«اتامەكەن» كەتسە، ونىڭ ورنىنا «پاراسات» كەلەدى...
قر پرەزيدەنتىنىڭ كەڭەسشىسى –
پرەزيدەنتتىڭ ءباسپاسوز حاتشىسى
بەرىك ءۋالي مىرزانىڭ نازارىنا!
قازاقستاننىڭ ۋزۋرپاتسيالانعان مەملەكەت ەكەنى – ەشكىم جوققا شىعارا المايتىن اقيقات!
بۇل ۋزۋرپاتسيالاۋدى ءماجىلىستىڭ V شاقىرىلىمىنىڭ دەپۋتاتتارى ءبىر اۋىزدان قولداپ، سەنات (ول كەزدەگى سەناتىنىڭ توراعاسى قايرات ءمامي بولاتىن) قوس قولىن كوتەرىپ ماقۇلداپ، «قازاقستان رەسپۋبليكاسىنىڭ ۇلتتىق كاسىپكەرلەر پالاتاسى تۋرالى» زاڭى ارقىلى بەكتىپ بەرگەننى دە – بۇكىل الەم بىلەتىن شىندىق!
قازاقستاندى ۋزۋرپاتسيالاعان توپتىڭ باسىندا تيمۋر قۇلىباەۆ پەن كارىم ءماسىموۆ تۇرعانى دا – بۇكىل جۇرتقا بەلگىلى جاعداي!
قاسىم-جومارت توقاەۆ – پرەزيدەنتتىك تاعدىرى ابدەن ۋزۋرپاتسيالاعان مەملەكەتتىڭ ۇستىنە ءدوپ كەلىپ قالعان پرەزيدەنت ەكەنىن دە تۇسىنە بىلگەنىمىز ءجون!
بىراق، قازاقستاننىڭ ۋزۋرپاتسيالانعان مەملەكەت ەكەنى – مەن اشقان «امەريكا» ەمەس.
مەن بىلگەندە، ۋزۋرپاتسيالاۋدىڭ العاشقى بەلگىلەرىن ءبىرىنشى بولىپ، 1994 جىلى جوعارى كەڭەستىڭ تورىنەن كوتەرگەن – مارقۇم شەرحان مۇرتازا ەدى.
ودان كەيىنگى جەردە – 2013 جىلعى قاراشادا «قازاقسىز قازاقستان» اتتى ماقالاسى ارقىلى ونى جەرىنە جەتكىزە وتىرىپ جازعان – جازۋشى مۇحتار ماعاۋين بولاتىن.
ەڭ كەرەمەتى، «قاسىرەتتى قاڭتاردان» كەيىن، پرەزيدەنتىمىز قاسىم-جومارت توقاەۆ وسى اقيقاتتى ءوزى ايتىپ بەردى ەمەس پە؟!
ال، وسى تۇلعالاردىڭ ايتقاندارىنىڭ نەگىزىندە، قازاقستاننىڭ قالاي ۋزۋرپاتسيالانعان مەملەكەتكە اينالعانىن ايتۋ باقىتى بىزگە بۇيىرعان ەكەن، مىنە، «قازاقستان – ۋزۋرپاتسيالانعان مەملەكەت» دەگەن كولەمدى ماقالا جازىپ، وسىدان ءبىر اي بۇرىن جۇرتقا ۇسىندىق.
مەن اتالعان ماقالامدى ءبىر عانا باسىلىمعا ەمەس, «ەگەمەن قازاقستان»، «قازاق ادەبيەتى»، «قازاقستان ءداۋىرى»، «انا ءتىلى»، «تۇركىستان»، «ايقىن»، «جاس الاش»، «دات»، «قالا مەن دالا»، «استانا اقشامى»، «قازاق ءۇنى» سىندى باقانداي ون ءبىر گازەتكە جولدادىم.
سونىڭ ۇشەۋى باسىپتى.
«قازاق ادەبيەتى» جازۋشى مۇحتار ماعاۋيننەن كەلتىرگەن سيتاتامنىڭ ءبارىن قىرقىپ، تاقىرىبىن «ۇكپ – قۇزىرەتى ۇكىمەتتەن جوعارى ۇكىمەتتىك ەمەس ۇيىم» دەپ، وزگەرتىپ جاريالاپتى.
وعان دا ماقۇل دەدىك.
قۇدايعا شۇكىر، قازىر ستالين مەن ماونىڭ زامانى ەمەس قوي. نەگىزى ءار نارسەنى ءوزىنىڭ اتىمەن اتاعان دۇرىس!
«قازاقستان ءداۋىرى» مەن «قالا مەن دالا» گازەتتەرى ءبىر ءسوزىن وزگەرتپەگەن كۇيى بەرىپتى.
ەرمۇرات باپي اعامىز شەتەلدە ءجۇر ەكەن، WhatsApp ارقىلى سويلەپ، «اۋىت، سەنىڭ اناۋ ۋزۋرپاتسيالانعان قازاقستان دەگەنىڭ دۇرىس ەمەس! قازاقستان ۋزۋرپاتسيالانبايدى. ۋزۋرپاتسيالانتىن بيلىك! ول – ساياسي ساۋاتسىزدىق بولادى!» - دەگەن سوڭ، «جارايدى، ەراعا!» - دەپ، ەرامۇرات اعامنىڭ ايتقانى بويىنشا، تاقىرىبىن «قازاقستان – بيلىگى ۋزۋرپاتسيالانعان مەملەكەت» دەپ وزگەرتىپ، ءماتىنىن دە سوعان قاراي بەيىمدەپ، دايىنداپ بەردىم.
بىراق، باس رەداكتور قۇلماعامبەت تالاسبايۇلى «دات»-قا باسپاپتى.
اتتەڭ!
ەگەر، ەرمۇرات اعام دەپۋتات بولماعاندا، بۇل ماقالامدى دا ءبىر ءارىبىن قالدىرماستان ايعايلاتىپ تۇرىپ باساتىن ەدى.
قالعان باسىلىمدار ءۇنسىز كەتتى...
مۇنىڭ ءبارىن نەگە جىپكە تىزگەندەي ەتىپ، بايانداپ وتىرمىن؟!
قازىر «مەملەكەتتىك باسقارۋ جۇيەسىن وزگەرتۋ»، «پارلامەنتتىك باسقارۋ»، «پارلامەنتاريزم» دەسە، ءبىزدىڭ اتقارۋشى بيلىك پەن زاڭ شىعارۋشى ورگان، مەملەكەتتىك باق ات تونىن الا قاشادى. وسى قازاقستاننىڭ ۋزۋرپاتسيالانعانىن مەملەكەت ەكەنىن بىلە تۇرىپ، بىلمەسكە سالىنىپ، جۇرە بەرەدى.
نەگە؟!
قۇلىباەۆتار مەملەكەتتى عانا ەمەس، ءبىزدىڭ سانامىزدى دا ۋزۋرپاتسيالاپ تاستاعان. اتقارۋشى بيلىك پەن زاڭ شىعارۋشى ورگاننىڭ ساناسىن ءتىپتى تۇمشالاپ قويعان...
قىمسەتسە بولدى، مولدالار جۇرتتى توزاقپەن قورقىتادى عوي.
سول سەكىلدى، مەملەكەتتىك باسقارۋ جۇيەسىن تۇبەگەيلى وزگەرتۋ تۋرالى اڭگىمە شىقسا بولدى، ءبىزدىڭ شەنەۋنىكتەر رەسەيمەن ۇرەيلەندىرەتىندى شىعاردى.
دۇرىس، كورشىنى تاڭداي المايسىڭ. رەسەي مەن قىتاي – ەكى الىپ دەرجاۆا ءبىزدىڭ قۇداي قوسقان كورشىمىز. ەكەۋى دە قازاقستاننىڭ ستراتەگيالىق ارىپتەسى. ولارمەن تاتۋ بولۋىمىز كەرەك. «اتا زاڭدا» جازۋلى تۇر، «مەملەكەتتىك بيلىكتىڭ بىردەن-ءبىر باستاۋى – حالىق» - دەپ. ەندەشە، ول تاتۋلىقتىڭ دەڭگەيىن حالىق شەشەدى. باسشىلار، تۇپتەپ كەلگەندە، ەكى حالىقتىڭ اراسىنداعى دانەكەر عانا.
ەگەر، قازاقستان قۇلىباەۆتاردىڭ ۋزۋرپاتسياسىنان قۇتىلىپ، باسقا ءبىر باسقارۋ جۇيەسىنە كوشپەسە، رەسەيدەن الىستاپ قالامىز. ال، رەسەي قازاقستاننان ايىرىلىپ قالۋى مۇمكىن.
سەبەبى، ءبىزدىڭ حالىقتىڭ الەۋمەتتىك، ەكونوميكالىق جاعدايى سىن كوتەرمەي تۇر. كەدەيشىلىك، قىمباتشىلىق، جۇمىسسىزدىق كۇن ساناپ ارتىپ بارادى. ونىڭ زاردابىن قازاقستانداعى ءۇش ميلليوننان استام ورىس دياسپوراسىنىڭ وكىلدەرى دە تارتۋدا...
قازاقستاننىڭ وسىنداي كۇيگە ءتۇسىپ، سەرپىلە الماي وتىرعانىن ءبىزدىڭ جۇرت رەسەيدەن كورەدى. جاسىراتىنى جوق، ۋكراينامەن بولعان سوعىستا رەسەي جەڭىلىپ، ءپۋتيننىڭ كوزى جوعالسا ەكەن دەگەندەردىڭ سانى ءجۇز پايىزعا تاياۋ.
سوسىن، تاعى ءبىر شىندىقتى ايتا كەتپەسەك بولمايدى، كۇنى بۇگىنگە دەيىن ءبىزدىڭ اعا بۋىن مەن اتا بۋىننىڭ ءبىر بولىگى ءالى كەڭەس وداعىن اڭسايدى.
نەگە؟!
كەڭەس وداعى كەزىندە سالىستىرمالى تۇردە قارىن توق، كويلەك كوك بولدى.
ەگەر، ءبىزدىڭ حالىقتىڭ قارىنى تويىپ، قالتاسى قامپايسا، رەسەيىڭمەن جۇمىسى بولماي قالادى.
دەمەك، قازاقستاندى قۇلىباەۆتاردىڭ تۇزاعىنان قۇتىلتىپ، پارلامەنتتىك باسقارۋ جۇيەسىنە كوشىرۋ – ەلىمىزدى رەسەيمەن دە، قىتايمەن دە جاقىنداستىرا تۇسەرى ءسوزسىز.
باسقانى بىلمەسە دە، مۇنى پۋتين جاقسى تۇسىنەدى دەپ ويلايمىن.
ال، ماناعى رەسەيمەن ۇركىتۋشى مىرزالارعا كەلسەك، ولار ناعىز باسەكەگە قاۋقارسىزدار. تەك، تاعايىنداۋدىڭ ارقاسىندا عانا بيلىكتە جۇرگەندەر. ولارعا ءبارى – ءبىر...
ۋزۋرپاتسيالانعان جۇيەنىڭ زاردابىن حالىق بۇل جولعى سۋ تاسقىنى كەزىندە ابدەن تارتتى. جارتى قازاقستان توپان سۋدىڭ استىندا قالدى...
سوڭعى پرەمەر-مينيستر تاعايىندالىپ، جاڭا ۇكىمەت جاساقتالعان كەزدە، پرەزيدەنتىمىز: «قازىر ۇكىمەت ايرىقشا قۇزىرەتكە يە بولدى» - دەدى.
«ءبىز باتىل ارەكەت ەتەتىن ۇكىمەت بولامىز. بىزگە بارلىق مىندەتتەردى شەشۋ ءۇشىن جەتكىلىكتى وكىلەتتىكتەر بەرىلدى» - دەدى، جاڭادان تاعايىندالعان پرەمەر-مينيستر ولجاس بەكتەنوۆ.
وكىنىشكە وراي، سول «ايرىقشا قۇزىرەت» پەن «جەتكىلىكتى وكىلەتتىك» ءبىر جولعى سۋ تاسقىنىنا توتەپ بەرە المادى. جۇرت اۋىلدار مەن قالالاردان باسپاناسىن تاستاپ، قاشىپ شىعۋعا ءماجبۇر بولدى. اكىمدەر مەن قۇزىرلى دەپارتامەنتتەردىڭ قۇرى قول ەكەنى بەلگىلى بولدى. اتقارۋشى بيلىك وتىز جىلدا سالماعان دامبىلاردى حالىق ءوز قولىمەن ءبىر اپتادا قۇم تولتىرىلعان قالاتالارمەن بولسا دا قالاپ شىقتى.
«قۇزىرلى مەكەمەلەر، ياعني اكىمدىكتەر، توتەنشە جاعدايلار مينيسترلىگى، سۋ رەسۋرستارى مينيسترلىگى بىرلەسىپ جۇمىس جاسامايدى. جاۋاپكەرشىلىك الۋدان قاشادى. جۇمىستى ءبىر-بىرىنە سىلتەپ وتىرادى…» - دەدى، قاسىم-جومارت كەمەلۇلى بۇرىننان ايتىپ كەلە جاتقان سوزدەرىن تاعى قايتالاپ.
ارينە، قۇزىرلى مەكەمەلەر مەن اكىمدەر، مينيسترلەر بىرلەسىپ جۇمىس جاسايتىن ەدى، جاۋاپكەرشىلىك الۋدان قاشپايتىن ەدى، جۇمىستى ءبىر-بىرىنە سىلتەپ وتىرمايتىن دا ەدى، بىراق ولاردا قۇزىرەت جوق قوي، قۇزىرەت!
اكىمدەر مەن مينيسترلەردى قويىپ، ۇكىمەتتە ولاردى جونگە سالاتىن، پارلامەنتتە ولاردى باسقاراتىن دۇرىس زاڭ شىعاراتىن جانە ولاردان ەسەپ الاتىن قۇزىرەت جوق!
كورىپ وتىرمىز، سۋ تاسقىنىنا بايلانىستى ەشبىر باسشى زاڭدى جاۋاپكەرشىلىككە تارتىلعان جوق.
دەمەك، ءبىزدىڭ اكىمدەر مەن مينيسترلەردە، وزگە دە جاۋاپتى تۇلعالارعا جاۋاپكەرشىلىك الاتىنداي قۇزىرەت بەرىلمەگەن.
بار قۇزىرەت بىر-اق ادامعا، پرەزيدەنتكە عانا شوعىرلانىپ قالعان. سوندىقتان، بارلىق جاۋاپكەرشىلىك تە بىراق ادامعا – پرەزيدەنتكە بارىپ تىرەلىپ جاتادى....
قۇلىباەۆتار قۇزىرەت ماسەلەسىن وسىلاي شەشىپ قويعان.
اۋىل-شارۋاشىلىعىنا جانە باسقا دا سالاعا قاتىستى جۇمىستىڭ كوبى مينيسترلەر مەن اكىمدەردىڭ قولىمەن ەمەس، الەۋمەتتىك-كاسىپكەرلىك كورپوراتسيالار («سپك» اق) ارقىلى جۇرگىزىلەدى.
مىسالى، اۋىل ازاماتتارى كووپەراتيۆ قۇرىپ، ۇكىمەتتىڭ اۋىل-شارۋاشىلىعىن دامىتۋ ءۇشىن بولگەن قاراجاتىنان يگىلىكتەنەيىن دەسە، ول كووپەراتيۆتىڭ قۇرامىنا وسى الەۋمەتتىك-كاسىپكەرلىك كورپوراتسيا كىرەدى دە، قىرىق توعىز پايىزعا دەيىنگى ۇلەسكە يە بولا كەتەدى. ال، وعان كونبەسەڭ، ەشقانداي يگىلىككە يە بولا المايسىڭ.
كارىم ءماسىموۆ ۇكىمەت باسىنا كەلە سالىپ، 2008 جىلى 30 ماۋسىمداعى №660 قاۋلىسى ارقىلى اتالعان «الەۋمەتتىك-كاسىپكەرلىك كورپوراتسيالار تۋرالى» ارنايى زاڭ جوباسىن جاساپ، ماجىلىسكە ۇسىنىپتى.
قاي پەرىشتە قاقتى ەكەن، ايتەۋىر سول زاڭ جوباسى قابىلدانباي قالىپتى. بىراق، الەۋمەتتىك-كاسىپكەرلىك كورپوراتسيالاردىڭ («سپك» اق) قىزىمەتى «اكتسيونەرلىك قوعامدار تۋرالى»، «مەملەكەتتىك مۇلىك تۋرالى»، «اگروونەركاسىپتىك كەشەندى جانە اۋىلدىق اۋماقتاردى دامىتۋدى مەملەكەتتىك رەتتەۋ تۋرالى» جانە باسقا زاڭدار ارقىلى جۇزەگە اسىرىلۋدا.
نەگە ەكەنىن بىلمەيمىن، ءبىزدىڭ دەپۋتاتتار وسى ۋزۋرپاتسيا ماسەلەسىنە كەلگەندە، جۇمعان اۋىزدارىن اشپايدى. مۇمكىن، ساۋاتتارى جەتپەيتىن شىعار. مۇمكىن، تىستەرى باتپايتىن شىعار...
دۇنيە-مۇلكى تاسقىنعا كەتىپ قينالعاننان نەمەسە تاسقىننان زارداپ شەككەندەرگە جانى اشىعاننان بولسا كەرەك، وسى اپات كەزىندە «شال، كەل!» دەپ، ۇران شاقىرۋشىلار دا بولدى.
سول ۇراننان شوشىعانى سونشالىق، ءماجىلىستىڭ قابىرعالى ەكى دەپۋتاتى قازىبەك يسا مەن ەرمۇرات باپي ارت-ارتىنان ۇندەۋ جاساپ، اتالعان ۇرانشىلاردى «ارانداتۋشى» ەسەبىندە جاۋاپقا تارتۋ تۋرالى ماسەلە كوتەردى. ەكى دەپۋتاتتىڭ دا داۋىسى ادەتتەگىدەن قاتتى شىقتى...
وتىز جىلعا تاياۋ «شال، كەت!» - دەپ، ايعايلاعانى ءۇشىن قۋدالاۋدان كوز اشپاعانىن ويلاسام، ەراعامنىڭ بۇل ارەكەتىنە كۇلكىم كەلدى.
ەندى، جاندارى قاتتى قينالعاندىقتان «شال، كەل!» دەگەن سول بايباقتاردى شىرىلداتىپ سوتتاساق، وندا بۇگىنگى بيلىكتىڭ ەسكى جۇيەدەن نە ايىرماسى قالدى؟!
ونىڭ ۇستىنە، ەلدىڭ ءبارى ەرمۇرات اعا ەكەۋمىز سەكىلدى توقاەۆشىلداردان ەمەس، نازارباەۆشىلدار دا، ءتىپتى پۋتينشىلدەر دە بارشىلىق.
ەكىنشىدىدەن, ەكى دەپۋتات اعاما ايتارىم، سىزدەر تيمۋر قۇلىباەۆ پەن كارىم ءماسىموۆتىڭ تىكەلەي ىقپالىمەن قۇرىلعان جانە ۋزۋرپاتسيالانعان ەسكى جۇيەنىڭ ۇستىندە وتىرسىزدار.
باسقانى ايتپاعاندا، «حالىقتىڭ كوشى-قونى تۋرالى» زاڭىنىڭ اتىشۋلى 20-بابىنىڭ 5) تارماعىنا ساۋساقتارىڭىزدى قويىپ، تىرناقتارىڭىزدىڭ ۇشىن تيگىزە الماعاندىقتارىڭىز-اق، سونىڭ دالەلى.
«شال، كەل!» دەگەن بەس-التى بايقۇستى سوتتاعانىمەن ۋزۋرپاتسيالانعان جۇيە قۇلاپ قالمايدى. بۇگىن «اتامەكەن» كەتسە، ەرتەڭ ونىڭ ورنىنا قۇرامىندا ەرمۇرات باپي مەن ەدىل جاڭبىرشين باستاعان جيىرماعا تارتا دەپۋتات بار «پاراسات» كەلەدى. كەلىپ تە بولدى. انە، قازاقستانداعى شەتەلدىك كومپانيالاردىڭ اكتسيالارىن رەسەيگە ساتىپ الۋدى ۇسىنىپ، ايدى اسپاننان ءبىر-اق شىعاردى.
ويتكەنى، تاعى قايتالاپ ايتامىن، قازاقستان – «قازاقستان رەسپۋبليكاسىنىڭ ۇلتتىق كاسىپكەرلەر پالاتاسى تۋرالى» زاڭىمەن باياعىدا زاڭدى تۇردە ۋزۋرپاتسيالانعان مەملەكەت!
رەتى كەلىپ تۇرعاندا ايتا كەتەيىن، وركەنيەتتى ەلدەردە كەتكەن پرەزيدەنت جاڭا كەلگەن پرەزيدەنتكە وپپوزيتسيا بولىپ جاتادى.
وسى قاعيداعا سالساق، نازارباەۆتىڭ ءوزى بولماسا دا، ونىڭ كومانداسى توقاەۆ بيلىگىنە اشىق وپپوزيتسيا بولىپ، جاڭا باعدارلاماسىمەن مادەنيەتتى تۇردە باسەكەگە ءتۇسۋى كەرەك ەدى. جوق، ولار بىردەن توقاەۆ جاققا «سەكىرىپ كەتكەنسىگەنىمەن»، بولاشاق ءۇشىن قۇرىپ قويعان ۋزۋرپاتسيالاعان جۇيەسىن دىن امان ساقتاپ قالۋ ءۇشىن، قاسىم-جومارت كەمەلۇلىنا جايىلىپ جاستىق، ءيىلىپ توسەك بولىپ جۇرگەنى بەلگىلى.
ءبىرىنشى بيلىكتىڭ قانتوگىسپەن كەتكەنىن ەسكەرسەك، ولاردىڭ تاعى دا قانتوگىسپەن بيلىككە كەلۋدەن تايىنباسى انىق...
سول ءۇشىن، قازىرگى مەملەكەتتىك باسقارۋ ءتارتىبىن تۇبەگەيلى وزگەرتىپ، قازاقستاندى ءبىر پالاتالى، كوپ دەپۋتتاتتى پارلامەنتتىك باسقارۋ جۇيەسىنە كوشىرۋىمىز كەرەك!
قازاقستان سوندا عانا قۇلىباەۆتاردىڭ قۇرىعىنان قۇتىلامىز!
قۇرمەتتى بەرىك ءۋاليۇلى!
قازىر بۇل تىعىرىقتان الىپ شىعادى دەپ، جۇرتتىڭ سەنىپ وتىرعان جالعىز ءۇمىتى – قاسىم-جومارت توقاەۆ!
ايتسا، ايتقانداي، قاسىم-جومارت كەمەلۇلى قازگىرگى تاڭدا، تاعى قايتالاپ ايتايىن، الەمدەگى ءۇش سۋپەر دەرجاۆانىڭ ۇشەۋىنىڭ دە پرەزيدەنتتەرىنەن، قاي جاعىنان الساڭ دا، ارتىق تۇلعا!
مىسالى، قىتاي توراعاسى سي تسزينپين «الىپپەدەن» باسقا كىتاپ وقىماعان، كونفۋتسيدىڭ بەتىن اشپاعان كىسى. ەگەر، سي كونفۋتسي ىلىمىمەن سۋسىنداعان جان بولسا، قىتايداعى از ساندى مۇسىلمان ۇلتتاردى جانىشتاپ، گەنوتسيد جۇرگىزبەس ەدى.
سي تسزينپين تۋرالى بۇل ءسوزدى پۋتين تۋرالى دا ايتۋعا بولدى. ونىڭ دا وڭىپ تۇرعان تۇگى جوق، تۋعان حالقىن باتىستىق دەموكراتيا مەن وركەنيەتكە باستاۋدىڭ ورنىنا سوعىسقا سالىپ، ءوز باۋىرلاسىن قىرۋمەن كەلەدى.
ال، اتتاپ باسسا ەكپەتىنەن ءتۇسىپ، ارەڭ جۇرگەن دجو بايدەندى وكىرتىپ تۇرعان – اقش-تىڭ مەملەكەتتىك باسقارۋ جۇيەسى.
سوعىسقۇمار كىشى بۋش كەلسە دە، قاتىنقۇمار كلينتون بيلىك جۇرگىزسە دە، ءومىرى مەملەكەتتىك قىزمەت ىستەپ كورمەگەن ترامپ تاققا وتىرسا دا، اقش – سول باياعى اقش، الەمنىڭ قوجاسى!
اباي ايتادى عوي، «بولماساڭ دا ۇقساپ باق...» - دەپ، قازاقستان دا اقىرىنداپ وسىنداي باسقارۋ جۇيەسىنە قاراي جىلجي بەرگەنى دۇرىس. ەگەر، اتالعان قادام قاسىم-جومارت كەمەلۇلى بيلىك باسىندا وتىرعاندا جاسالماسا، مەملەكەتتىك باسقارۋ جۇيەسىن وزگەرتۋ تاعى وتىز جىلعا سوزىلادى نەمەسە قانتوگىس بولادى!
كەڭەس وداعى قۇلاي سالىسىمەن موڭعوليا پارلامەنتتىك باسقارۋ جۇيەسىنە كوشىپ ەدى، انە، ماڭعولار ونى بىردەن الىپ ءجۇرىپ كەتتى.
قازىر موڭعوليا – پارلامەنتاريى ورنىققان، دەموكراتياعا توسەلگەن مەملەكەتكە اينالدى.
سەبەبى، ولار – موڭعول يمپەرياسىنىڭ مۇراگەرى.
قۇدايعا شۇكىر، قازاق تاقىر جەردەن شىققان جوق، التىن وردانىڭ مۇراگەرى!
دەمەك، مەملەكەت قۇرۋ مەن باسقارۋ – بىزدەن قالعان...
قۇرمەتتى بەرىك مىرزا!
ءوزىڭىز جاقسى بىلەسىز، جاقىندا سوت ەرەۋىلىن زاڭسىز دەپ تاپقان West Oil Software مۇناي-سەرۆيستىك كومپانياسىنىڭ نەشە جۇزدەگەن جۇمىسشىلارىنىڭ تالابىنىڭ ورىندى-ونسىنسىزدىعىنا قاراماستان، ءجۇز كۇن بويى بەرىلمەگەن ۇكىمەت ولارعا قىزمەتشىلەر ءۇشىن شارت-جاعدايى جاقسى جاسالعان، جوعارى، تۇراقتى جالاقىسى بار كومپانيالاردان جۇمىس بەرۋگە ءماجبۇر بولدى.
دەمەك، ۋزۋرپاتسيالانعان مەملەكەتتە حالىقتىڭ مۇددەسىنە قاتىستى ماسەلە ەشقاشان اعاي-شۋسىز شەشىلمەيدى. بۇل – جاقسىلىقتىڭ بەلگىسى ەمەس!
قازاقستان حالقى اسسامبلەياسىنىڭ ءحححىىى سەسسياسىندا سويلەگەن سوزىندە پرەزيدەنتىمىز قاسىم-جومارت توقاەۆ: «ەرتە مە، كەش پە، كەز كەلگەن مەملەكەت ءتۇرلى سىناققا تاپ بولۋى مۇمكىن. سونداي كەزدە ەل ومىرىندە كۇردەلى ءارى تۇبەگەيلى بەتبۇرىس جاسالادى» - دەدى.
«قاڭتار كوتەرىلىسى» ەلىمىز ءۇشىن وتە اۋىر سىناق بولدى. ول قازاقستاندى ساياسي رەفورما جاساپ، كونستيتۋتسياعا وزگەرىستەر مەن تولىقتىرۋلار ەنگىزۋگە الىپ كەلدى.
سول سەكىلدى، بيىلعى سۋ تاسقىنى دا وتە ۇلكەن سىناق بولىپ وتىرعانى بەلگىلى.
دەمەك، بۇل رەتكى سۋ تاسقىنىنان قورتىندى شىعارىلىپ، مەملەكەتىمىزدىڭ باسقارۋ جۇيەسىندە، پرەزيدەنتىمىز ايتقانداي، تۇبەگەيلى بەتبۇرىس جاسالادى دەگەن ويدامىن. جانە سولاي بولعانىن قالايمىن.
سىزدەن قر پرەزيدەنتىنىڭ كەڭەسشىسى ءارى پرەزيدەنتتىڭ ءباسپاسوز حاتشىسى رەتىندە، وسى ماقالام مەن حاتىمدى ءوز قولىڭىزبەن قاسىم-جومارت كەمەلۇلىنىڭ نازارىنا ۇسىنۋىڭىزدى وتىنەمىن.
قۇرمەنتپەن،
اۋىت مۇقيبەك
Abai.kz
