سەنبى, 20 شىلدە 2024
ساڭلاق 1591 1 پىكىر 4 ماۋسىم, 2024 ساعات 13:35

ءVىىى چەمپيونات. 1988. «عاسىر گولى» جانە عالامات فۋتبول

كوللاج: Abai.kz

باسى: كەشىگىپ تۋعان كەرەمەت

جالعاسى: ءى چەمپيونات. 1960. كەڭەس فۋتبولىنىڭ التىن ءداۋiرi

جالعاسى: ءىى چەمپيونات. 1964. «قىزىل فۋريانىڭ» تۇڭعىش تابىسى

جالعاسى: ءىىى چەمپيونات. 1968. تەرىس تۇسكەن «تەڭگە»

جالعاسى: IV چەمپيونات. 1972. المانشا ارمان-كوماندا

جالعاسى: V چەمپيونات. 1976. سەگىز ساعاتقا سوزىلعان تۋرنير

جالعاسى: ءVى چەمپيونات. 1980. نەمىستەردىڭ ەكىنشى التىنى

جالعاسى: ءVىى چەمپيونات. 1984. ميشەل پلاتيني فەستيۆالى

پاريجدەگى تاريحي جەڭىس

فرانتسياداعى قۇرلىق دوداسىنىڭ وتە جوعارى دەڭگەيدە وتكەنىن وسىنىڭ الدىندا اڭگىمەلەگەنبىز. 1988 جىلعى ەۋروپا چەمپيوناتى ۇيىمداستىرىلۋى مەن ويىندارىنىڭ تارتىستىلىعى جاعىنان الدىڭعىسىنان اسىپ تۇسپەسە، كەم بولعان جوق. ستاديونعا جينالعان كورەرمەندەر جونىنەن باتىس گەرمانياداعى دوپ دوداسى ءتىپتى رەكورد جاسادى – مۇندا ءار ويىندى ورتا ەسەپپەن 62 مىڭنان استام ادام تاماشالادى! بۇل جولى دا چەمپيوناتقا قاتىسۋشىلاردىڭ سانى 33 بولدى. ولار ىرىكتەۋ ساتىسىندا، ادەتتەگىدەي، 7 توپقا ءبولىنىپ سىنعا ءتۇستى. توپ جەڭىمپازدارى قارت قۇرلىقتىڭ فۋتبول تويىن تۇڭعىش ۇيىمداستىرىپ وتىرعان گەرمانيا فەدەراتيۆتىك رەسپۋبليكاسى (گفر) قۇراماسىمەن بىرگە اقتىق سىندا كۇش سىناسار ۇزدىك سەگىزدىك ءتۇزدى.

ىرىكتەۋ كەزەڭىنىڭ باستى سەنساتسياسى – سول كەزدەگى ەۋروپا چەمپيونى فرانتسيا قۇراماسىنىڭ فينالدىق تۋرنيرگە شىعا الماي قالۋى بولدى. مۇنىڭ ەكى سەبەبى بار ەدى: ءبىرىنشىسى – «ۇشجولاقتىلار» ساپىندا بۋىن الماسۋ پروتسەسى ءجۇرىپ جاتتى. فرانتسۋزداردىڭ وسىعان دەيىنگى ءىرى تابىستارىن (1984 جىلعى التىن كۋبوك پەن ودان ەكى جىل كەيىن وتكەن الەم چەمپيوناتىنىڭ قولا جۇلدەسىن) قامتاماسىز ەتىپ كەلگەن اڭىز-ۇجىم بىرتىندەپ ىدىراي باستادى. مەكسيكاداعى دۇنيەجۇزىلىك دودادان سوڭ كوماندانىڭ ءۇش بىردەي ۇزدىك ويىنشىسى – ماكسيم بوسسي، الەن جيرەسس جانە دومينيك روشتو ۇلتتىق قۇرامامەن قوش ايتىستى. ميشەل پلاتيني مەن جان تيگانا دا ەكى-ءۇش ىرىكتەۋ ويىنىنان سوڭ سونداي شەشىمگە كەلىپ، بۋتسىسىن شەگەگە ءىلدى. ەكىنشى سەبەپ – 1986 جىلى كۋبوك يەلەرىنىڭ كۋبوگىن جەڭىپ العان كيەۆتىك ديناموشىلاردان جاساقتالعان كسرو قۇراماسىنىڭ تاڭداي قاقتىرار تاماشا ويىنى ەدى. ۆالەري لوبانوۆسكيدىڭ شاكىرتتەرى بىردە-ءبىر ويىندا ۇتىلماي، 3-توپتا ءبىرىنشى ورىندى ايقىن باسىمدىقپەن جەڭىپ الدى. اسىرەسە ولاردىڭ ءپاريجدىڭ تورىندە فرانتسۋزداردى 2:0 ەسەبىمەن (گولداردى يگور بەلانوۆ پەن ۆاسيلي راتس سوقتى) تىزە بۇكتىرۋى جۇرتى ەلەڭ ەتكىزگەن وقيعا بولدى. بۇل جەردە ماسەلە ەسەپتە ەمەس، كەڭەس فۋتبولشىلارى كورسەتكەن كەلىستى ويىندا ەدى. ەرتەڭىنە جەرگىلىكتى «ەكيپ» گازەتىنىڭ «قوناقتاردىڭ پارادتا جۇرگەندەي ەمىن-ەركىن قيمىلى جانە «پا، شىركىن!» دەگىزەرلىك ءساندى ونەر كورسەتكەنى سونداي، چەمپيوندىقتى بىزدەن وسىلار تارتىپ الاتىنداي اسەر قالدىردى» دەپ جازۋى تەگىن بولماسا كەرەك.

جانكۇيەرلەر قاقپاشىنىڭ باسىن جاردى

باسقا توپتاردىڭ بارىندە ءبىرىنشى ورىن ءۇشىن تالاس سوڭعى تۋرعا دەيىن ءجۇرىپ جاتتى. 1-توپتا ۆەناداعى شەشۋشى ماتچتا اۆستريالىقتاردى ۇتا الماعان (0:0) رۋمىندار سول كۇنى البانيانى 5:0 ەسەبىمەن جەڭگەن يسپانياعا جول بەردى. وسىنىڭ الدىنداعى قۇرلىق دوداسىندا ماسقاراعا ۇشىراعان يتاليالىقتار سىننان قورىتىندى شىعارىپ، بۇل جولى بۇرىنعى باپكەر ەنتسو بەارزوتتىڭ كوپ جىل بويى كومەكشىسى بولعان مامان ادزەلو ءۆيچينيدىڭ جەتەكشىلىگىمەن 2-توپتىڭ لايىقتى جەڭىمپازى اتاندى. بۇل توپتاعى وتە كۇشتى پورتۋگاليا قۇراماسىن... ءوز فۋتبول فەدەراتسياسى السىرەتىپ تاستادى: مانۋەل بەنتۋ، فەرناندۋ گوميش، كارلۋش مانۋەل سىندى تاجىريبەلى ءھام تانىمال ويىنشىلاردى مەكسيكاداعى دوپ دوداسىندا «ۇلت فۋتبولىنىڭ ابىرويىن ءتۇسىردى» دەپ ايىپتاپ، قۇرامادان ماڭگى-باقي (!) الاستادى. الدىڭعى قۇرلىقتىق دوداعا بارا الماعان انگليا دا بۇل جولى 4-توپتا قارسىلاستارىنىڭ ءبىرىن وڭعا، ءبىرىن سولعا لاقتىرىپ، فينالدىق تۋرنيرگە تاماشا كورسەتكىشپەن (5 جەڭىس، 1 تەڭ ويىن، دوپ ايىرماسى 19:1!) شىقتى.

5-توپتا تاپ وسىنداي عالامات ناتيجە كورسەتكەن گوللانديانىڭ نەگىزگى قارسىلاسى... ءوز جانكۇيەرلەرى بولدى. 1974 جىلى «قىزعالداقتار ەلى» قۇراماسىن الەم چەمپيوناتىنىڭ فينالىنا الىپ شىققان ايگىلى باپكەر رينۋس ميحەلس بۇل جولى دا وتە مىقتى كوماندا جاساقتاعان ەدى. روتتەردامدا كيپردى قابىلدار ساتتە ولار بۇل ويىننىڭ ەڭ شەشۋشى كەزدەسۋ بولارىن بىلگەن جوق. بىراق ءسال بولماعاندا جانكۇيەرلەر ءوز كومانداسىن جەرگە قاراتا جازدادى. ويىننىڭ 4-مينۋتىندا ولاردىڭ ءبىرى قوناقتاردىڭ قاقپاشىسى حاريتۋعا شيشا لاقتىرىپ، باسىن جاردى. بايعۇستى ستاديوننان بىردەن اۋرۋحاناعا الىپ كەتتى. ميحەلس شاكىرتتەرى قاۋقارسىز قارسىلاسىن 5:0 ەسەبىمەن ۇتىپ جاتقاندا، جانكۇيەرلەردىڭ ءبىرى قوناقتاردىڭ قاقپاسى ماڭىنا جارىلعىش زات لاقتىرىپ، ستاديوندى كوك تۇتىنگە كومدى. كەيىن انىقتالعانىنداي، بومبا تاياۋ جەردە جارىلعاندىقتان، كيپرلىك قوسالقى قاقپاشى اۋىر جاراقات الىپتى. زارەسى ۇشقان قوناقتار ماتچتى ءارى قاراي جالعاستىرۋعا ارەڭ كوندى. قورىتىندى ەسەپ – 8:0.

الايدا كيپرلىكتەر قاتتى اشۋلانسا كەرەك، ويىننان سوڭ ۋەفا-عا شاعىم ءتۇسىرىپتى. ەۋروپا فۋتبولى مارقاسقالارىنىڭ ەرتەسىنە شىعارعان شەشىمى گوللاندىقتاردى ەسىنەن تاندىرا جازدادى – ولارعا 0:3 ەسەبىمەن تەحنيكالىق جەڭىلىس جاريالانىپتى! مۇنى ەستىگەن گرەكتەردىڭ جۇرەگى قۋانىشتان جارىلۋعا شاق قالدى: دەمەك، سوڭعى تۋرداعى گرەكيا – گوللانديا ماتچىندا ولار كەز كەلگەن ەسەپپەن جەڭسە بولعانى، گفر-گە بارار بيلەت الاقانعا ءوزى كەلىپ تۇسپەك! دەگەنمەن گوللانديا فۋتبول فەدەراتسياسى قايتا-قايتا ارىزدانىپ ءجۇرىپ، شەشىمدى ءسال جۇمسارتتى – ەندى ميحەلستىڭ جىگىتتەرى كيپرمەن قايتا وينايتىن بولدى جانە ماتچ قاڭىراعان بوس ستاديوندا وتكىزىلدى (4:0 ەسەبىمەن گوللاندىقتار جەڭدى).

مۇنداي «تراگيكومەديانىڭ» جانىندا قالعان ەكى توپتاعى وقيعالار بارىسى بالانىڭ ويىنى ىسپەتتى ەدى. ايتسە دە، 6-توپتان وزىپ شىققان دات كومانداسىنىڭ التى ويىندا بار-جوعى 4-اق (!) دوپ سوققانىن، ال 7-توپتا سوڭعى تۋرداعى بولگاريا – شوتلانديا ماتچىنىڭ 88-مينۋتىنا دەيىن اقتىق سىنعا بەرىلەر جالعىز جولداما الاڭ يەلەرىنىڭ قولىندا تۇرعانىن، تەك ويىن بىتۋگە ەكى مينۋت قالعاندا قوناقتاردىڭ جارتىلاي قورعاۋشىسى گاري ماكالليستەر ەسەپ اشىپ، الگى بيلەتتى... يرلاندىقتارعا ۇستاتا سالعانىن ايتا كەتۋگە ءتيىسپىز.

«عاسىر گولى»

گفر-دە وتكەن فينالدىق ءتۋرنيردىڭ ويىندارى وتە مازمۇندى بولدى. «ا» توبىندا مامانداردى يتاليا قۇراماسىنىڭ اياق الىسى ءسۇيسىنتتى. دودانىڭ بەتاشار ماتچىندا ولار الاڭ يەلەرىنەن اناعۇرلىم باسىم وينادى. ەسەپتى شابۋىلشى روبەرتو مانچيني اشتى. باتىسگەرماندىقتار تەك وزدەرىنە ءتان ەرەكشە ەرىك-جىگەردىڭ جانە... اعىلشىن تورەشىسى كەيت حاككەتتىڭ شەكتەن تىس پرينتسيپشىلدىگىنىڭ ارقاسىندا عانا تارازى باسىن تەڭەستىرە الدى. ول «سكۋادرا ادزۋررانىڭ» قاقپاشىسى ۆالتەر دزەنگانى سول كەزدەگى «دوپتى ۇستاعان سوڭ ءتورت قادامنان ارتىق قيمىل جاساۋعا بولمايدى» دەگەن ەرەجەنى بۇزدى دەپ شەشىپ، ايىپ الاڭىنىڭ ىشىنەن ەركىن ايىپ سوققىسىن بەلگىلەدى. مۇنداي مۇمكىندىكتى اندرەاس برەمە ءمۇلت جىبەرگەن جوق. ءسويتىپ، ءوزارا يتجىعىس تۇسكەن مىقتىلار توپتاعى باسقا قارسىلاستارىن كەزەك-كەزەك جەڭىپ شىعىپ، جارتىلاي فينالعا جولداما الدى. ءتۋرنيردى يسپانيا دا جامان باستاماپ ەدى، الايدا ولار العاشقى كەزدەسۋدە دانيانى جەڭگەنىمەن، توپ كوشباسشىلارىنا شاماسى كەلمەدى.

«ۆ» توبىندا التىن جۇلدەدەن باستى ۇمىتكەرلەردىڭ ءبىرى سانالعان انگليا قۇراماسى ءۇش ويىندا بىردە-ءبىر ۇپاي الا العان جوق! سوعان قاراماستان اعىلشىنداردىڭ ويىنى ناشار بولدى دەپ تاعى ايتا المايسىز. باس باپكەر بوببي روبسوننىڭ «جىگىتتەرىمە وكپەلەيتىن ءجونىم جوق، ولار بارىن سالدى» دەۋى تەگىن ەمەس. ولار بارلىق ماتچتا دا ويىن تىزگىنىن ءوز قولدارىندا ۇستادى، گول سوعۋعا تالاي مۇمكىندىك الدى، بىراق ايتەۋىر ءساتى تۇسپەدى. گوللاند شابۋىلشىسى ماركو ۆان باستەن تۇماندى البيوننان كەلگەن «جولى بولعىش جىگىتتەردى» ءۇش رەت رەنجىتتى (بۇل – اعىلشىن قۇراماسىنىڭ قاقپاسىنا ەنگەن تاريحتاعى ەكىنشى حەت-تريك ەدى، العاشقىسىن 1953 جىلى ۆەنگر ويىنشىسى ناندور حيدەگكۋتي سوققان ەكەن). كسرو فۋتبولشىلارىمەن ويىندا «ۇشقىر گوللاندىق» قوسالقى قۇرامدا وتىرعان بولاتىن، سودان با، الدە ميحەلس كەڭەس كومانداسىن ونشا مەنسىنبەي وينادى ما، ايتەۋىر ساق تا ساۋاتتى قورعانا بىلگەن لوبانوۆسكيدىڭ شاكىرتتەرى ازۋلى قارسىلاسىن 1:0 ەسەبىمەن ۇتىپ كەتتى. سوڭعى تۋردا اعىلشىنداردى 3:1 ەسەبىمەن تىزە بۇكتىرگەن كسرو قۇراماسى الگى جەڭىستىڭ كەزدەيسوق ەمەستىگىن دالەلدەدى.

جارتىلاي فينالدا گفر مەن گوللانديا، كسرو مەن يتاليا كەزدەستى. اۋەلگى ماتچ اتالمىش كوماندالاردىڭ ماڭگى ۇمىتىلماس بەلدەسۋىنىڭ – 1974 جىلعى الەم چەمپيوناتى فينالىنىڭ كەرىسىنشە كوشىرمەسىندەي بولدى. بۇرىن گوللاندىقتار پەنالتيدەن ەسەپ اشسا (يوحان نەەسكەنس), بۇل جولى العاشقى گولدى 11 مەترلىكتەن نەمىستەر سوقتى (لوتار ماتتەۋس). ول كەزدە تارازى باسىن نەمىستەر پەنالتي ارقىلى تەڭەستىرسە (پاۋل برايتنەر), بۇل جولى گوللاندىقتار دا ءسويتتى (رونالد كۋمان). تاعى ءبىر ۇقساستىق: شەشۋشى گولدى تاعى دا جەڭىمپازدىڭ ساپىنداعى باس مەرگەن (ول كەزدە گەرد ميۋللەر، قازىر ماركو ۆان باستەن) قاقپاعا ەنگىزدى. ەسەپ 89-مينۋتقا دەيىن 1:1 بوپ تۇردى دا، جۇرت «قوسىمشا ۋاقىت بەلگىلەنەتىن بولدى-اۋ» دەگەنشە بولعان جوق، ۆان باستەن سول قاپتالدان تاستالعان دوپتى قۇلاپ بارا جاتىپ قاقپاعا باعىتتاپ ۇلگەردى!

ەكىنشى كەزدەسۋدە لوبانوۆسكي تەحنيكالىق شەبەرلىگى مەن كوماندالىق ويىنى كوز سۇيسىندىرەتىن يتاليالىقتارعا ءوزىنىڭ باستى قارۋى – پرەسسينگ پەن قۇيىنداي جۇيتكىگەن جىلدامدىقتى قارسى قويدى. ايتپەسە ماماندار ءبىراۋىزدان «وسى چەمپيوناتتاعى كەمشىلىك اتاۋلىدان ادا، ەڭ كەرەمەت كوماندا» دەپ باعالاعان «سكۋادرا ادزۋررامەن» اشىق فۋتبول كورسەتىپ تايتالاسۋعا كسرو قۇراماسىنىڭ شاماسى كەلمەۋى دە مۇمكىن ەدى. ارينە، قارسىلاس تا جاسىل الاڭنىڭ ءار مەترى ءۇشىن تەكەتىرەستە بىردەن كەيىن شەگىنە قويعان جوق، دەگەنمەن بىرتە-بىرتە ولاردىڭ شارشاۋ بىلمەيتىن كەڭەس فۋتبولشىلارىنىڭ تەگەۋرىنىنە شىدامايتىنى بايقالا باستادى. 61-مينۋتتا الەكسەي ميحايليچەنكودان پاس الا سالا يتاليانىڭ ايىپ الاڭىنا ۇمتىلعان وڭقاي ويىنشى گەننادي ليتوۆچەنكو دوپتىڭ «تەبۋگە قولايسىز» سول اياعىنا كەلىپ قالعانىنا قاراماستان، تەزدەتىپ قاقپاعا باعىتتاپ ەدى، قارسى شىققان قاقپاشى دزەنگا ونى كەرى قايتارىپ، كيەۆتىك ديناموشىنىڭ ءدال وڭ اياعىنا ىڭعايلاپ بەردى: قۇشىرلانا تەبىلگەن دوپ كوزدى اشىپ-جۇمعانشا توردا تۋلاپ جاتتى. ەكى مينۋتتان سوڭ سول قاناتپەن قۇستاي ۇشقان الەكساندر زاۆاروۆ ورتادان وزا شاپقان ولەگ پروتاسوۆقا تاماشا پاس تاستادى: شابۋىلشى دوپتى بۇعان قارسى جۇگىرە شىققان قاقپاشىدان اسىرا تەۋىپ، ماتچتىڭ تاعدىرىن شەشتى. ءبىر وكىنىشتىسى، وسى ويىندا ەكىنشى ەسكەرتۋىن العاندىقتان ورتالىق قورعاۋشى ولەگ كۋزنەتسوۆ فينالعا قاتىسپايتىن بولدى (ول كەزدە ىرىكتەۋ ماتچتارىنداعى سارى قاعازدار فينالدىق تۋرنير الدىندا جويىلمايتىن).

ءتۋرنيردىڭ باستاپقى ويىنىنداعى ساتسىزدىكتەن ءسال سەكەم الىپ قالسا كەرەك، فينالدا گوللاندىقتار وتە ساق وينادى. ءتىپتى العاشقى جارتى ساعاتتا الاڭدا ءبىر-اق كوماندا – كسرو قۇراماسى عانا ويناپ جاتقانداي اسەر قالدىردى. وكىنىشكە قاراي، ولار سول باسىمدىعىن ناقتى ناتيجەگە اينالدىرا المادى. ال 35-مينۋتتا كۋزنەتسوۆسىز قالعان قورعانىس سىر بەردى: ولەگتىڭ ورنىن باسقان سەرگەي الەينيكوۆ رۋد گۋلليتكە «يە» بولا الماي قالدى دا، گوللانديا قۇراماسىنىڭ كاپيتانى جاقىن جەردەن باسپەن ۇرىپ، ەسەپ اشتى. ەكىنشى تايمدا ۆان باستەن ءوزىنىڭ ايگىلى «عاسىر گولىن» (فرانتس بەككەنباۋەردىڭ سيپاتتاماسى) سوقتى: اري ميۋرەننىڭ اۋەلەتىپ بەرگەن پاسىن وڭ قاپتالدا، قاقپاعا تىم قيعاش تۇرىپ قابىلداعان ول دوپتى جەرگە تۇسىرمەستەن عالامات سوققىمەن رينات داساەۆ قورعاعان قاقپانىڭ تورىن بۇلك ەتكىزدى! بىراق لوبانوۆسكيدىڭ جىگىتتەرى ەڭسە تۇسىرگەن جوق، تىنباي شابۋىلداۋمەن بولدى. ءبىر بەلانوۆتىڭ ءوزىنىڭ ءۇش گول سوعۋعا مۇمكىندىگى بولدى: العاشىندا گوللاندىقتاردى حانس ۆان برەكەلەن قۇتقاردى، ەكىنشىسىندە بەس مەتردەن تەبىلگەن دوپ باعاناعا ءتيىپ، كەرى سەرپىلدى، ۇشىنشىسىندە قاقپاشى پەنالتيدى ۇستادى...

ويىننان سوڭ گفر-ءدىڭ «كيككەر» جۋرنالى «كسرو قۇراماسى ءححى عاسىردىڭ فۋتبولىن كورسەتتى» دەپ اعىنان جارىلدى. تۇڭعىش رەت ەۋروپا چەمپيونى اتانعان گوللانديا كومانداسى دا مامانداردان از ماقتاۋ ەستىگەن جوق. قاقپاشى حانس ۆان برەكەلەن، قورعاۋشىلار فرانك رايكاارد، رونالد كۋمان، ادري ۆان تيگگەلەن، بارري ۆان اەرلە، جارتىلاي قورعاۋشىلار اري ميۋرەن، يان ۆوۋتەرس، رۋد گۋلليت، ەرۆين كۋمان، شابۋىلشىلار ماركو ۆان باستەن، گەرالد ۆانەنبۋرگ جانە باسقالار گوللاند فۋتبولىنا العاشقى (جانە ازىرگە سوڭعى) «كۇمىس قۇمىرانى» الىپ بەردى.

Vءىىى ەۋروپا چەمپيوناتى

(1988 جىل، گفر)

فينالدىق تۋرنيردە 15 ماتچ وتكىزىلىپ، 34 دوپ سوعىلدى ء(بىر ويىنعا ورتا ەسەپپەن – 2,27). مەرگەن فۋتبولشى: ۆان باستەن (گوللانديا) 5 دوپ.

«ا» توبى

گفر – يتاليا – 1:1, دانيا – يسپانيا – 2:3, گفر – دانيا – 2:0, يتاليا – يسپانيا – 1:0, گفر – يسپانيا – 2:0, يتاليا – دانيا – 2:0

  1. گفر 3 5:1    5
  2. يتاليا 3 4:1    5
  3. يسپانيا 3 3:5    2
  4. دانيا 3 2:7    0 

«ۆ» توبى

انگليا – يرلانديا – 0:1, گوللانديا – كسرو – 0:1, انگليا – گوللانديا – 1:3, يرلانديا – كسرو – 1:1, انگليا – كسرو – 1:3, يرلانديا – گوللانديا – 0:1

  1. كسرو 3 5:2    5
  2. گوللانديا 3 4:2    4
  3. يرلانديا 3 2:2    3
  4. انگليا 3 2:7    0

جارتىلاي فينال

گفر – گوللانديا – 1:2, كسرو – يتاليا – 2:0

فينال

گوللانديا كسرو 2:0

25 ماۋسىم. ميۋنحەن. «وليمپياشتاديون». 62 770 كورەرمەن. تورەشى ۆوترو (فرانتسيا).

گوللانديا: ۆان برەكەلەن، ۆان اەرلە، ر.كۋمان، رايكاارد، ۆان تيگگەلەن، ە.كۋمان، ۆوۋتەرس، گۋلليت، ميۋرەن، ۆانەنبۋرگ، ۆان باستەن.

كسرو: داساەۆ، دەميانەنكو، حيدياتۋللين، الەينيكوۆ، راتس، ليتوۆچەنكو، ميحايليچەنكو، گوتسمانوۆ (بالتاچا، 68), زاۆاروۆ، پروتاسوۆ (پاسۋلكو، 71), بەلانوۆ.

گولدار: گۋلليت، 35 (1:0), ۆان باستەن، 53 (2:0).

62-مينۋتتا بەلانوۆ پەنالتي سوعا المادى.

ەسكەرتۋ العاندار: دەميانەنكو، ليتوۆچەنكو، حيدياتۋللين، ۆوۋتەرس، ۆان اەرلە.

ساكەن سىبانباي

Abai.kz

1 پىكىر

ۇزدىك ماتەريالدار

اباي مۇراسى

اباي ىلىمىندەگى ءومىر ماقساتى نە؟

دوسىم وماروۆ 1306
وي تۇرتكى

المەرەك ابىزدىڭ ورالۋى - ەلگە ءدىننىڭ ورالۋى

باقتىباي اينابەكوۆ 2047
كورشىنىڭ كولەڭكەسى

رەسەي تىلدىك ءھام ساياسي ەكسپانسيانى قالاي جۇرگىزدى؟

بەيسەنعازى ۇلىقبەك 2090