دۋبايدا تhe UAE SWAT Challenge 2025 حالىقارالىق جارىستارى جالعاسۋدا. وندا 100-دەن استام ەلدىڭ كۇشتىك قۇرىلىمدارىنىڭ ارنايى بولىنىستەرىنىڭ قىزمەتكەرلەرى باق سىناپ جاتىر، - دەپ حابارلايدى Polisia.kz.

"سۇڭقار" ءبولىنىسىنىڭ جاۋىنگەرلەرى جارىستىڭ ءبىرىنشى جانە ءۇشىنشى كۇندەرىنىڭ ناتيجەلەرى بويىنشا كوش باستاپ، جەڭىستى جولدى جالعاستىرۋدا.

قازاقستان ءىىم قىزمەتكەرلەرى "وفيتسەردى قۇتقارۋ" دەپ اتالاتىن ءۇشىنشى كەزەڭنەن ءساتتى ءوتىپ، اتىس دايىندىعى مەن جاۋىنگەرلىك ەپتىلىگىن كورسەتتى. ناتيجەسىندە ولار بارلىق سىناقتى 2 مينۋت 11 سەكۋندتا اياقتادى.

پوليتسەيلەر سايىستا سىنعا ءتۇسىپ جاتقان ارىپتەستەرىنىڭ ۆيدەولارىمەن ءبولىسىپ، قولداۋ كورسەتىپ جاتىر. وتانداستارىنىڭ جەڭىسىنە دۋبايدا جۇرگەن ءبىزدىڭ ازاماتتار دا قۋانۋدا. قازاقستانداعى كورەرمەن دە ءتۋرنيردى تىكەلەي ەفيردە تاماشالاۋدا.

ء"بىزدى قولداعان جانداردىڭ بارىنە راقمەت. جەرلەستەردىڭ لەبىزى بىزگە كۇش-جىگەر سىيلايدى", - دەدى جاۋىنگەرلەر.

ەستەرىڭىزگە سالا كەتەيىك، ءتۋرنيردىڭ ءبىرىنشى كۇنى دە "سۇڭقار" كومانداسى "التىن" جەڭىپ العان بولاتىن. ءۇش كۇننىڭ قورىتىندىسى بويىنشا ءىىم كومانداسى ءتۋرنيردىڭ جالپى كەستەسىندە ەكىنشى ورىندى يەلەنىپ تۇر. ودان بولەك، ۇزدىك ون كوماندانىڭ اراسىندا ۇلتتىق ۇلان، "Sardar B" (مكق) جانە ۇقك-نىڭ ەكى كومانداسى (Arystan Team جانە SSN Aktau) بار.

وتكەن جىلى "سۇڭقار" جاۋىنگەرلەرى ۇيىمشىلدىعىمەن ەرەكشەلەنگەن ەدى. قاتىسۋشىلاردىڭ ءبىرى اياعىن سىندىرىپ العانىنا قاراماستان، كوماندا مارە سوڭىنا دەيىن جەتىپ، كورەرمەننىڭ كوزايىمىنا اينالعان بولاتىن.

Abai.kz