ءتىلدى مەكتەپتەردەگى قازاق ءتىلىن وقىتۋ بارىپ تۇرعان كوزبوياۋشىلىق بولسا، ورىس ءتىلدى مەكتەپتىڭ جانىنان قوسانجارلاسىپ قازاق سىنىپتارىن اشۋ ۇلتقا جانى اشىماۋدىڭ ايقىن بەلگىسى عانا.

ورىس ءتىلدى مەكتەپتەردى ارالاس مەكتەپكە اينالدىرۋ سىزدەردىڭ قولدارىڭىزدا دەپۋتات مىرزالار! قازاق ءتىلدى سايلاۋشىلارىڭىز سىزدەن وسىنى تىلەيدى، ايتپەسە، مەكتەپتەگى ءتىل ءۇشىن قانتوگىس بولعان 1969 جىلعى مالاي ەلىندەگى قاقتىعىس بىزدە دە ورىن الۋى ىتيمال ەمەس، ابدەن مۇمكىن...

ءابىل-سەرىك الىاكبار

Abai.kz