وسى جىلعى ناۋرىزدا قازاق كسر-عا ورالۋعا شاقىراتىن ۇندەۋىن الەۋمەتتىك جەلىدە جاريالاپ، سولتۇستىك قازاقستان وبلىسىنىڭ ورتالىعى پەتروپاۆلدا «ەڭبەكشى حالىق كەڭەسى» دەگەن توپ قۇرعان ازاماتتار شىققان ەدى. اتالعان مالىمدەمەدەن كەيىن ولاردىڭ ىشىندەگى بىرنەشە مۇشەسى سەپاراتيزمدى ناسيحاتتادى دەگەن كۇدىككە ىلىنگەنىن جاقسى بىلەمىز.

تولىعىراق جازاتىن بولساق، 19 ناۋرىز كۇنى پەتروپاۆلدىڭ 19 تۇرعىنى جەرگىلىكتى كوللەدجدەردىڭ ءبىرىنىڭ عيماراتىنا جينالىپ، قازاقستان رەسپۋبليكاسىنان تاۋەلسىز جۇمىسشىلاردىڭ حالىق كەڭەسىن قۇرعاندىعىن جاريالاعان بولاتىن.

وزدەرى دۇرىس تاپقان دەكلاراتسياسىن قابىلداپ قانا قويماي، ءتۇرلى الەۋمەتتىك جەلىلەردە دە ءوز بەلسەندىلىكتەرىن تانىتىپ، ءاردايىم قازاقستاننىڭ تاۋەلسىزدىگىن جوققا شىعارۋدى ماقسات ەتكەن جازبالاردى جاريالاپ كەلدى.

كەشە، «مىڭ اسقانعا ءبىر توسقان» دەگەندەي 19 ادامنان تۇراتىن وسى توپتىڭ 4 مۇشەسىنە قاتىستى سوت پروتسەسى اياقتالدى. اتالعان «كەڭەستىڭ» قازاقستان ازاماتتارى بولىپ تابىلاتىن ءتورت مۇشەسى سوتقا تارتىلعدى.

اشىنعان حالىق ولاردى سەپاراتيزم ءۇشىن جاۋاپقا تارتۋدى اشىق تالاپ ەتتى. سونىمەن 30 ناۋرىزدا وبلىس پروكۋراتۋراسىنىڭ نۇسقاۋى بويىنشا، ۇلتتىق قاۋىپسىزدىك كوميتەتى سقو دەپارتامەنتىنىڭ، پوليتسيا دەپارتامەنتىنىڭ، ەكونوميكالىق تەرگەۋ دەپارتامەنتىنىڭ، وبلىستىڭ سىبايلاس جەمقورلىققا قارسى قىزمەتى قىزمەتكەرلەرىنەن ۆەدومستۆوارالىق جەدەل-تەرگەۋ توبى قۇرىلىپ، سەپاراتيزم فاكتىسى بويىنشا سوتقا دەيىنگى تەرگەۋدى باستالعان.

وسى توپتاعىلارعا قاتىستى قر قىلمىستىق كودەكستىڭ 180-بابى 2-بولىگى بويىنشا، «قازاقستان رەسپۋبليكاسىنىڭ بىرتۇتاستىعى مەن تۇتاستىعىن ىدىراتۋدى ناسيحاتتاۋ» نەمەسە «وعان جاريا تۇردە بۇقارالىق اقپارات قۇرالدارىن جانە تەلەبايلانىس جەلىلەرىن شاقىرۋ، ماتەريالداردى تاراتۋ» جانە قىلمىستىق كودەكستىڭ 179-بابى بويىنشا، «مەملەكەتتىڭ قاۋىپسىزدىگىن ىدىراتۋدى ۇگىتتەۋ» بويىنشا ايىپتار تاعىلدى. تاپ وسى توپتى ۇيىمداستىرۋشى بولىپ سانالاتىن ۆياچەسلاۆ زۋدەرمانعا بۇعان قوسىمشا، قر قك 287 بابى 3-بولىگى بويىنشا ءىس قوزعالعان ەدى.

سوتتىڭ ۇكىمىمەن توپ سەركەسى ۆياچەسلاۆ زۋدەرمان 9 جىلعا باس بوستاندىعىنان ايىرىلسا, ونىڭ قالعان ءۇش اتقوسشىلارى: ەلەنا بولدىرەۆا، ءمادينا قاپاروۆا جانە ولگا بەرەجنوۆا 7 جىلعا سوتتالدى.

اتالعان تۇلعالار ءوز جازالارىن قىلمىستىق-اتقارۋ جۇيەسىنىڭ ورتاشا قاۋىپسىزدىك مەكەمەسىندە وتەيتىن بولادى.

بۇعان دەيىن تاپ وسىنداي سوت استانا قالاسىندا دا بولىپ، ەلوردا تۇرعىنى ناتاليا سۆيريدەنكو قازاق حالقىنا قورلىق سوزدەر ايتىپ، ولاردى ءبىر-بىرلەرىن ولتىرۋگە شاقىرعانى ءۇشىن 4 جىلعا سوتتالىپ، ءوز سازايىن تارتقان ەدى.

ءبىزدى كۇيىنتەتىنى – ءوز قانداسىمىز ءمادينا قاپاروۆانىڭ جىكشىلدەردىڭ سويىلىن سوققاندىعى. قازاقتىڭ ءوزىنىڭ ۇلتتىق تاۋەلسىزدىگىنە قارسى شىعۋىنىڭ ارتى جاقسىلىق ەمەس.

Abai.kz