ەلىمىزدىڭ جاستارى سوڭعى جىلدارى الەۋمەتتىك، ساياسي جانە مادەني سالالاردا ءوز بەلسەندىلىگىمەن ەرەكشەلەنۋدە. ولاردىڭ بەلسەندىلىگى قوعامنىڭ قوزعاۋشى كۇشى ەكەنى انىق. ايتالىق ەرىكتىلىك جاستار اراسىندا كەڭ تارالعان قۇبىلىسقا اينالدى. قايىرىمدىلىق، ەكولوگيالىق اكتسيالار، ءبىلىم بەرۋ جوبالارى مەن اۋىلدى جەرلەرگە كومەك كورسەتۋ سياقتى باستامالار جاستار اراسىندا تانىمال.

سونىمەن بىرگە كاسىپكەرلىك جانە يننوۆاتسيالار تۇرعىسىنان دا جاستار ءوز كۇشتەرىن قوعامدى دامىتۋعا ارناۋدا. جاستار ستارتاپتار مەن IT سالاسىندا بەلسەندىلىك تانىتۋدا. Astana Hub جانە باسقا دا يننوۆاتسيالىق پلاتفورمالار جاستاردىڭ جاڭا تەحنولوگيالىق جوبالارعا قاتىسۋىنا جول اشىپ وتىر. مەملەكەتتىك باعدارلامالار دا جاس كاسىپكەرلەرگە قولداۋ كورسەتۋدە.

ال قازاق جاستارىنىڭ مەملەكەتىمىزدىڭ مادەني جانە شىعارماشىلىق دامۋ سالالارىنا دا قوسقان ۇلەستەرى زور. ەلىمىز جاستارى ۇلتتىق مادەنيەتتى ناسيحاتتاۋعا جانە زاماناۋي ونەرگە ۇلەس قوسۋعا قۇلشىنىس تانىتۋدا. الەۋمەتتىك جەلىلەردەگى كونتەنت جاساۋشىلار، جاڭا تولقىن اقىندارى، جازۋشىلار، مۋزىكانتتار مەن كينويندۋسترياداعى جاستار قازاق مادەنيەتىن جاھاندىق دەڭگەيگە شىعارۋعا تىرىسۋدا.

عىلىم مەن بىلىمگە ۇمتىلىس تا قازىرگى جاستار ءۇشىن ماڭىزدى  قاجەتتىلىكتىڭ ءبىرى دەۋگە بولادى. مىسالى، حالىقارالىق وليمپيادالار، عىلىمي زەرتتەۋلەر، «بولاشاق» باعدارلاماسى ارقىلى شەتەلدە ءبىلىم الۋ – قازاقستاندىق جاستاردىڭ بىلىمگە دەگەن قىزىعۋشىلىعىنىڭ كورسەتكىشى. كوپتەگەن جاس عالىمدار جاڭا زەرتتەۋلەر جۇرگىزىپ، حالىقارالىق كونفەرەنتسيالارعا قاتىسۋدا.

جاستار ەكولوگيالىق ماسەلەلەرگە ەرەكشە كوڭىل اۋدارىپ، جاڭا تەحنولوگيالار مەن ەكولوگيالىق تازا ونىمدەر ءوندىرۋ بويىنشا زەرتتەۋلەر جۇرگىزۋگە قۇلىقتى. ەلىمىزدە كليماتتىڭ وزگەرۋى مەن سۋ رەسۋرستارىنىڭ تاپشىلىعىنا قاتىستى جوبالارعا قىزىعۋشىلىق جىل سايىن ارتىپ كەلەدى.

قازاق جاستارىنىڭ عىلىم سالاسىنداعى بەلسەندىلىگى دە جىلدان-جىلعا ەسەلەپ ارتىپ  كەلەدى. مەملەكەتتىك قولداۋ، حالىقارالىق سەرىكتەستىكتەر جانە جاستاردىڭ ءوز ءبىلىمىن جەتىلدىرۋگە دەگەن ۇمتىلىسى ەلىمىز عىلىمىنىڭ بولاشاعىنا وڭ اسەرىن تيگىزۋدە.

كەشەگى ماعجان سەنگەن جاستاردىڭ عىلىمعا بەتبۇرۋىنا ىقپال ەتەتىن ماڭىزدى فاكتور – اكادەميالىق مۇمكىندىكتەر ەكەنى داۋسىز. قازىر ۋنيۆەرسيتەتتەر جاس عالىمدارعا كوڭىل ءبولىپ، ولاردىڭ PhD باعدارلامالارىنا تۇسۋىنە، زەرتتەۋ جۇرگىزۋىنە جاعداي جاساۋدا.

وسى باعىتتا قاراعاندى وبلىسىندا اتقارىلىپ جاتقان شۋارالار جونىندە ساراپشى اباي جاناتايۇلىنىڭ پىكىرىن بىلدىك. 

سۋرەت: اۆتوردىڭ جەكە البومىنان الىندى.

اباي جاناتايۇلى امانتاي: 

– قازىرگى تاڭدا كەز-كەلگەن مەملەكەتتىڭ دامۋىنىڭ اجىراماس بولىگى جاستار بەلسەندىلىگى بولىپ تابىلادى. ويتكەنى ادامي كاپيتال فاكتورىن ەسكەرەتىن بولساق، مەملەكەتتىڭ كەلەسى دامۋ قادامىنا وتۋىنە جاستاردىڭ ۇلەسى كەلەسى ونجىلدىقتاردا ءسوزسىز ەڭ ەلەۋلى ورىن الاتىن بولادى.

سول سەبەپتەن دە ەلىمىزدە سوڭعى جىلدارى مەملەكەتتىڭ ومىرىندە جاستارىڭ ۇلەسىن ارتتىرۋ پروتسەسسى ۇزدىكسىز جۇرگىزىلىپ كەلە جاتىر. مىسالعا الاتىن بولساق، سوڭعى جىلدارى جاستار ساناتىن 35 جاسقا دەيىن ۇلعايتىلعان بولاتىن. سونىمەن قاتار، وبلىسىمىزدا جاستارعا ارنالعان پاتەر الۋعا بايلانىستى باعدارلامالار ۇلعايتىلۋدا. جانە دە جاستارعا ارنالعان قالا جانە وبلىس اكىمى گرانتتارىنىڭ ارقاسىندا جىل سايىن ءوز كاسىبىن اشۋعا نەمەسە دامىتۋعا 65 كاسىپكەر شاماسىندا مۇمكىندىك الىپ كەلە جاتىر. وسىنداي جوبالار ءسوزسىز جاستار تاراپىنان قوعامدىق ءومىر سەكتورىنا بەلسەندىرەك ارالاسۋىنا ىقپالىن تيگىزەتىنى ءسوزسىز.

Abai.kz