كەشە دۇنيەجۇزىلىك كوشپەندىلەر ويىندارى اياسىندا كوكپاردىڭ فينالى ءوتتى. فينالدا قازاقستان مەن قىرعىزستان قۇرامالارى جولىعىپ، 5:4 ەسەبىمەن قازاقستان قۇراماسى جەڭىسكە جەتكەن. الايدا، بۇعان قىرعىزستان كومانداسى مەن جانكۇيەرلەرى نارازى بولىپ، كوكپار سوڭى ەلارالىق شۋعا ۇلاستى.

قىرعىز تارابى: «كوكپاردىڭ فينالىندا ادىلەتسىزدىك ورىن الدى»، - دەپ نارازىلىقتارىن ايتۋدا.

وسىعان قاتىستى قر كوكپار فەدەراتسياسىنىڭ پرەزيدەنتى ايداربەك قوجانازاروۆ V دۇنيەجۇزىلىك كوشپەندىلەر ويىندارىندا كوكپاردان قازاق-قىرعىز ويىنشىلارى اراسىندا وتكەن فينالدىق ويىنعا قاتىستى پىكىر ءبىلدىردى.

سۋرەت ايداربەك قوجانازاروۆتىڭ جەكە پاراقشاسىنان الىندى.

ايداربەك قوجانازاروۆ:

- كوكپار فەدەراتسياسىنىڭ قۇرمەتتى پرەزيدەنتى رەتىندە، بىرنەشە جىلدان بەرى كوكپاردىڭ دامۋىنا ۇلەس قوسىپ جۇرگەن ازامات رەتىندە، كەشە وتكەن فينالدىڭ كۋاگەرى رەتىندە قازاق-قىرعىز اراسىنداعى اقتىق ويىنعا قاتىستى پىكىر بىلدىرگەن دۇرىس دەپ شەشتىم.

كوكپار - ناعىز باتىر جىگىتتەردىڭ اراسىنداعى باسەكە. كەيدە اتتىڭ ۇستىندەگى ادامنىڭ ەموتسياسى دوپ قۋعان نە بوز كىلەمدە الىسىپ-جۇلىسقان سپورتشىدان باسىم ءتۇسىپ جاتادى. ءار سپورت تۇرىندە ەرەجە ءارتۇرلى بۇزىلادى. كوكپاردا قامشىسىن سىلتەپ جىبەرسە، اسا ءبىر ارىزداناتىن جاعداي ەمەس. جاپپاي كوكپاردا ودان دا قورقىنىشتى كادرلاردى كورىپ ءجۇرمىز. راس، كەشە ويىندا ءتارتىپ بۇزىلدى، تورەشىلەر كەڭەسە كەلە ءتارتىپ بۇزعان ويىنشىعا ەسكەرتۋ بەردى. 2 مينۋتقا شەتكە شىعاردى. «باس جارىلسا - بورىك ىشىندە، قول سىنسا - جەڭ ىشىندە» دەگەندەي، الاڭداعى الا شاڭ سول جەردە قالۋى كەرەك. بۇل اۋەلدەن كوكپاردىڭ جازىلماعان ەرەجەسى.

ەكىنشىدەن، تورەشىنىڭ ايتقانى زاڭ! مەيلى قانداي سپورت ءتۇرىن الساق تا، سپورتشى ونىمەن سالعىلاسپايدى. شامدانۋى مۇمكىن، كەلىسپەي، سۇراۋ سالۋى مۇمكىن، بىراق تۋلاپ، ادەپتەن اتتامايدى. ادەمى ويىن كورسەتەيىك دەگەن جەردە، تورەشىنى تىڭداۋ پارىز. الەمدىك دەڭگەيدەگى كەز-كەلگەن سپورتتا تورەشىگە باعىنباۋ، قۇرمەتسىزدىك كورسەتۋ دەگەن اتىمەن جوق.

ۇشىنشىدەن، ساعان قۇرمەت كورسەتكەن جەردە وعان جاۋاپ رەتىندە ءىلتيپات بىلدىرسە قانداي جاراسىمدى. ىشتەگى وتىڭ كۇيدىرىپ سونبەي جاتسا، موينىڭداعى مەدالدى الىپ تاستاي بەر. ءتۇرىڭدى تىرجيتىپ، تەرىس قاراپ تۇرساڭ دا قابىلدانادى. بىراق قوناق قىلىپ شاقىرىپ، جاعدايىڭدى جاساعان، اعايىن دەپ ارداقتاعان، جۇلدەسىن قولىڭا ۇستاتىپ ارقاڭنان قاققان مەملەكەتتىڭ ءانۇرانى ويناعاندا ءبىر ساتكە سابىر ەتىپ، ەلدىك مۇددەنى جوعارى قويۋ - ءار سپورتشىعا قاجەت قاسيەتتىڭ ءبىرى.

ءسوز جوق، قىرعىز كوكپارشىلارى ءتاۋىر دايىندالعان. اتتارىن شەبەر باپتاعان. بىراق قازاقتىڭ كوكپارشىلارى انىق باسىم ءتۇستى. قىرعىزدار ويىن الاڭىندا 10 سالىم سالامىز دەسە، بىرەۋ وعان كەدەرگى جاسادى ما؟! كەرەك دەسە ەكى جاق تەڭ ءتۇسىپ، قوسىمشا ۋاقىت تا بەرىلدى. قوسىمشا ۋاقىت بەرىلمەي، «قازاقستان باسىم ءتۇستى» دەسە، ورتاعا قامشىنى ەڭ ءبىرىنشى مىنا مەن تاستار ەدىم. قۇدايشىلىعىن ايتايىق، قازاقستاننىڭ ۇلتتىق قۇراماسى تازا جەڭدى! الىستى، جۇلىستى، بىراق ۇتتى! جالپى دالا ەرلەرى ءۇشىن جەڭىلگەنىن مويىنداۋ دا ەرلىك! باسقا ارتىق ءسوز جوق!

ەكى مەملەكەتتىڭ تاتۋلىعى مەن دوستىعى - كەز-كەلگەن ويىننىڭ ناتيجەسىنەن قادىرلى. بۇگىن قازاق جەڭسە، ەرتەڭ قىرعىز ۇتادى. ىمىرا مەن ىنتىماقتى ويلاساق، ءالى تالاي كوكپار تارتامىز. قايتا قازاق-قىرعىز سەكىلدى مىقتى قارسىلاس شىقپاسا، كوكپاردا ءسان بولار ما ەدى؟ وسىنشاما جانكۇيەر جينالىپ، قيقۋلاپ تىك تۇرىپ تاماشالار ما ەدى؟! اشىعىن ايتقاندا بىزدەن باسقا كىمگە كەرەك بۇل ويىن؟! سەركەنى ىلەمىز دەپ ءجۇرىپ سىيىمىزدى كەتىرىپ المايىق. قانداي عاسىر، قانداي زامان كەلسە دە، قازاق پەن قىرعىزعا تەك باۋىرمالدىق جاراسسا كەرەك!

Abai.kz