توقاەۆ: ماسىموۆكە راقىمشىلىق جوق!
![](https://abai.kz/content/uploads/2024/07/ekrker-1.jpg)
پرەزيدەنت قاسىم-جومارت توقاەۆ قازاقستاننىڭ بۇرىنعى ۇلتتىق قاۋىپسىزدىك قىزمەتىنىڭ باسشىسى (ۇقق) كارىم ماسىموۆكە راقىمشىلىق جاساۋدان باس تارتتى. بۇل تۋرالى قازاقستاندىق باق جارىسا جازۋدا.
پرەزيدەنت توقاەۆتىڭ بۇل شەشىمى تۋرالى قازتاگ اگەنتتىگىنە قر پرەزيدەنتى اكىمشىلىگىندەگى دەرەككوزى حابارلاپ ايتقان.
ەسكە سالا كەتەيىك، وسىعان دەيىن قازاقستان رەسپۋبليكاسى پرەزيدەنتىنىڭ جانىنداعى كەشىرىم جاساۋ ماسەلەلەرى جونىندەگى كوميسسيا قر ۇقق ەكس-توراعاسى كارىم ءماسىموۆتىڭ راقىمشىلىق جاساۋ تۋرالى ءوتىنىشىن قاراپ، راقىمشىلىق جاساۋدان باس تارتقان ەدى.
«قازاقستان رەسپۋبليكاسى پرەزيدەنتىنىڭ جانىنداعى كەشىرىم جاساۋ ماسەلەلەرى جونىندەگى كوميسسيانىڭ مىندەتى – كەشىرىم جاساۋ تۋرالى ماتەريالداردى الدىن الا قاراۋ. كوميسسيا مەملەكەت باسشىسى جانىنداعى كونسۋلتاتيۆتىك-كەڭەسشى ورگان بولىپ تابىلادى. كوميسسيانىڭ قىزمەتى مەملەكەت باسشىسىنىڭ جارلىعىمەن بەكىتىلگەن ەرەجەمەن رەتتەلەدى. اپەللياتسيالىق شاعىم بەرىلگەننەن كەيىن، ول تىركەلەدى، سۇراۋلار ىشكى ىستەر مينيسترلىگىنىڭ قىلمىستىق ىزدەستىرۋ دەپارتامەنتىنە، باس پروكۋراتۋراعا جانە جوعارعى سوتقا جىبەرىلەدى. اقپاراتتى العاننان كەيىن كوميسسيادا جان-جاقتى تالقىلانادى»، - دەپ جازعان ەدى ءماجىلىس دەپۋتاتى مارات ءباشىموۆ.
ال كارىم ءماسىموۆ بولسا، 2024 جىلعى ماۋسىم ايىنىڭ ورتاسىندا كەشىرىم جاساۋ تۋرالى ءوتىنىش جازعانى بەلگىلى بولدى.
كارىم ءماسىموۆتىڭ ۇكىمى 2023 جىلدىڭ 24 ساۋىرىندە شىققان. ول قر قىلمىستىق كودەكسىنىڭ بىرنەشە بابى بويىنشا ايىپتى دەپ تانىلىپ، 18 جىلعا باس بوستاندىعىنان ايىرىلعان. وعان تاعىلعان ايىپتار: قر قك 175 بابىنىڭ 1 تارماعى (مەملەكەتكە وپاسىزدىق جاساۋ), 179 باپتىڭ 3 تارماعى (بيلىكتى كۇشپەن باسىپ الۋ) جانە 362 باپتىڭ 4 تارماعى، 3 تارماقشاسى (قىزمەتتىك مانسابىن اسىرا پايدالانۋ).
2024 جىلدىڭ 10 ماۋسىمىندا كارىم ءماسىموۆ پرەزيدەنت توقاەۆتان راقىمشىلىق جاساۋدى سۇراعان. ال بۇگىن پرەزيدەنت توقاەۆتىڭ ماسىموۆكە راقىمشىلىق جاساۋدان باس تارتقانى بەلگىلى بولدى.
Abai.kz