قازاقستان پرەزيدەنتى حالىققا سوڭعى جولداۋىندا ەسىرتكى زاتتارىن تۇتىنۋدىڭ وسۋىنە الاڭداۋشىلىق ءبىلدىرىپ، بۇل ماسەلەنىڭ ۇلت دەنساۋلىعىنا ايتارلىقتاي قاۋىپ توندىرەتىنىن اتاپ ءوتتى. وسىعان بايلانىستى، ەسىرتكى ءوندىرۋ جانە تاراتۋعا قارسى كۇرەس بۇكىلحالىقتىق سيپات الۋى ءتيىس.

مەملەكەت باسشىسىنىڭ تاپسىرماسىنا سايكەس، كولىك پروكۋراتۋراسى جانە باسقا دا قۇقىق قورعاۋ ورگاندارى ەسىرتكى بيزنەسىنە قارسى كۇرەستى، شەكارادا جۇكتەر مەن پوشتا جونەلتىلىمدەرىن باقىلاۋدى كۇشەيتتى، شەتەلدەن ەلىمىزگە ەسىرتكىنىڭ زاڭسىز اكەلىنۋىن بولدىرماۋ ماقساتىندا شارالار قابىلدادى.

تەك 2024 جىلدىڭ وزىندە زاڭسىز اينالىمنان 1 توننادان استام ەسىرتكى زاتتارى تاركىلەندى، ونىڭ ىشىندە 774 كگ گەروين، 155 كگ ماريحۋانا، 37 كگ گاشيش جانە گاشيش مايى، 34 كگ كوكنار، سونداي-اق 1 كگ سينتەتيكالىق ەسىرتكى بار. تاركىلەنگەن زاتتاردىڭ «قارا نارىقتاعى» قۇنى 7 ميلليارد تەڭگەدەن استام دەپ باعالانىپ وتىر.

يراننان گەرويننىڭ ءىرى پارتياسىن اكەلۋدىڭ جولى كەسىلدى، ونى قىلمىستىق توپ تۇرمىستىق تاۋارلار رەتىندە جاسىرۋعا تىرىسقان بولاتىن.

سونىمەن قاتار، ەۋروپا، اقش جانە تايلاندتان كەلگەن ەسىرتكى زاتتارى بار 50-دەن استام پوشتا جولدانىمدارى ۇستالدى.

مىسالى، قارجىلىق مونيتورينگ اگەنتتىگى اقش-تان ەسىرتكى زاتتارىن پوشتا ارقىلى كونتراباندالىق جولمەن جەتكىزەتىن جۇيەلى ارنانى جويدى. ناتيجەسىندە ون كۇدىكتى ۋاقىتشا ۇستاۋ يزولياتورىنا قامالىپ، 15 كگ كاننابيس سىعىندىسى جانە 8 كگ ماريحۋانا تاركىلەندى.

21 سوتتالۋشى تۇرمەگە قامالدى، اراسىندا شەتەل ازاماتتارى دا بار.

مەملەكەت ەسىرتكىنىڭ زاڭسىز اينالىمىن توقتاتۋ جۇمىسىن جالعاستىرىپ، باقىلاۋ شارالارىن كۇشەيتىپ، حالىقارالىق سەرىكتەستەرمەن ىنتىماقتاستىقتى ارتتىرۋدا.

Abai.kz