كەشەگى كۇن ايگىلى ءشامشى قالداياقوۆتىڭ تۋعان كۇنى. 93 جىل بۇرىن (1930-1992) بەلگىلى كومپوزيتور، قازاقستاننىڭ حالىق ءارتىسى، قازاقستان رەسپۋبليكاسى ءانۇرانىنىڭ اۆتورى ءشامشى قالداياقوۆ دۇنيەگە كەلدى.

2006 جىلى 7 قاڭتاردا ەل پرەزيدەنتىنىڭ ارنايى جارلىعىمەن ءشامشى قالداياقوۆتىڭ «مەنىڭ قازاقستانىم – قازاقستانىم» ءانى قازاقستاننىڭ مەملەكەتتىك ءانۇرانىنا اينالدى. ەستەلىكتەرگە سۇيەنسەك، قالداياقوۆ بۇل ءاندى 1959 جىلى جازعان.

وتكەن عاسىردىڭ 50-جىلدارىنىڭ ورتاسىندا قازاقستاندا تىڭ جانە تىڭايعان جەرلەردى يگەرۋ باستالىپ، بۇرىنعى كەڭەس وداعىنىڭ ەۋروپالىق اۋماعىنان رەسپۋبليكامىزعا «تىڭ يگەرۋشىلەردىڭ» وراسان زور تولقىنى قۇيىلدى. بۇل ساياسات قازاق جەرىن بولشەكتەۋگە، رەسپۋبليكانىڭ ۇلتتىق تۇتاستىعىنا نۇقسان كەلتىرۋگە باعىتتالعان ەدى.

كەڭەس ۇكىمەتىنىڭ باسشىسى حرۋششەۆ كەيىنىرەك قازاقستاننىڭ سولتۇستىك جانە تىڭ ايماقتارىن رسفسر قۇرامىنا قوسۋ ءۇشىن قازاق كسر-ءىن باتىس، تىڭ جانە باسقا اۋماقتارعا ءبولۋ يدەياسىن العا تارتتى. وسىنداي «حرۋششەۆتىڭ ۇلتارالىق ساياساتىن» تۇسىنگەن قازاق حالقىنىڭ پاتريوتتارى اتا-بابالار جەرىنىڭ بىرلىگى مەن تۇتاستىعىن ساقتاۋعا ۇمتىلدى. سوندىقتان دا «مەنىڭ قازاقستانىم» ءانى جازىلعان – بۇل حرۋششەۆتىڭ ۇلت ساياساتىنا قارسىلىق.

بۇل تاماشا پاتريوتتىق ءاننىڭ ءسوزىن جۇمەكەن ناجىمەدەنوۆ جازعان. بۇل ءاننىڭ العاشقى ورىنداۋشىسى حالىقتىڭ سۇيىكتىسى جامال وماروۆا. 1970 جىلدارى رەسپۋبليكالىق راديودان ءجيى بەرىلىپ تۇراتىن. مەنىڭشە، بۇل ءاندى ج.وماروۆادان ارتىق ورىنداعان ەشكىم جوق. وماروۆانىڭ ورىنداۋىنداعى ءان قازاق حالقىنا اللانىڭ ادىلدىگى ورناپ، قازاقتىڭ تۇتاستىعى مەن بىرلىگى، ەل-جۇرتى، جەرى جوعالتپايتىنىنا سەنىم ۇيالاتتى! 1986 جىلى جەلتوقساندا الماتىدا قازاق ستۋدەنتتەرى ءدال وسى ءاندى شىرقاپ، كۇش-قۋات پەن ەرلىك سىيلادى.

قازاقستان تاۋەلسىزدىك العاننان كەيىن جاڭا مەملەكەتتىك انۇرانعا بايقاۋ جاريالادى. قالداياقوۆ پەن ناجىمەدەنوۆتىڭ ءانى دە ءانۇران رەتىندە ۇسىنىلدى. مەملەكەتتىك ءانۇران – ەلىمىزدىڭ مۋزىكالىق-پوەتيكالىق ەلتاڭباسى، ونىڭ ادەبي-مۋزىكالىق تولقۇجاتى. مەملەكەتتىك ءانۇران دا ەلدىڭ ايناسى، پاتريوتتىق رۋحتىڭ كورىنىسى رەتىندە قاراستىرىلۋى كەرەك. ءانۇران قاشاندا ءداۋىر رۋحىنان تۋادى. ونىڭ نەگىزىندە ادامداردىڭ تاعدىرى تۋرالى جالپى سەزىمدەر مەن ادامدار ويلارى جاتىر.

كەرىمسال جۇباتقانوۆ

Abai.kz