(قازاقستان رەسپۋبليكاسىنىڭ پرەزيدەنتى قاسىم-جومارت توقاەۆتىڭ نازارىنا!)

پرەزيدەنت قاسىم-جومارت توقاەۆتىڭ تاپسىرماسىمەن جاسالعان «قازاقستان رەسپۋبليكاسى كوشى-قون ساياساتىنىڭ 2023 – 2027 جىلدارعا ارنالعان تۇجىرىمداماسى» ۇكىمەتتىڭ 2022 جىلعى 30 جەلتوقسانداعى №961 قاۋلىسىمەن بەكىتىلگەنى بەلگىلى.

جۇرت، اسىرەسە ۇلى كوشكە مۇددەلى قاۋىم وتە جاقسى بىلەدى، وسى «تۇجىرىمدامانىڭ» جوباسى تالقىعا تۇسكەن كۇننەن باستاپ شۋ شىققان بولاتىن.

سەبەبى، «تۇجىرىمدامانىڭ» ءتورتىنشى باعىتىنداعى «...قازاقستان رەسپۋبليكاسىنىڭ ازاماتتىعىن الۋ ءۇشىن كەمىندە 5 جىل تۇرۋ مەرزىمىن ەسكەرە وتىرىپ، «قانداس» مارتەبەسىن بەرۋ ءتارتىبىن قايتا قاراۋ قاجەت.» دەگەن تۇسى ءبىزدىڭ قاتتى نارازىلىعىمىزدى تۋدىردى.

قاسىم-جومارت توقاەۆتىڭ 2022 جىلعى جولداۋىنداعى «بۇل ورايدا، دەموگرافيالىق جانە ەكونوميكالىق ۇردىستەردى ەسكەرۋ كەرەك. سونداي-اق، جالپىۇلتتىق مۇددەنى باسشىلىققا الۋ وتە ماڭىزدى», - دەگەن نۇسقاۋىنا پىسقىرىپ تا قاراماستان، تامارا دۇيسەنوۆانىڭ اتالعان «تۇجىرىمداماسى» مەن №234 بۇيرىعى ارقىلى ەڭبەك جانە حالىقتى الەۋمەتتىك قورعاۋ مينيسترلىگى اقىرى وزدەرىنىڭ ارام ويلارىن، قارا نيەتتەرىن جۇزەگە اسىرىپ تىندى.

اتاپ ايتار بولساق:

- «حالىقتىڭ كوشى-قونى تۋرالى» زاڭىنداعى اتى شۋلى 20-باپتىڭ 5) تارماعى ارقىلى ۇكىمەت ايقىنداعان سەگىز وبلىستان وزگە توعىز وبلىس پەن الماتى، استانا، شىمكەنت – ءۇش قالاعا ءوز بەتىمەن كوشىپ كەلىپ قونىستانعىسى كەلەتىن ەتنيكالىق قازاقتارعا «قانداس» مارتەبەسى بەرىلمەيتىن ەتىپ تاستادى، ءسويتىپ ولاردى قونىستاناتىن ءوڭىرىن تاڭداۋ قۇقىعىنان ايىردى، قازاقستان رەسپۋبليكاسىنىڭ ازاماتتىعىن الۋىن شەكتەدى;

- بۇرىن بەس جۇمىس كۇنى ىشىندە بەرىلىپ كەلگەن «قانداس» مارتەبەسىن وتىز بەس كۇندە بەرىلەتىن ەتىپ، جاڭا ءتارتىپ ەنگىزدى;

- «اتا-جولى» كارتاسى جوباسىن اينالىمعا ەنگىزگەنىمەن، اتالعان كارتانى العان ەتنيكالىق قازاقتاردىڭ قۇقىقتارى مەن مىندەتتەرى زاڭمەن بەكىتىلمەگەن بولىپ شىقتى;

- «حالىقتىڭ كوشى-قونى تۋرالى» زاڭىنىڭ 21-1-بابىنىڭ 2 تارماعىندا «قازاقستان رەسپۋبليكاسىنىڭ اۋماعىندا تۇراتىن قانداستاردىڭ جەسىرلەرى مەن ولاردىڭ ورتاق بالالارى وزدەرىنىڭ وتباسى مۇشەلەرىن قانداستاردى قابىلداۋدىڭ وڭىرلىك كۆوتاسىنا ەنگىزۋ تۋرالى وتىنىشپەن جەرگىلىكتى اتقارۋشى ورگاندارعا جۇگىنە الادى جانە ولاردىڭ وسى زاڭنىڭ 19-1-بابىندا ايقىندالعان تارتىپپەن وعان ەنگىزىلۋگە قۇقىعى بار.»- دەپ اشىق جازىلعانىنا قاراماستان، قازاقستان رەسپۋبليكاسى پرەمەر-ءمينيسترىنىڭ ورىنباسارى - ەڭبەك جانە حالىقتى الەۋمەتتىك قورعاۋ ءمينيسترىنىڭ 2023 جىلعى 22 ماۋسىمداعى №234 بۇيرىعى ارقىلى قانداستاردىڭ جەسىرلەرىن تۇرعىن ءۇي قۇنىنىڭ 50% مولشەرىندە، بىراق 1 160 اەك-تەن اسىرماي بەرىلەتىن ەكونوميكالىق موبيلدىلىك سەرتيفيكاتىنان ايىرىپ تاستادى...

بۇل – تامارا دۇيسەنوۆانىڭ «تۇجىرىمداماسى» مەن بۇيرىعىنىڭ قۇقىقتىق جاعىنداعى اقاۋلار.

وتكەن 22 قىرگۇيەگىندە «تامارانىڭ تالتايىپ تۇرىپ قابىلداتقان زاڭىنىڭ سيقى…» اتتى ماقالا جازىپ، مىنە ءبىر جىل بولدى، بۇل تۋرالى تىنباي جازىپ تا، ايتىپ تا كەلەمىز.

تىڭداعان، قاپەرىنە العان ءبىر پەندە بولعان جوق!

سويتسەك، ونىڭ ەكونوميكالىق جاعى دا وڭىپ تۇرماپتى.

مىنە، بۇل ەكى قۇجاتتىڭ ۇلى كوشتى توقتاتۋدى عانا ماقسات ەتپەستەن، مەملەكەتتىڭ قازىناسىن توناۋعا باعىتتالىپ، ارنايى قابىلدانعانى بەلگىلى بولدى.

وسى وتكەن 12 قىركۇيەك كۇنى باس پروكۋراتۋرا قونىس اۋدارۋ باعدارلاماسىنا بولىنگەن ءبىر ميللياردتان استام تەڭگەنىڭ ۇرلانعانى تۋرالى اقپارات تاراتتى.

باس پروكۋراتۋرا جاريالاعان اقپارتقا قاراعاندا، قونىس اۋدارۋشىلار بولىپ جالعان ادامدار ەسەپكە الىنعان، ال قۇجاتتار تومەن باعامەن ساتىپ الىنعان كورىنەۋ تۇرۋعا جارامسىز نەمەسە اپاتتى عيماراتتارعا راسىمدەلگەن.

كەيبىر جاعدايلاردا ازاماتتار وزدەرىنىڭ قۇجات بويىنشا قونىس اۋدارىلعانىن بىلمەگەن دە.

«مۇنداي فاكتىلەر شقو، قاراعاندى، اقمولا، قوستاناي، اباي جانە ۇلىتاۋ وبلىستارىندا انىقتالدى. مىسالى، پاۆلودار وبلىسىنىڭ ۋسپەن اۋدانىندا «ەڭبەك موبيلدىلىگى ورتالىعى» كمم-ءنىڭ قىزمەتكەرى ارزان ۇيلەردى تاۋىپ، قونىس اۋدارۋشىلارعا جوعارى باعامەن ساتۋدى ۇسىنىپ، مەملەكەتتەن الىنعان قاراجاتتىڭ ءبىر بولىگىن وزىنە قالدىرىپ وتىرعان...»، - دەپ جازىلعان اتالعان اقپاراتتا.

بۇل جەمقورلىققا داڭعىل جول اشقان – تامارا دۇيسەنوۆا قول قويعان «جۇمىس كۇشىنىڭ ۇتقىرلىعىن ارتتىرۋ ءۇشىن ادامداردىڭ ەرىكتى تۇردە قونىس اۋدارۋ قاعيدالارىن بەكىتۋ تۋرالى» №234 بۇيرىقاعى «ەكونوميكالىق موبيلدىلىك سەرتيفيكاتى وتباسىنا، سونداي-اق وسى قاعيدالاردىڭ 66-تارماعىنىڭ ەكىنشى بولىگىندە كوزدەلگەن ادامدارعا تۇرعىن ءۇي قۇنىنىڭ 50% مولشەرىندە، بىراق 1 160 اەك-تەن اسىرماي بەرىلەدى...» دەگەن نورما!

12 قىركۇيكتەن بەرى بۇل كەلەڭسىزدىكتى ەل ءىشى-سىرتىنداعى اقپارات قۇرالدارى جارىسا جازۋدا.

رەسەيلىك باق-تار: «قازاقستاننىڭ ورىسى كوپ وڭىرلەردى قازاقىلاندىرامىز دەگەن باعدارلاماسىنىڭ قاراجاتىن شەنۋنىكتەرى جەپ قويىپتى...»،-دەپ، ءبىزدىڭ ۇكىمەتتى كەلەمەجدەپ جاتقان كورىنەدى.

ءسويتىپ، «جالپىۇلتتىق مۇددەنى باسشىلىققا الۋ وتە ماڭىزدى»-دەپ تاپسىرما بەرگەن توقاەۆتى ەكى جىلعا جەتكىزبەي تامارا دۇيسەنوۆانىڭ «تۇجىرىمداماسى» مەن بۇيرىعى دا تاقىرعا وتىرعىزدى.

«دا» دەگەن شىلاۋدى تەككە قوسىپ وتىرعان جوقپىز.

بۇدان بۇرىنعى «باعدارلامالار» ارقىلى قانداستارعا ارناپ سالعان ۇيلەردىڭ دە ساپاسى جەتىسىپ تۇرماعانى بەلگىلى. ولاردىڭ دا اقشاسى تونالعانىن جۇرتتى قويىپ، پرەزيدەنتتىڭ ءوزى وتە جاقسى بىلەدى.

ەستەرىڭىزدە بولسا، قاسىم-جومارت كەمەلۇلى «كازاحستانسكايا پراۆدا» گازەتىنىڭ 2021 جىلعى 24 مامىر كۇنگى شىعارىلىمىندا جاريالانعان «زالوجنيكي راۆنودۋشيا» اتتى ماقالادا ايتىلعان ماسەلەگە نازار اۋدارىپ، پرەزيدەنت اكىمشىلىگىنە «سولتۇستىك قازاقستان وبلىسى ايىرتاۋ اۋدانىنا قونىس اۋدارعان ازاماتتارعا ارنالىپ سالىنعان تۇرعىن ۇيلەردىڭ ساپاسىن تەكسەرۋ تۋرالى» تاپسىرما بەرگەنىن، «تەكسەرۋ جۇمىستارىنىڭ قورىتىندىسى بويىنشا ءتيىستى شارا قولدانۋدى» تاپسىرعانىن پرەزيدەنتتىڭ سول كەزدەگى ءباسپاسوز حاتشىسى بەرىك ءۋالي Facebook-تەگى پاراقشاسى ارقىلى حابارلاعان بولاتىن.

كوپ وتپەي، پرەزيدەنت تاپسىرماسى بويىنشا جۇرگىزىلگەن تەكسەرۋلەردىڭ قورىتىندىسى بويىنشا، ماقالادا كەلتىرىلگەن دەرەكتەر راستالىپ، ايىرتاۋ جانە ەسىل اۋداندارىنىڭ اكىمدەرى قىزمەتتەرىنەن الىندى. وبلىس اكىمىنىڭ ورىنباسارى، جۇمىسپەن قامتۋ جانە الەۋمەتتىك باعدارلامالاردى ۇيلەستىرۋ جونىندەگى وبلىستىق باسقارمانىڭ باسشىسى، سونداي-اق، بەس اۋداننىڭ اكىمدەرى تارتىپتىك جاۋاپقا تارتىلعانى حابارلانىپ، بۇل ءىس سونىمەن تىنعان.

ونىڭ ارعى جىلداردى «باعدارلامالاردى» ەسكە الساق، سايدا سانى، قۇمدا ءىزى عانا قالعان مارقۇم بەردىبەك ساپارباەۆتىڭ اتاقتى «نۇرلى كوش» افەراسى جاتىر;

ودان ارىعا كوز سالساڭ، زاڭسىز بەرىلگەن جەرگە سالىنعان دەپ تانىلىپ، 20 جىلدان كەيىن ۇيلەرى سۇرىلە باستاعان زاۋىتبەك تۇرىسبەكتىڭ ايگىلى «اسار» باعدارلاماسى ارقىلى سالىنعان «اسار» شاعىن اۋدانى مۇنارتادى...

ايتىڭىزشى، بۇگىنگە دەيىن كوشى-قونعا قاتىستى جاسالعان «باعدارلاما» مەن شىعارىلعان بۇيرىق اتاۋلىنىڭ وڭعان بىرەۋى بار ما ءوزى؟!!

ۇلى كوشتىڭ ماڭدايىنا بۇيىرعان «باعدارلاما» مەن بۇيرىق بىتكەننىڭ ءبارى جومقورلىققا، مەملەكەتتىڭ اقشاسىن ۇرلاۋعا، توناۋعا باعىتتالىپ، ارنايى جاسالىپ، شىعارىلىپ كەلەدى. جانە ونى جاساعان مينيسترلەر مەن بەكىتكەن  پرەمەرلەردىڭ جاۋاپقا تارتىلعان بىرەۋى جوق!

كىلەڭ «ايران ىشكەن قۇتىلىپ، شەلەك جالاعان تۇتىلۋمەن» ۇلى كوشتىڭ ءومىرى زىمىراپ ءوتىپ بارادى...

ەگەر، بىرەر «تۇجىرىمدامادان» نەمەسە بىرەر بۇيرىقتان وسىنداي شي شىعىپ جاتسا، ونى «بايقاۋسىزدا كەتكەن قاتەلىك» دەپ قاراۋعا بولاتىن شىعار، بىراق ەشقاشان كەشىرۋگە بولمايدى!

ال، بىتكەن «باعدارلاما» مەن بۇيرىق اتاۋلى مەملەكەتتىڭ قارجاسىن وسىلاي توناۋ مەن تالاۋعا ۇشىراتىپ جاتسا، ونى قالاي تۇسىنۋگە نەمەسە تۇسىندىرۋگە بولادى؟!!

بالەنباي قولدان ءوتىپ بارىپ بەكىتىلگەن «تۇجىرىمداماداعى» نەمەسە بۇيرىقتاعى جەمقورلىققا داڭعىل جول اشىپ تۇرعان وسىناۋ شيكىلىكتى سولاردىڭ بىرەۋى بەلمەدى، كورمەي قالىپتى دەگەنگە ۇلكەن ادامدى قويىپ، باستاۋىش سىنىپتىڭ بالاسىن سەندىرە الاسىڭ با؟!

ارتىق ايتسام كەشىرىپ قويىڭىزدار، بۇگىنگى اتقارۋشى بيلىكتىڭ باسشىلارى دا قاسىم-جومارت توقاەۆتىڭ ماعانى «جالپىۇلتتىق مۇددەنى باسشىلىققا الۋ وتە ماڭىزدى!» دەگەن تاپسىرماسىن «ءبىر جەرلەرىنە» قىستىرىپ وتىرعان جوق!

كەرىسىنشە، سول قاسەكەڭنىڭ ءوز سوزىمەن ايتساق، قازىر دە «زاڭ شىعارۋ قىزمەتى تاقىرىپتىق جاعىنان تارىلىپ، زاڭدار ارقىلى ۆەدومستۆولىق، سالالىق، وڭىرلىك جانە باسقا دا مەملەكەتتىك اۋقىمنان تىس مۇددەلەردى قاناعاتتاندىرۋ ءۇردىسى تۋىنداپ وتىر...» (ق. توقاەۆتىڭ سەنات توراعاسى بولىپ تۇرعان كەزىندە وتكەن ۇكىمەت ساعاتىندا سويلەگەن ءسوزى، 24.09.2018 جىل).

دەمەك، بۇلار – بىرىمەن ءبىرى جەڭ ۇشىنان جالعاقان كىلەڭ سىبايلاستار!

رەفورما جاسالمادى ەمەس، جاسالدى. بىراق، ءالى ەشتەڭە وزگەرگەرە قويعان جوق. ءبارى باياعى كۇيىندە تۇر!

كوشى-قون ساياساتىنىڭ 2023–2027 جىلدارعا ارنالعان وسى «تۇجىرىمداماسىنىڭ» جوباسى جاريالانعاننان ساتتەن باستاپ، مەن تامارا دۇيسەنوۆاعا حات جازىپ، «قۇرمەتتى تامارا بوسىمبەكقىزى، ءوزىڭىز باسقارىپ وتىرعان مينيسترلىكتىڭ قاسىنان قۇرىلعان جۇمىس توبىنا راقىم ايىپۇلى، قايرات بوداۋحان ۇشەۋىمىزدى قوسىڭىزشى!»،-دەپ، جالىنۋمەن بولدىم.

تاماراعا ءسوزىم وتپەگەن سوڭ، «كوشى-قون ساياساتىنىڭ 2023-2027 جىلدارعا ارنالعان تۇجىرىمداماسىن جاساۋعا، سونداي-اق ماجىلىستەگى جۇمىس توبىندا بولىپ، زاڭنامالاردى رەتتەۋگە كومەكتەسۋىم ءۇشىن مۇمكىندىك جاساپ بەرۋىڭىزدى سۇرايمىن. قۇزىرلى ورگاندارمەن سايكەسە وتىرىپ، مەملەكەت پەن حالىققا ءتيىمدى كەمەلدى باعدارلاما جاساۋعا دايىنمىن!»,-دەپ، پرەزيدەنتتىڭ اتىنا دا حات جازىپپىن.

قالاي دەسەك تە، راقىم، قايرات ۇشەۋىمىز ەكى مەملەكەتتە ءومىر ءسۇرىپ كورگەن، وسى كوشى-قون ساياساتىنىڭ اينالاسىندا ۇزاق جىلداردان بەرى كەلە جاتقان  تاجىريبەلى ماماندارمىز عوي. مەملەكەتىمىزگە پايدامىز تيمەسە، كەسىرىمىزدىڭ تيمەسى انىق. جەمقورلىققا جول بەرمەيتىن جوبا جاساپ بەرۋگە ءبىز دايىندىعى بار جىگىتتەرمىز...

ونى قويىپ، تامارا حانىم مەنىڭ 2013 جىلدان بەرى قازاق كوشىن تيمۋر قۇلىباەۆ پەن كارىم ءماسىموۆتىڭ تەمىر تەگەۋىرىنەن امان الىپ قالۋعا، كوشى-قون ءۇردىسىن رەتتەۋگە ارنالعان زاڭدار مەن نورماتيۆتىك قۇجاتتارعا ەلەۋلى وزگەرىستەر مەن تولىقتىرۋلار ەنگىزۋگە قالاي ىقپال ەتكەنىمدى وتە جاقسى بىلەدى.

نەگە ەكەنىن بىلمەيمىن، بىراق ول بۇل جولى ءبىزدى ماڭىنا جولاتقان جوق!

پرەزيدەنتكە جازعان حاتىمىزدى دا ءبىر وپسىز قولدار يەسىنە جەتپەگەن كۇيى، تامارا باسقاراتىن مينيسترلىككە قاراي سىرعىتا سالدى...

سونداعى، تامارا دۇيسەنوۆانىڭ جاساعان «تۇجىرىمداماسى» مەن شىعارعان بۇيرىعىنىڭ ءتۇرى – مىناۋ!

مىنە، «تۇجىرىمداماسى» دىتتەگەن بەس جىل تۇرماق، ەكى جىلعا جەتپەيتىن ۋاقىتتىڭ ىشىندە حالىقتىڭ قان-تەرىمەن كەلگەن ءبىر ميللياردتان استام تەڭگەنى جەلگە ۇشىردى.

بەكەر وبالى كانە، قاسىم-جومارت كەمەلۇلى پرەزيدەنت بولعالى كوشى-قون، شەتتەگى قانداستار ماسەلەسىنە ون ءبىر مارتە قايىرىلىپ، ۇكىمەتكە تاماشا تاپسىرمالار مەن كەرەمەت نۇقاۋلار بەرۋىن – بەردى-اق.

اسقار ءمامين مەن ءاليحان سمايىلوۆ باسقارعان ۇكىمەت سونىڭ بىرەۋىن اتقارعان جوق. كەرىسىنشە، ۇلى كوشتى توقتاتۋعا بارىن سالدى جانە ول پروتسەسس ءالى جالعاسۋدا!

قايرات بوداۋحان دەگەننەن ەسكە تۇسەدى، كەزىندە موڭعوليادان كەلگەن قانداسىمىز، بەلگىلى قوعام قايراتكەرى قايرات بوداۋحان اناۋ جىلى ۇكىمەتتەن ءبىر تيىن قاراجات الماي، الماتىنىڭ شەتىنەن 230 وتباسىنا ارنالعان «بايبەسىك» دەگەن جاڭا اۋىل قۇرىپ شىقتى.

قازىر سول «بايبەسىك» الماتىداعى ەڭ اۋقاتتى اۋىلداردىڭ بىرىنە اينالىپ، تۇرعىندارى باي-باقىتتى ءومىر ءسۇرىپ جاتىر.

سوسىن، قايرات بوداۋحان مىرزا استانانىڭ شەتىنەن كىلەڭ ەكى قاباتتىق كوتەدجدەن تۇراتىن «نۇربەسىك» اتتى 220 وتباسىلىق تاعى ءبىر شاعىن اۋدان قۇردى. وعان دا ۇكىمەتتىڭ سوقىر جارماعىن شىعىنداعان جوق، ءوز بەتىمەن جۇزەگە اسىردى.

قۇرلىسى، 2007 باستالىپ، العاشقى ۇيلەرى 2015 جىلدارى قولدانىسقا بەرىلە باستاعان سول «نۇربەسىكتىڭ» قۇجاتتارىن استانا قالاسىنىڭ اكىمدىگى راسىمدەپ بەرمەي، ون جىلدان استام سارساڭعا سالعانىن بۇكىل دۇنيەجۇزى بىلەدى.

قايرات بوداۋحان مەن «نۇربەسىك» تۇرعىندارىنىڭ ون ەكى جىل بويى استانادا قاقپاعان ەسىگى، بارماعان باسشىسى قالعان جوق.

ءتىپتى، ەكى پرەزيدەنتتىڭ اتانا قانشاما حاتتار جازعانىمەن، ونداعىلار ول حاتتارىن دىتتەگەن جەرىنە جەتكىزبەي قاسارىستى...

قۇداي تىلەۋىڭدى بەرگىر جەڭىس قاسىمبەك استانا قالاسىنا قالاي اكىم بولىپ كەلدى،  «نۇربەسىكتىڭ» باعى سولاي جانىپ سالا بەردى.

مىڭ بولعىر جەڭىس ماحمۇدۇلى 2023 جىلداپ باستاپ، اتالعان ىقشام اۋدان تۇرعىندارىنا باسپانالارىنىڭ قۇجاتتارىن زاڭداستىرۋدى باستادى.

ءسويتىپ، ءبىزدىڭ اتقارۋشى بيلىك قايرات بوداۋحاننىڭ سول باي تاجىريبەسىن، شىعىنسىز دايىن جوباسىن مەملەكەتتىڭ مۇددەسىنە پايدالانۋدىڭ ورنىنا، قارالاۋ كومپانياسىن ۇيىمداستىرىپ، بالەقور-جالاقورلاردى ايداپ سالىپ، ونىڭ سوڭىنان يت قوسىپ قۋمەن بولدى عوي.

قايركەڭ جىگىت ەكەن، بىلق ەتكەن جوق. اتقارۋشى بيلىكتىڭ سول يتتىكتەرىنىڭ بارىنە شىدادى. استاناعا اكىم بولىپ يماندى، ادىلەتتى تۇلعا كەلىپ ەدى، مىنە، جەڭىپ شىقتى...

***

مەملەكەت باسشىسى: «ادال ازامات» كونتسەپتسياسىن جولعا قويىپ، وعان  «جاقسى قاسيەتتەرگە يە بولىپ، ادال ەڭبەك ەتەتىن جانە تابىسقا ادال جولمەن جەتەتىن، ادالدىق پەن ادىلدىكتى بارىنەن بيىك قوياتىن ادام!» دەگەن انىقتاما بەردى.

ءسويتىپ، «ادال ازاماتتارعا» سۇيەنىپ، «جاڭا، ادىلەتتى، تازا قازاقستان» قۇرۋدى قولعا الدى.

پرەزيدەنتتىڭ بۇل كونتسەپتسياسىن ەلىمىزدىڭ باس يدەولوگى: «بۇل – قانداي دا ءبىر قاتىپ قالعان قاعيدالاردى ۇگىت-ناسيحات ارقىلى جاساندى تۇردە جاپپاي ساناعا ءسىڭىرۋ ەمەس، كەرىسىنشە، ءبىزدىڭ قوعامنىڭ رۋحاني بىرلىگىن نىعايتا تۇسەتىن شىنايى قۇندىلىقتاردى دارىپتەۋ دەگەن ءسوز»,-دەپ ءتۇسىندىردى بىزگە.

ەندەشە، ءبىزدىڭ قوعامنىڭ رۋحاني بىرلىگىن نىعايتا تۇسەتىن شىنايى قۇندىلىقتاردى دارىپتەيتىن سول «ادال ازاماتتار»، ەڭ الدىمەن، پرەزيدەنتتىڭ اينالاسىنا توپتالعان دەپ بىلەدى جۇرت!

سونىڭ ءبىرى ءارى بىرەگەيى – قازاقستان رەسپۋبليكاسىنىڭ پرەزيدەنتىنە ىشكى ساياسات سالاسى بويىنشا ستراتەگيالىق ۇسىنىستاردى تۇجىرىمدايتىن جىگىت، تاعى ءبىرى – تامارا دۇيسەنوۆا، جانە بىرەۋى – سول كەزدەگى پرەزيدەنت اكىمشىلىگى توراعاسىنىڭ كوشى-قون سالاسىن كۋريروۆات ەتكەن ورىنباسارى، قازىر ءبىر مينيسترلىكتى باسقارىپ وتىرعان انەۋ سۇلۋ كەلىنشەك بولسا كەرەك!

وعان اپارىپ، وسى «تۇجىرىمدامانى» بەكىتكەن كەزدەگى پرەمەر-مينيستر، قازىرگى جوعارى اۋديتورلىق پالاتانىڭ توراعاسىن دا قوسىپ قويىڭىز.

وسىناۋ ءبىر ميلليارتتان استام تەڭگەنى قولدى قىلۋعا داڭعىل جول اشىپ بەرگەن «كوشى-قون ساياساتىنىڭ 2023-2027 جىلدارعا ارنالعان تۇجىرىمداماسى» مەن №234 بۇيرىق جالعىز ءمينيستردىڭ – تامارا دۇيسەنوۆانىڭ عانا قولىنان شىقتى دەسەك، بۇل – بارىپ تۇرعان ادىلەتسىزدىك بولادى.

ول «تۇجىرىمداما» مەن №234 بۇيرىق جوعارىدا ءبىز لاۋازىمدارى مەن اتىن اتاعان تۇلعالاردىڭ ءبارىنىڭ الدىنان ءوتتى.

ءبىز كۇندىز-ءتۇنى دۋىلداتىپ سىناپ كەلەمىز.

ولاردىڭ بىرەۋى مىڭق ەتكەن ەمەس!

قازىر دە بەتتەرى بۇلك ەتپەستەن بيلىكتە ومالىپ-ومالىپ وتىر.

بىراق، ءبىزدىڭ سول جانايقايىمىزدى ەڭ كەمىندە، ول كىسىلەردىڭ قۇلاقتارى شالدى عوي...

سول ءۇشىن، ولاردىڭ دا جاۋاپكەرشىلىگى بار!

ەگەر، ولاردىڭ بويىندا «ۇيات»، «ار»، «نامىس» دەگەن قاسيەتتەر بولسا، قونىس اۋدارۋ باعدارلاماسىنا بولىنگەن ءبىر ميللياردتان استام تەڭگەنىڭ ۇرلانعانى تۋرالى اقپارات تاراعان كۇننىڭ ەرتەسى، تامارا دۇيسەنوۆا باستاپ، بىردەن ارىزدارىن جازىپ، پرەزيدەنت پەن ۇلى كوشكە مۇددەلى قاۋىمنان كەشىرىم سۇراپ، ءوز ەرىكتەرىمەن قىزىمەتتەرىنەن تۇگەل كەتۋلەرى كەرەك قوي!

بۇلار ايتەۋ بيلىككە ءبىر ءىلىنىپ السا بولدى، سۇيرەتىلىپڭ ءىلىنىپ-سالىنىپ  جۇرە بەرەدى ەكەن عوي. بۇگىن مىنا قىزمەتتەن كەتسە، ەرتەڭ سىعىرايىپ انا كرەسلوعا بارىپ قونجيا كەتەدى ەكەن. «قۇرمەتتى پرەزيدەنت، مىنا قىزمەتتى اتقارۋ مەنىڭ قولىمنان كەلمەيدى! كەشىرىڭىز، ىستەي المايمىن!..» دەگەن ءسوز ولاردىڭ اۋزىنان شىققان ەمەس، شىعاتىن دا ءتۇرى كورىنبەيدى...

ولاردا ونداي مادەنيەت پەن ەتيكا دەگەن اتىمەن جوق ەكەن. قىزمەتتەن كەتەتىن تۇرلەرى بايقالمايدى. پرەزيدەنت كوشى-قونعا ارناپ تاعى ءبىر «تۇجىرىمداما» جاساڭدار دەسە، باتشاعارلار ونى دا جاساپ، ودان دا اقشا جىقىرۋعا جول اشاتىن تەتىك قاراستىرۋعا دايىن وتىرعان سەكىلدى...

«ۇلت»، «مەملەكەت»، «پرەزيدەنتتىڭ بۇگىنگى بەدەلى مەن ەرتەڭگى تاريحي ورنى» دەگەندى ويلامايتىن وڭكەي قارعىس اتقىرلارعا قور بولعان ەسىل سوزدەرىم مەن التىن ۋاقىتىم-اي دەشى!

بار سۇيەنەرىمىز – ءبىرىنشى قۇداي، سوسىن قاسىم-جومارت توقاەۆ قانا!

باسقاسىنان قايىر جوق!!!

ءسوز سوڭىندا قاسەكەڭنەن،

ءبىرىنشى، «قازاقستان رەسپۋبليكاسى كوشى-قون ساياساتىنىڭ 2023 – 2027 جىلدارعا ارنالعان تۇجىرىمداماسىنىڭ» كۇشىن جويۋدى;

ەكىنشى، پرەمەر ءمينيستردىڭ ورىنباسارى تامارا دۇيسەنوۆا مەن ونىڭ اتالعان «تۇجىرىمدامانى» جاساۋعا قاتىسقان بۇرىنعى كومانداسىن جانە وعان قول قويعان بۇرىنعى پرەمەر-ءمينيستردى، سونداي-اق پرەزيدەنت اكىمشىلىگى باسشىسىنىڭ كوشى-قون سالاسىن كۋريروۆات ەتكەن ورىنباسارىن تۇگەل قىزمەتتەن الىپ، جاۋاپقا تارتۋدى;

ءۇشىنشى، كوشى-قون ءۇردىسىن باسىنان وتكەرگەن جانە سول سالانىڭ ساياساتىمەن اينالىسىپ كەلە جاتقان تاجىريبەلى مامانداردان قۇرالعان جۇمىس توبىن مينيسترلىكتىڭ دەڭگەيىندە بەكتىپ، سولاردىڭ قاتىسىمەن كوشى-قون ساياساتىنىڭ جاڭدان بەس جىلدىق «تۇجىرىمداماسىن» دايىنداتۋدى، سول «تۇجىرىمدامانىڭ» نەگىزىندە كوشى-قون ءۇردىسىن رەتتەۋگە ارنالعان بارلىق زاڭدار مەن نورماتيۆتىك قۇجاتتاردى تۇگەل قايتا قارۋدى  سۇرايمىن!

اۋىت مۇقيبەك، 

           «قۇرمەت» وردەنىنىڭ يەگەرى