21 قاڭتار كۇنى ەنەرگەتيكا ءمينيسترى الماسادام ساتقاليەۆ باستاعان قازاقستاندىق دەلەگاتسيا رەسەيگە جۇمىس ساپارىمەن باردى.   اتالعان مينيسترلىكتىڭ حابارلاۋىنشا، قازاقستان اتوم ەلەكتر ستانتسياسىن (اەس) سالۋ تەحنولوگياسىن تاڭداۋ ماقساتىندا وتكىزىلگەن ساپارلار سەرياسىن اياقتادى.

«بۇل ساپاردىڭ باستى ماقساتى – اتوم ستانتسيالارىن پايدالانۋداعى تاجىريبەمەن تانىسۋ جانە 3+ بۋىن ۆۆەر-1200 رەاكتورلارى بار ەنەرگەتيكالىق بلوكتاردىڭ تەحنولوگياسىن زەرتتەۋ بولدى. دەلەگاتسيا لەنينگراد اەس-ىنە بارىپ، ستانتسيانىڭ نەگىزگى تەحنيكالىق ەرەكشەلىكتەرىن، ونىڭ ىشىندە باسقارۋ ءپۋلتىن، تۋربينالىق ءبولىمدى، زەرتحانالىق كەشەندى جانە سالقىنداتۋ جۇيەسىن زەردەلەدى»، – دەپ جازدى مينيسترلىك.

رەسمي دەرەككوزدەرگە نەگىزدەلسەك، ۆۆەر-1200 رەاكتورى «روساتوم» مەملەكەتتىك كورپوراتسياسىنىڭ جەتەكشى جوبالارىنىڭ ءبىرى بولىپ تابىلادى. بۇل رەتكى رەسەيگە ساپار قازاقستاندا اتوم ەلەكتر ستانتسياسىن سالۋعا ارنالعان تەحنولوگيالىق سەرىكتەستىكتى انىقتاۋ بويىنشا سوڭعى قادام ەكەنى بەلگىلى. وسى ماسەلە بويىنشا وسىعان دەيىن دەلەگاتسيا قۇرامى وڭتۇستىك كورەيا، فرانتسيا جانە قىتايعا بارىپ قايتقان بولاتىن.

ال جۇرتتىڭ نازارىن اۋدارعان قازاقستاندا سالىنۋعا ءتيىس اەس قۇرىلىسىنا ۇمىتكەر كومپانيالاردىڭ قىسقاشا تىزىمىندە رەسەيلىك «روساتوم»، قىتايلىق CNNC, كورەيالىق KHNP جانە فرانتسۋزدىق EDF كىرىپ وتىر.  مينيستر ساتقاليەۆتىڭ ايتۋىنشا، لەنينگراد اەس-ىنە بارۋ ارقىلى دەلەگاتسيا ستانتسيانىڭ جۇمىس ىستەۋ تەحنولوگياسىن، سونداي-اق قورشاعان ورتانى قورعاۋ جانە جەرگىلىكتى تۇرعىنداردىڭ قاۋىپسىزدىگىن قامتاماسىز ەتۋ شارالارىن مۇقيات زەرتتەلدى. سونىمەن بىرگە مينيسترلىك جەتكىزۋشىنى تاڭداۋ تۋرالى سوڭعى شەشىم بيىل قابىلداناتىنىن، ۇلتتىق مۇددەلەر، حالىقارالىق ستاندارتتار جانە ماگاتە ۇسىنىمدارى ەسكەرىلەتىنىن مالىمدەدى.

ەستەرىڭىزگە سالا كەتسەك، قاڭتاردىڭ باسىندا پرەزيدەنت قاسىم-جومارت توقاەۆ ۇكىمەتكە اەس قۇرىلىسىنىڭ قارقىنىن جەدەلدەتۋدى تاپسىرعان بولاتىن. بۇعان دەيىن، قاراشا ايىندا، پرەمەر-مينيستر ولجاس بەكتەنوۆ پەن «روساتوم» باسشىسى الەكسەي ليحاچەۆ اتوم ەنەرگەتيكاسى جانە كۆانتتىق تەحنولوگيالار سالاسىنداعى ىنتىماقتاستىق ماسەلەلەرىن تالقىلاعان.

Abai.kz