جالپى، ءبىزدىڭ رەسەيمەن اراداعى رەسمي دوستىعىمىزدا ەشبىر كىنا جوق. نە بولسا دا باس يزەۋدەن تايمايمىز.

قۇلدىق ۇرماساق تا، نارازىلىق نوتا جولداۋ سەكىلدى «ۇساق ەرلىككە» دە بارمايمىز. قىسقاسى، تاتۋ-ءتاتتى كورشىلىككە قىلاۋداي دا داق تۇسىرگەن ەمەسپىز. قاي ۋاقىتتا دا دوستىعىمىزدى پاش ەتۋدە ايانىپ قالعان جوقپىز. قانداي دا باس قوسۋلارىنان قالمايمىز. نەشە ءتۇرلى فورۋمدارى دا ءبىزسىز وتپەيدى.

جاقىندا رەسەي پرەزيدەنتى جولداۋ جولداعان ەدى، دەرەۋ تەلەفون سوعىپ، جىلى پىكىرىمىزدى ءبىلدىرىپ تە قويدىق. ونىڭ الدىندا عانا ءوز پرەزيدەنتىمىز قازان قالاسىندا وتكەن، وزدەرى «بۇل الەمدە ءبىرىنشى رەت بولىپ تۇرعان قۇبىلىس» دەپ داڭعارا سالعان «بولاشاقتىڭ ويىنى» دەگەن ويىنعا دا قاتىسىپ قايتتىق. ءتىپتى «مۇنداي شارانى وزىمىزدە دە وتكىزسەك قايتەدى» دەگەن ۇسىنىس تا ايتىلدى. ارينە، قانشاما ەلدەر قاتىساتىن مۇنداي ويىن بىزگە ارزانعا تۇسپەس. الايدا، كەڭ قولتىق قازاق ەمەسپىز بە، «ساعىنايدىڭ اسىنا شاپپاعاندا، اتامىزدىڭ باسىنا شابامىز با؟». مۇندايدان اياعان اقشانى يت جەسىن.

ءجا، مۇنىمەن نە ايتقىسى كەلىپ وتىر دەمەكسىزدەر عوي. ايتايىن دەگەنىم، ءبىزدىڭ دوستىققا دەگەن اق كوڭىلىمىز بەن شىنايىلىعىمىزدىڭ قۇنى رەسەي ءۇشىن قۇنى كوك تيىن قارا باقىر ەكەن. مۇنىسىن وزدەرى ەش قىمسىنباستان اشىق جاريالاپ وتىر.

جاقىندا كوممۋنيكاتسيانى دامىتۋ جونىندەگى رەسەي ۇلتتىق زەرتتەۋ ينستيتۋتى پوستكەڭەستىك ەلدەردىڭ وزدەرىنە دەگەن دوستىق قارىم-قاتىناستارىن ايقىندايتىن مونيتورينگىن جاريالادى. بۇل زەرتتەۋ 18 ەلدە جۇرگىزىلگەن. راس-وتىرىگىن كىم ءبىلسىن، وعان 400-دەن استام رەسەيلىك جانە شەتەلدىك ساراپشىلار قاتىسقان كورىنەدى. بۇلار ءبارىن اۋدارا-تەكسەرە كەلە، وزدەرىنە دوس دەگەن 10 ەلدى انىقتاعان.

ال ەندى وسىنشاما تىراشتانعان بىزدەر بۇل ءتىزىمنىڭ جوعارعى جاعىندامىز عوي دەسەڭىز، تاعى دا قاتەلەسىز. ءبىز ازەر دەگەندە ازەربايجاننان كەيىنگى 8-ءشى ورىنعا ىلىگىپپىز. ەندى ءبىر-ەكى سەكىرسەك، بۇل تىزىمنەن مۇلدەم شىعىپ قالۋىمىز ابدەن مۇمكىن. بۇل دەگەنىڭىز، رەسەيدىڭ وزدەرىنە جاۋ سانايتىن ەلدەردىڭ قاتارىنا قوسىلىپ كەتۋىمىز وپ-وڭاي دەگەندى ايقىن بىلدىرەدى. ال ونىڭ سالدارىنىڭ نەگە اكەلىپ سوعاتىندىعىن بىلۋگە كوپ اقىلدىڭ قاجەتى شامالى. ۋكراينا، مولدوۆا مەن گرۋزيانىڭ جاعدايى وسىعان ايقىن دالەل.

دەمەك، وزدەرىن وزگەلەردەن جوعارى سانايتىن بۇل كورشىمىز ءۇشىن دوستىق پەن قاستىقتىڭ اراسى ءبىر-اق تۇتام بولىپ شىقتى. قىسقاسى، «ساقتىقتا قورلىق جوق» دەگەن ماقالدى ۇنەمى ەستە ساقتاعان ماقۇل. كەي-كەيدە تىم جالپاقشەشەيلىك تە جاقسىلىققا سوقتىرمايدى.

جايبەرگەن بولاتوۆ

Abai.kz