1) وتاندى ءسۇيۋ نەدەن باستالادى؟

2) ءدال قازىر ەلىمىزدىڭ يگىلىگى ءۇشىن ءسىز قانداي ۇلەس قوسا الاسىز؟

3) تاۋەلسىزدىك دەگەندى قالاي تۇسىنەسىز؟

4) ەلىمىزدىڭ بولاشاعىن قالاي ەلەستەتەسىز؟

سىزگە ءدال وسىلاي سۇراق قويسا، نە دەپ جاۋاپ بەرەر ەدىڭىز؟ ال ءبىز وقۋشىلاردان سۇراپ كوردىك. «قوقىستى قوقىس جاشىگىنە تاستاۋدىڭ ءوزى وتانىمىزدى جاقسى كورەتىنىمىزدى بىلدىرەدى» دەيدى ولار.

ەلىمىزدىڭ يگىلىگى ءۇشىن ساباعىمدى جاقسى وقيمىن

1) «وتاندى ءسۇيۋ وتباسىنان باستالادى» دەگەن ءسوزدى ءجيى ەستيمىز. دەمەك، ءبىز اتا-انامىزدى قالاي جاقسى كورسەك، ەلىمىز بەن جەرىمىزدى سولاي جاقسى كورۋىمىز كەرەك. ونى ءار ىسىمىزبەن دالەلدەي الامىز. مىسالى، قوقىستى قوقىس جاشىگىنە عانا تاستاۋ، ءار زاتتى كۇتىپ ۇستاۋ، ەلدىگىمىزدى سيپاتتايتىن قۇندىلىقتارعا قۇرمەتپەن قاراۋ سەكىلدى بىزگە ۇساق-تۇيەك بولىپ كورىنەتىن ىستەردىڭ تۇبىندە وتانعا دەگەن ماحاببباتىمىز جاتادى دەپ ويلايمىن.

2) ەل يگىلىگى ءۇشىن تاۋ قوپارىپ، تەڭىز كەشۋدىڭ قاجەتى جوق. اركىم ءوزىنىڭ شاما-شارقى جەتەتىن جۇمىستاردى جاقسى اتقارسا بولعانى. ال مەنىڭ قولىمنان قازىر نە كەلەدى؟ مەن ەلىمىزدىڭ يگىلى ءۇشىن ساباعىمدى جاقسى وقيمىن، قوسىمشا ۇيىرمەلەرگە قاتىسىپ، قابىلەتتەرىمدى شىڭدايمىن، جۇرگەن جەرىمدە تازالىق ساقتاپ، اتا-اناما قولعانات بولامىن. جاسىم ءوسىپ، جۇمىس ىستەۋگە جاراعانىمدا، بۇدان دا گورى ماڭىزدى ىستەرمەن اينالىسامىن دەپ سەنەمىن.

3) تاۋەلسىزدىكتى زاڭنان وزگەگە باعىنباي، قالاعانىڭدى قالاعانىڭشا ىستەۋ دەپ تۇسىنەمىن. كىم نە دەر ەكەن دەمەي، قالاعان جەرىنە بارىپ، كەرەگىن پايدالاناتىن ادامدى تاۋەلسىز ادام دەپ ايتۋعا بولاتىن شىعار.

4) مۇناي تاۋسىلماسا، قازاقستاننىڭ بولاشاعى كەرەمەت بولادى دەپ ويلايمىن. بولاشاقتا كوپ جۇمىستى روبوت ىستەيدى دەپ جانە ءبارى توقپەن جۇمىس ىستەپ، اۋامىز تازا بولادى دەپ ەلەستەتەمىن. كەلەشەكتە ادامدار قولمەن جازۋ جازۋدى قويىپ، بارلىعى پەرنەتاقتامەن باسىلاتىن بولادى. شىنايى كەزدەسۋلەردىڭ ورنىن ونلاين كەزدەسۋلەر باسادى. قازاقستان دامىعان ەل قاتارىندا بولادى.

نازەركە تۋلەپباەۆا،

الماتى قالاسى، №146 مەكتەپ-ليتسەيىنىڭ 6-سىنىپ وقۋشىسى.

وتاندى ءسۇيۋ – اۋەلى، ەت جاقىندارىڭدى جاقسى كورۋ

1) وتان –  مەنىڭ كىندىك قانىم تامعان، تۋىپ وسكەن جەرىم، اكە-شەشەم، اتا-انام، تۋىستارىم، دوستارىم. وتاندى ءسۇيۋ دەگەنىمىز – اۋەلى، وسىنداي ەت جاقىندارىڭدى جاقسى كورۋ دەپ ويلايمىن.

2) مەن قاتارلى بالالار ەلىنىڭ يگىلىگى ءۇشىن، ءبىرىنشى، پاتريوت بولۋى كەرەك دەپ ەسەپتەيمىن. مەنىڭ دە قوساتىن ۇلەسىم سول، ەلىمدى، جەرىمدى، قازاق ءتىلىمدى سۇيەمىن، مۇنى ءاردايىم ايتىپ، دارىپتەپ جۇرەمىن.

3) ءار ەلدىڭ وزىنە ءتان ءتىلى، زاڭى، سالت-ءداستۇرى بولادى. وسى ايتىلعانداردى ەشكىمنەن، ەشتەڭەدەن قورىقپاي ساقتاي السا، سول جولمەن جۇرسە، سونداي ەلدى تاۋەلسىز مەملەكەت دەپ ايتۋعا بولاتىن شىعار. تاۋەلسىز ەل ەشكىمگە قۇل بولمايدى. مەن وسىنداي ەلدە – قازاقستاندا تۇراتىنىمدى ماقتان تۇتامىن.

4) مەن ەلىمنىڭ بولاشاعىن ءبىلىمدى، پاتريوت، جالىندى، رۋحتى جاستارمەن ەلەستەتەمىن. جاستاردىڭ قولىنان ءبارى كەلەتىنىنە سەنەمىن جانە بولاشاقتا ءوزىمدى سول قاتاردان كورەمىن!

ايزەرە كوبەگەن،

ماڭعىستاۋ وبلىسى، بەينەۋ اۋدانى، اقجىگىت سەلوسى، م.بەگەنوۆ اتىنداعى جالپى ءبىلىم بەرەتىن مەكتەپتىڭ 6-سىنىپ وقۋشىسى.

جەمقورلىقتىڭ تامىرىنا بالتا شاپساق، دامۋ جولىمىز جاقسارا تۇسەدى

1) مەنىڭ ويىمشا، وتاندى ءسۇيۋ – وتباسىنان باستاۋ الاتىن جەكە قۇندىلىق. «وتان» ءسوزىن ەستىگەن كەزدە ءبىزدىڭ بويىمىزدا پاتريوتتىق سەزىم تۋلاپ تۇرۋى كەرەك. سول سەبەپتى وتاندى سۇيە ءبىلۋ ءۇشىن ادام، ەڭ ءبىرىنشى، ءوزىنىڭ اينالاسىنداعى ادامدارعا قۇرمەتپەن قاراي ءبىلۋى كەرەك.

2) مەن ەلىمىزدىڭ يگىلىگى ءۇشىن قولىمنان كەلگەننىڭ ءبارىن جاسايمىن. ويتكەنى اتا-بابامىز وسى جەردى قورعاۋ ءۇشىن تەرىن، قانىن توگىپ، جانىن بەردى، ونى ساقتاپ، بىزگە امانات ەتىپ قالدىردى. سوندىقتان وسى مەملەكەتتىڭ ءار تۇرعىنى ەلىمىزدىڭ ءوسىپ-وركەندەۋى جولىندا ەڭبەك ەتۋى كەرەك.

3) تاۋەلسىزدىك دەگەنىمىز – ءوز ەلىمىزدە ەركىن ءجۇرىپ-تۇرۋىمىز، كەرەگىمىزگە قول جەتكىزە الۋىمىز. ارينە، تاۋەلسىزدىك ءسوزىنىڭ ماعىناسى مۇنىمەن عانا شەكتەلمەيدى.

مەنىڭ ويىمشا، قازىرگى قوعام «تاۋەلسىزدىك» ءسوزىنىڭ ماعىناسىن بىلمەيدى. بۇلاي دەيتىن سەبەبىم، ادامدار تۇرمىستاعى زورلىق-زومبىلىققا، باسقا دا قىلمىستارعا توتەپ بەرە الماي جاتىر. ەركىندىك دەگەندى، ءبىر جاعى، قىلمىسقا قارسى تۇرۋ ەركى دەپ تۇسىنسەك تە قاتەلەسپەيمىز دەپ ويلايمىن.

4) ەشكىم ءوز بولاشاعىن باقىتسىز ەلەستەتپەيدى عوي. مەن دە سول، جارقىن ءومىردى عانا كورسەم دەيمىن. قوعامدا بولىپ جاتقان ءتۇرلى دەڭگەيدەگى قىلمىستاردى توقتاتساق، ەلىمىز كوركەيە ءتۇسۋشى ەدى. جاس جۇرەگىممەن سەزەتىن تاعى ءبىر جايت بار: ءبىز جەڭ ۇشىنان جالعاسقان جەمقورلىقتىڭ كەسىرىنەن قارقىندى دامىعان مەملەكەتتەرگە جەتە الماي كەلە جاتقان سەكىلدىمىز. وسىنىڭ سالدارىنان قانشا ادام جاپا شەكتى دەسەڭىزشى. ەگەر وسىناۋ جەمقورلىقتىڭ تامىرىنا بالتا شاپساق، دامۋ جولىمىز جاقسارا تۇسەدى دەپ ويلايمىن.

ابىلاي حاميتۇلى،

تۇركىستان وبلىسى، تۇركىستان قالاسى، № 28 مەكتەپ-ليتسەيدىڭ 8-سىنىپ وقۋشىسى.

قازاقستاننىڭ بولاشاعىنان زور ءۇمىت كۇتەمىن

1) ماعان قىمبات دۇنيەنىڭ بارلىعى – مەنىڭ وتانىم. وتباسىم، اعايىنىم، ەلىم، جەرىم، تابيعات – ءبارى-ءبارى بىرىگىپ، وتان دەگەن جالعىز ۇعىمدى بىلدىرەدى. سولارعا دەگەن سۇيىسپەنشىلىگىم – وتانعا دەگەن ماحابباتىم. بىراق، مۇقاعالي اتامىز ايتپاقشى، «وڭاي ءسوز عوي وتاندى سۇيەم دەگەن...». وتانىن شىن سۇيەتىن ادام وعان لايىق بولۋعا تىرىسادى.

2) ءدال قازىر ەلىمنىڭ وركەندەۋى جولىندا قولىمنان كەلەتىن جانە ەڭ ماڭىزدى مىندەتىم ساپالى ءبىلىم الۋ، ال بولاشاقتا جاقسى مامان بولىپ شىعۋ دەپ بىلەمىن.  قازاق تىلىندە سويلەپ، قازاقشا كينولاردى كورىپ، قازاقشا اندەردى تىڭداپ، قازاق سپورتشىلارىنىڭ جانكۇيەرى بولۋ، وتاندىق ونىمدەردى تۇتىنۋ دا ەلىمنىڭ يگىلىگى ءۇشىن قوسار ۇلەسىم دەپ ويلايمىن.

3) تەرريتورياسى ءبىرتۇتاس، شەكاراسى قورعالعان، ءوزىنىڭ اقشا بىرلىگى بار ەلدى تاۋەلسىز مەملەكەت دەپ اتايدى. تاۋەلسىز مەملەكەت باسقا ەلدەرمەن تەرەزەسى تەڭ، ەگەمەن ساياساتىن جۇرگىزە الادى.

4) قازاقستاننىڭ بولاشاعىنان زور ءۇمىت كۇتەمىن. نەگە دەسەڭىز، جەرىمىز پايدالى قازباعا باي، ەلىمىزدە ءبىلىمدى، تالانتتى جاستار جەتكىلىكتى. جاۋاپتى ادامدار قازاقستاندى گۇلدەندىرۋ ءۇشىن، كوركەيتۋ ءۇشىن بارىن سالىپ جاتىر. شەتەلدەن مەكەمەلەر كەلىپ جاتقانىن دا بىلەمىز. ورتا ازياداعى ەڭ ۇلكەن ەل سانالاتىنىمىزدى مۇعالىمدەرىمىز ايتىپ جاتىر. ەندەشە، كەلەشەگىمىزدىڭ كەمەل بولماعى ءسوزسىز.

نازىم ماراتقىزى،

اقتوبە وبلىسى، اقتوبە قالاسى، م. قۇرمانعاليەۆا اتىنداعى №32 گيمنازيانىڭ 8-سىنىپ وقۋشىسى.

Abai.kz