وسى ءبىز اڭقاۋلىق پەن پايداكۇنەمدىك، تەگىن نارسەگە قۇمارلىق اۋرۋىنان قاشان قۇتىلار ەكەنبىز؟.. قانشا رەت ماڭدايىمىزعا ءتيىپ جاتسا دا، ودان ساباق المايتىنىمىز قالاي؟

وتكەندە قارجى پيراميداسىن قايتا-قايتا جارنامالاپ، حالىقتى اداستىرىپ، قالتاسىن قامپايتقان ءبىراز ارتىستەر مەن بلوگەرلەر سوتتالىپ ەدى. ەندى ودان ءبىر قورتىندى شىعارا ما دەپ ەدىك... قايدان؟

الماتى وبلىستىق پروكۋراتۋراسىنىڭ حابارلاۋىنا قاراعاندا، ەلىمىزگە بەلگىلى ارتىستەر مەن سپورتشىلار تاعى دا سول اۋەنىنە باسىپتى. بۇل جولى ولار انا "ساۋمال" دەگەن جىلقىنىڭ ءسۇتىن "قانداي دا اۋرۋعا مىڭ دا ءبىر ەم" دەپ، تاعى دا حالىقتىڭ قالتاسىن قاققان. ال شىندىعىندا ول تازا ءدارى ەمەس، تەك بيواكتيۆتى دارۋمەن (ۆيتامين) ەسەبىندە تىركەلگەن. دەمەك، ول ەشبىر اۋرۋدى ەمدەي المايدى، تەك دەنەڭدى سەرگىتىپ، السىرەگەن جانعا قوسىمشا قۋات بەرەدى. تەك قانا سول. مۇنى قازىر كوزى اشىق ەكىنىڭ-ءبىرى بىلەدى. ال اتاقتى انشىلەر مەن سپورتشىلاردىڭ مۇنى بىلمەي قالۋى مۇمكىن بە؟ ءاي، قايدام؟ مۇنىڭ استارىندا ولاردى كۇماندى دۇنيەنى جارنامالاۋعا يتەرمەلەگەن باسقا ءبىر قۇدىرەتتى نارسە شىعار؟.. الدە قازاق ايتپاقشى، "دانىككەننەن قۇنىققان جامان" بولىپ شىقتى ما ەكەن؟

"ەۆرازيا" ارناسىنىڭ ايتۋىنا قاراعاندا، بۇل "جارناماشىلاردىڭ" قاتارىندا ەلىمىزدىڭ سۇيىكتى ءانشىسى روزا رىمباەۆا دا بار كورىنەدى. ەندى وزگەسى-وزگە بۇل كىسىگە نە جورىق؟ نەدەن قيىندىق كورىپ ءجۇر؟ اداسقان جۇرتقا باسۋ ايتىپ، توقتاتۋدىڭ ورنىنا، بۇل نە قىلىعى؟ الدە ءبىز ورناتقان كاپيتاليزم دەگەن قوعامدا ونداي-ونداي بولا بەرەدى مە ەكەن؟ كىم ءبىلىپتى؟ اقشا بيلەگەن زامان عوي.

مۇنى دا از دەسەڭىز، الەمجەلىدە ەرەكشە بەلسەندى، وقىرماندارى مەن جازۋشىلارى دا مول نۇرلان يمام دەگەن اتاعى بار جۇرتقا كەڭىنەن تانىمال ازامات ساۋمالدى جارنامالاۋدا بارىنەن دە اسىپ ءتۇستى. بۇل يمام قازاقستاندى بىلاي قويىپ، سوناۋ قاسيەتتى مەككەگە بارىپ، قولىنا ساۋمالدىڭ قۇتىسىن ۇستاپ تۇرىپ، بۇكىل اراب جۇرتى بۇل سۋسىنعا اسا تاڭ قالىپ، جاپپاي ءىشىپ جاتقاندىعىن حابارلادى. ويپىراي، ءدىن جولىنا تۇسكەندەر دە يماننان بەزگەن بە؟ بۇيتە بەرسە، بارا-بارا "بۇل قاسيەتتى سۋسىندا كەزىندە مۇحاممەد پايعامبار دا ىشكەن" دەپ سوقپاسىنا كىم كەپىل؟

ءبىز بۇعان نە دەيمىز؟ "قۇداي ساقتاسىن" دەگەننەن باسقا ويعا نە كەلەدى؟ ءبىر تورەلىگىن ايتاتىن بىزدەگى ءمۇيىزى قاراعايداي اكدەميك دارىگەرلەرىمىز دە ءۇنسىز.

اتپاقشى، قازاق راديوسى سول ساۋمال جايلى تاعى دا الەمگە جار سالىپ، سامپىلداپ جاتىر.

جايبەرگەن بولاتوۆ

Abai.kz