سەنات دەپۋتاتى امانگەلدى تولاميسوۆ اتوم ەلەكتر ستانساسىن سالۋ بويىنشا حالىق ءوز تاڭداۋىن جاساعانىن ايتتى.

ونىڭ ايتۋىنشا، كەشەگى وتكەن رەفەرەندۋم ەلىمىزدىڭ بولاشاعى ءۇشىن ماڭىزدى، قوعامدا قىزۋ تالقىدا بولعان.

–  رەفەرەندۋم – بۇل ەلىمىزدىڭ ەڭ وزەكتى دەگەن ماسەلەلەردى حالىق بولىپ شەشۋدىڭ تەتىگى. اتوم ەلەكتر ستانساسىن سالۋ بويىنشا حالىق ءوز تاڭداۋىن كورسەتتى. رەفەرەندۋمنىڭ الدىن الا ناتيجەلەرى بويىنشا، داۋىس بەرگەندەردىڭ تورتتەن ءۇش بولىگى كەلىسىمىن بەردى، –  دەگەن ول.

سەناتور مەملەكەت باسشىسى جولداۋىندا رەفەرەندۋم كۇنى بەلگىلى بولعان كۇننەن باستاپ، الەۋمەتتىك جەلىلەردە، ەل ورتاسىندا وسى ماسەلەنىڭ تالقىعا تۇسكەنىن ايتتى.

–  كوبىنەسە اتوم ەنەرگەتيكاسى سالاسىنا قاتىسى جوق ادامداردىڭ نەگىزسىز، ەموتسياعا نەگىزدەلگەن اقپاراتتارى مەن ءارتۇرلى اتوم ەنەرگياسى بويىنشا اڭىزدار ەل اراسىندا تاراي باستادى. بىراق رەسپۋبليكالىق جانە وڭىرلىك شتابتار قۇرىلىپ، ناقتى ماماندارمەن بىرلەسىپ جۇرگىزىلگەن تۇسىندىرمە جۇمىستارى ناتيجەسىندە، حالىق ناقتى اقپاراتتاردان قۇلاعدار بولىپ، وزدەرىن الاڭداتقان سۇراقتارعا جاۋاپ الىپ، ءوز تاڭداۋىن جاسادى. جالپى، وسى وتكەن رەفەرەندۋم ازاماتتىق قوعام مەن ەلدىڭ دەموكراتيالىق ينستيتۋتتارىن نىعايتۋداعى ماڭىزدى قادام بولدى. مۇنىمەن قوسا، جۇرتشىلىق وسى ماسەلە بويىنشا سىندارلى ديالوگكە قاتىسىپ، بۇل رەفەرەندۋمنىڭ دەڭگەيىن ساپالى تۇردە كوتەرىپ، ونىڭ ەلىمىزدىڭ ساياسي تاريحى ءۇشىن جوعارى ماڭىزدىلىعىن كورسەتتى، –  دەيدى ول. 

دەرەككوزى: ايقىن گازەتى

Abai.kz