«مايدانداعى الداعى ءتورت-بەس اي ماڭىزدى بولادى جانە ەكى جاق بەيبىتشىلىك كەلىسسوزدەرىنە تۇسەتىن ۇستانىمداردى انىقتايدى»، - دەپ حابارلايدى «Reuters» اگەنتتىگى.

«Reuters» تىلشىلەرى ۋكراينانىڭ جوعارى لاۋازىمدى شەنەۋنىگىمەن سويلەسكەن. اتى-ءجونىن جاسىرىپ قالۋدى ءجون كورگەن شەنەۋنىك: «دونالد ترامپتىڭ اق ۇيگە ورالۋى – كيەۆكە سوعىستىڭ اياقتالۋى مۇمكىن ەكەنىنەن نۇسقايدى. ۋكراينا ءۇشىن وسى قىس وتە ماڭىزدى. سوعىس اياقتالىپ كەلەدى دەپ ۇمىتتەنەمىن. ءدال قازىر ءبىز كەلىسسوزدەردەگى ەكى جاقتىڭ ۇستانىمدارىن، باستاپقى ۇستانىمدارىن انىقتايتىن بولامىز»، - دەيدى.

سپيكەردىڭ پىكىرىنشە: ترامپتىڭ ۋكرايناعا قاتىستى ساياساتى قانداي بولاتىنى – ونىڭ قورعانىس پوزيتسيالارىنا كىمدەردى تاعايىندايتىنىنا بايلانىستى بەلگىلى بولماق.

اقش-تا مايك پومپەو دەيتىن ادام بار. اقش-تىڭ بۇرىنعى مەملەكەتتىك حاتشىسى. ۋكراينانى قولدايتىن ادام. سول پومپەونىڭ ترامپ كومانداسىنا كىرمەيتىنى قازىردىڭ وزىندە بەلگىلى بولىپ وتىر.

«Reuters» تىلشىلەرى سويلەسكەن ۋكراينا شەنەۋنىگى: «ترامپتىڭ جەڭىسىنەن كەيىن ۋكراينانىڭ ناتو-عا شاقىرىلۋ «مۇمكىندىگى از». ترامپتىڭ تۇسىندا اسكەري كومەكتى قىسقارتۋ قاۋپى دە بار. بايدەن اكىمشىلىگى ۋكرايناعا كومەك كورسەتۋ جىلدامدىعىن تەزدەتۋ ارقىلى بۇل تاۋەكەلدى بولدىرماۋعا تىرىسادى دەپ ۇمىتتەنەمىن»، - دەيدى.

ءارى قاراي ۋكراينا شەندىسى بايدەن اكىمشىلىگى كەزىندە اقش تاراپىنان ۋكرايناعا كومەك ماسەلەسى جەتكىلىكتى بولماعانىن ايتادى. «ۋكرايناداعى كوڭىل-كۇي وتە مازاسىز. زەلەنسكيدىڭ سوڭعى ەسكەرتۋلەرىنەن مازاسىزدىقتىڭ كۇشەيىپ كەلە جاتقانىن كورۋگە بولادى»، - دەيدى.

دونالد ترامپ كەلەر جىلدىڭ 20 قاڭتارىندا اقش-تىڭ جاڭا سايلانعان پرەزيدەنتى رەتىندە انت بەرەدى. وسى كۇنگە دەيىن قازىرگى بايدەن اكىمشىلىگى ۋكرايناعا كونگرەسس ماقۇلداعان بارلىق كومەكتى جىبەرۋگە تىرىسادى. ۋكراينا اق ءۇيدىڭ جاڭا اكىمشىلىگى ۋكراينانى كەلىسسوزدەرگە يتەرمەلەۋ ءۇشىن اسكەري جەتكىزىلىمدەردى قىسقارتادى دەپ بولجايدى. سوندىقتان، كيەۆ ءوزىنىڭ كەلىسسوزدەر پوزيتسيالارى مەن قورعانىس مۇمكىندىكتەرىن نىعايتۋعا ۇمىتتەنەدى.

سايلاۋالدى ناۋقانى كەزىندە ترامپ ۋكرايناداعى سوعىستى اياقتايتىنىن بىرنەشە رەت ايتقان، بىراق قالاي ەكەنىن ايتپاعان.

Abai.kz