يمامداردىڭ جالاقىسى قانشا؟

قازاقستان مۇسىلماندارى ءدىني باسقارماسى (قمدب) العاش رەت يمامدارعا جالاقى 2021 جىلى تولەنە باستاعانىن حابارلادى. ۆەدومستۆونىڭ مالىمەتىنشە، ءدىن قىزمەتكەرلەرى ەڭ تومەنگى جالاقى (85 مىڭ تەڭگە) الادى.

قمدب وكىلدەرى جالاقى اۋىلدىق جەرلەردەگى يمامدارعا، سونداي-اق مەدرەسەنىڭ ۇزدىك ستۋدەنتتەرى مەن وقىتۋشىلارىنا تولەنەتىنىن ءتۇسىندىردى.

دايەكسوز

– 2021 جىلى قازاقستان مۇسىلماندارى ءدىني باسقارماسىنىڭ (قمدب) كەڭەيتىلگەن قورىتىندى جينالىسىندا باس ءمۇفتيدىڭ باستاماسىمەن 200 يمامعا ەڭ تومەنگى جالاقى مولشەرىندە اي سايىنعى ەڭبەكاقى تاعايىندالعان ەدى.

2023 جىلى بۇل كورسەتكىش 532 ءدىن قىزمەتكەرىنە دەيىن ءوستى. ولاردىڭ قاتارىندا ءوزىن ءوزى قامتاماسىز ەتە المايتىن 200 اۋىل يمامى، مەدرەسەنىڭ 200 ۇزدىك ستۋدەنتى جانە 132 ۇستاز بار. قازىرگى ۋاقىتتا قمدب-نىڭ باستاماسىمەن شامامەن 800 ءدىن قىزمەتكەرى جالاقىمەن قامتاماسىز ەتىلىپ جاتىر، – دەلىنگەن حابارلامادا.

انىقتاما

يمام — يسلام دىنىندەگى ءدىني جەتەكشى. ول ناماز باسقارىپ، ۋاعىز ايتادى. جاماعاتقا رۋحاني باعىت-باعدار بەرەدى.

Abai.kz