ەلوردا تۇرعىنىن باسپانا الاپ بەرەمىن دەپ تانىسى الداپ كەتكەن. استانا قالاسى پوليتسيا دەپارتامەنتى ءباسپاسوز قىزمەتىنىڭ مالىمەتىنشە، جابىرلەنۋشى تارتىمدى ۇسىنىستى قابىلداپ، الايدا كوپتەن كۇتكەن باسپاناسىنا يە بولا الماعان.

ول قىلمىسكەرگە 1 ملن 500 مىڭ تەڭگەدەن استام سوماعا الدانىپ قالعان. كەيىن الدانعانىن تۇسىنگەن ەلوردا تۇرعىنى پوليتسياعا جۇگىنگەن.

- جەدەل-ىزدەستىرۋ ءىس-شارالارىنىڭ كولەمىندە بايقوڭىر اۋدانىنىڭ كريمينالدىق پوليتسيا قىزمەتكەرلەرى كۇدىكتىنىڭ تۇلعاسىن انىقتادى. قاراجاتتى الاياقتىقپەن يەمدەنىپ، وسىلايشا، ماتەريالدىق شىعىن كەلتىرگەن 35 جاستاعى ايەل ادام ەكەنى ءمالىم بولدى، - دەلىنگەن استانا قالاسى پد حابارلاماسىندا.

كۇدىكتى قىلمىسىن مويىندادى. الايدا جابىرلەنۋشىگە اقشاسى قايتارىلمادى، ويتكەنى قىلمىسكەر قاراجاتتى ءار ءتۇرلى شوتتارعا جىبەرگەن.

- الاياقتىق فاكتىسى بويىنشا قىلمىستىق ءىس قوزعالدى. تەرگەۋ بارىسىندا كۇدىكتىنىڭ تاعى دا ۇقساس قىلمىستارعا قاتىستىلىعى انىقتالدى. قازىرگى تاڭدا قىلمىسكەر اباقتىعا قامالدى، - دەپ حابارلادى قالالىق پوليتسيا دەپارتامەنتى.

پوليتسيا بارلىق جاعدايدى تەكسەرۋ جانە قىلمىسكەردىڭ مۇمكىن بولاتىن بايلانىستارىن انىقتاۋ ماقساتىندا تەرگەۋدى جالعاستىرۋدا.

Abai.kz