كەشە ساۋديادا اقش پەن ۋكراينانىڭ دەلەگاتسياسى 7 ساعاتتان استام كەلىسسوز جۇرگىزدى. جيدداداعى اقش جانە ۋكراينا دەلەگاتسياسىنىڭ كەزدەسۋىنەن كەيىنگى بىرلەسكەن مالىمدەمەسىن نازارلارىڭىزعا ۇسىنايىن. ءماتىن ۋكراينا پرەزيدەنتىنىڭ سايتىندا جاريالاندى:

«بۇگىن ساۋد ارابياسىنىڭ جيددا قالاسىندا، تاق مۇراگەرى، حانزادا مۇحاممەد بين سالماننىڭ قوناقجايلىلىعىمەن ۋكراينا مەن اقش-تىڭ دەلەگاتسياسى ۋكراينادا مىزعىماس بەيبىتشىلىك ورناتۋ ءۇشىن ماڭىزدى قادامدار جاسادى.

قوس تاراپتىڭ وكىلدەرى دە ۋكراين حالقىنىڭ ەرلىگىن اتاپ ءوتىپ، مەملەكەتتىڭ تاۋەلسىزدىگى جولىنداعى كۇرەسىنە توقتالدى جانە بەيبىتشىلىك ورناتاتىن ءسات كەلدى دەگەنگە كەلىستى.

ۋكراينانىڭ دەلەگاتسياسى اقش پرەزيدەنتى ترامپقا، اقش كونگرەسسى مەن اقش حالقىنا كومەكتەرى ءۇشىن العىس ايتتى جانە بەيبىتشىلىك جولىندا جاساعان قادامدارىن جوعارى باعالادى.

ۋكراينا اقش تاراپى ۇسىنعان ۇرىس قيمىلدارىن دەرەۋ ارادا 30 كۇنگە توقتاتۋ ۇسىنىسىن قابىلداۋعا ءازىر ەكەنىن ايتتى جانە بۇل ۇرىستى توقتاتۋ تاراپتاردىڭ كەلىسىمى بويىنشا ۇزارتىلۋى مۇمكىن. اقش تاراپى بەيبىتشىلىككە قول جەتكىزۋ ءۇشىن رەسەيدەن دە ءتيىستى ارەكەتتەردى كۇتەدى.

امەريكا قۇراما شتاتتارى بارلاۋ قىزمەتىنىڭ اقپارات الماسۋداعى ءۇزىلىسىن دەرەۋ ارادا الىپ تاستاپ، ۋكرايناعا قاۋىپسىزدىك سالاسى بويىنشا كومەكتى قالپىنا كەلتىرەدى.

دەلەگاتسيالار سونداي-اق بىتىمگەرشىلىك پروتسەسىنىڭ ءبىر بولىگى رەتىندە گۋمانيتارلىق ميسسيالاردىڭ ماڭىزدىلىعىن، اتاپ ايتقاندا، جوعارىدا اتالعان ۇرىستى توقتاتۋ كەزىندە اسكەري تۇتقىنداردى الماسۋ، كۇشتەپ ۇستاپ وتىرعان بەيبىت تۇرعىنداردى قايتارۋ جانە كۇشتەپ قونىس اۋدارىلعان ۋكراين بالالارىن قايتارۋ ماسەلەسىنە دە توقتالدى.

ەكى دەلەگاتسيا دا ۋكراينانىڭ ۇزاق مەرزىمدى قاۋىپسىزدىگىن قامتاماسىز ەتەتىن تۇراقتى بەيبىتشىلىككە قول جەتكىزۋ ءۇشىن كەلىسسوز جۇرگىزەتىن توپتاردىڭ قۇرامىن انىقتاۋعا جانە كەلىسسوزدەردى دەرەۋ باستاۋعا كەلىستى. امەريكا قۇراما شتاتتارى بۇل ناقتى ۇسىنىستاردى رەسەيلىك وكىلدەرمەن تالقىلاۋعا مىندەتتەندى. ۋكراينا دەلەگاتسياسى ەۋروپالىق ارىپتەستەرىنىڭ بىتىمگەرشىلىك پروتسەسىنە قاتىسۋى كەرەكتىگىن تاعى دا باسا ايتتى.

سايىپ كەلگەندە، ەكى ەلدىڭ پرەزيدەنتتەرى ۋكراينا ەكونوميكاسىن نىعايتۋ جانە ۋكراينانىڭ ۇزاق مەرزىمدى وركەندەۋى مەن قاۋىپسىزدىگىن قامتاماسىز ەتۋ ءۇشىن ۋكراينانىڭ ماڭىزدى مينەرالدىق رەسۋرستارىن يگەرۋ تۋرالى تولىق كەلىسىمدى تەزىرەك جاساسۋعا كەلىستى».

ياعني، اقش ۋكرايناعا قارۋ بەرۋدى جالعاستىرادى جانە بارلاۋ اقپاراتىن قايتا بەرەدى.

ەندى ۇرىس قيمىلدارىن 30 كۇنگە توقتاتۋعا رەسەي كەلىسە مە؟ ونى جاقىن ارالىقتا كورەمىز. اقش ارنايى ديپلوماتيالىق ارنالار ارقىلى رەسەيگە ۇسىنىستى جەتكىزەدى. ماسكەۋ كونبەسە، ۆاشينگتون قۋاتتى سانكتسيا سالۋ مۇمكىندىگىن جوققا شىعارمايتىنىن ايتۋدا.

اسحات قاسەنعالي

Abai.kz