ءىلىمنىڭ بار اسىلى ساقتالعان كىتاپ – ادامزات اقىل-ويىنىڭ اسىل قازىناسى، جۇرەككە جول تاباتىن تاربيە قۇرالى، ويدى ۇشتاپ، قيالعا قانا بىتىرەتىن شەكسىز الەم. حاكىم اباي اتامىزدىڭ «ارتىق ءبىلىم – كىتاپتا، ەرىنبەي وقىپ كورۋگە» - دەگەن ناقىل ءسوزىنىڭ استارىندا قانشاما تاعلىمى مول تەرەڭ وي جاتىر. 

بۇگىن 23 ءساۋىر – دۇنيەجۇزىلىك كىتاپ جانە اۆتورلىق قۇقىق كۇنى. سونداي-اق بۇگىن ەلىمىزدە العاش رەت ۇلتتىق كىتاپ كۇنى اتالىپ وتىلەدى. وسى اتاۋلى كۇندەرگە وراي سەمەي قالاسىنداعى فيزيكا-ماتەماتيكالىق باعىتىنداعى نازارباەۆ زياتكەرلىك مەكتەبىندە جەلىلىك «كىتاپ الەمدى باعىندىرادى» اكتسياسى ءوتتى. اكتسيا اياسىندا 300-دەن استام وقۋشى مەن مەكتەپ قىزمەتكەرى ءبىر-بىرىنە كىتاپ سىيلادى.

جوبا بارىسىندا ءاربىر قاتىسۋشى مەكتەپ كىتاپحاناشىسىنا عانا بەلگىلى ارنايى بەكىتىلگەن نومەرگە يە بولادى. وسى ارقىلى وقىرماندار قۇپيا تۇردە كىتاپ سىيلىعىن دايىندايدى. اكتسيانىڭ ەڭ ەرەكشە ءھام قىزىقتى تۇسى دا وسىندا. مەكتەپ الاڭىندا نومەر ارقىلى ءبىر-ءبىرىن ىزدەگەن ۇستازدار مەن زياتكەرلەر مارە-سارە بولىپ، كىتاپپەن الماسادى. كىتاپ سۇيەر قاۋىمنىڭ ايتۋىنشا، اتالمىش كۇندى ءار جىل سايىن اسىعا كۇتەدى.

مۇنىمەن قوسا، زياتكەرلىك مەكتەپتە جۇيەلى تۇردە «100 كىتاپ»، «Bookcrosing»، «NIS بىرگە وقيىق» اتتى وقىرماندى كىتاپ وقۋعا شاقىراتىن جوبالار قاتارى جەتەرلىك. اتاپ ايتقاندا، وسى وقۋ جىلىندا مەكتەپ قاۋىمداستىعى «Bookcrossing» جوباسى اياسىندا 540 كىتاپ جيناپ، اباي وبلىسى ءبىلىم باسقارماسىنىڭ بەسقاراعاي اۋدانى ءبىلىم ءبولىمىنىڭ «قايرات رىسقۇلبەكوۆ اتىنداعى ورتا مەكتەبىنە» تابىستاعان بولاتىن.  ال NIS بىرگە وقيىق» جوباسى بويىنشا اي سايىن وتباسىلىق وقىرماندار كلۋبىنىڭ وتىرىسى ءتۇرلى فورماتتا ۇيىمداستىرىلادى.

باستى ماقسات – بارشا مەكتەپ قاۋىمداستىعىن كىتاپ وقۋعا ىنتالاندىرىپ، وقىرمان مادەنيەتىن قالىپتاسىرۋ. وقۋعا دەگەن ماحاببات بالا كەزدەن باستالۋى ءتيىس. ال مەكتەپ – سول ماحابباتتى وياتاتىن ەڭ العاشقى وردا. كىتاپ ارقىلى الەمدى باعىندىرۋ – ءار وقىرماننىڭ قولىندا!

Abai.kz