قىرعىزدىڭ اقپارات قۇرالدارى: «قىرعىزستاندا قىرعىز ازاماتتارىن جالدامالى جەندەت بولىپ، ۋكرايناعا قارسى سوعىسۋعا ۇگىتتەگەن 4 ادام تۇتقىندالدى»، - دەپ حابار تاراتتى. بۇل تۋرالى Mezgil.kz اقپاراتتىق پورتالى جازدى. 

بىشكەكتىڭ ءبىرىنشى ماي اۋداندىق سوتى تۇتقىندالعانداردىڭ اتى-جوندەرىن جاريالادى. ال قىلمىستىق ءىستى قىرعىزستان ۇلتتىق قاۋىپسىزدىك كوميتەتى قوزعاعان.

رەسەيشىلدەر قىرعىزداردى سوعىسقا شاقىرۋدا...

كەيىن انىقتالعانداي، تۇتقىندالعانداردىڭ ءبىرى وش قالاسىنداعى رەسەيلىك «روسسوترۋدنيچەستۆوعا» قارايتىن «ورىس ءۇيىنىڭ» قىزمەتكەرى بولىپ شىققان. اتى-ءجونى – ناتاليا سەكەرينا.

ونىڭ ۇستىنەن قر قىلمىستىق كودەكسىنىڭ 1 بابى، 416 تارماعى بويىنشا ايىپ تاعىلعان. ول دەگەنىڭىز – «باسقا مەملەكەتتەردىڭ قارۋلى قاقتىعىستارىنا ارالاسۋعا ۇگىتتەۋ، جالدامالى قىزمەتكەرلەردى جالداۋ، قارجىلاندىرۋ، ماتەريالدىق قامتاماسىز ەتۋ، وقىتۋ» دەگەن ايىپ.

قىرعىز اقپاراتىنىڭ دەرەگىنشە: تۇتقىندالعانداردىڭ تاعى ءبىرى – وش اكىمدىگىنىڭ ءباسپاسوز قىزمەتىنىڭ وكىلى سەرگەي لاپۋشكين دەگەن ادام.

ونىڭ ۇستىنەن قر قىلمىستىق كودەكسىنىڭ 1 بابى، 416 تارماعى جانە 3 باپتىڭ 43 تارماعى بويىنشا ايىپتار تاعىلعان.

416 تارماقتى جوعارىدا ايتتىق. ال 3 باپتىڭ 43 تارماعى – «باسقا مەملەكەتتەردىڭ قارۋلى قاقتىعىستارىندا پايدالانۋ ماقساتىندا جالدامالىلاردى تارتۋدى، قارجىلاندىرۋدى، ماتەريالدىق قامتاماسىز ەتۋدى، وقىتۋدى ۇيىمداستىرۋ» دەگەن ايىپ.

سەكەرينانىڭ «Facebook» پاراقشاسىندا لاپۋشكين قاتىسقان وشتاعى «ورىس ءۇيى» ءىس-شارالارىنىڭ ماتەريالدارى مەن ۆيدەولارى بار.

بۇل ءىس بويىنشا سەكەرينا مەن لاپۋشكيننەن بولەك تاعى ەكى ادام ۇستالعان. ولاردىڭ كىم ەكەنى ءالى بەلگىسىز. تورتەۋى دە ءبىرىنشى ماي اۋداندىق سوتىنىڭ شەشىمىمەن 17 ماۋسىمعا دەيىن قاماۋعا الىندى.

رەسەي پاسپورتى ءۇشىن ەلىن ساتقان قىرعىز ەكىنشى رەت سوعىسقا اتتانعان

قىرعىزستاندا وسىعان دەيىن بىرنەشە ازامات رەسەيدىڭ ۋكرايناعا قارسى سوعىسىنا قاتىسقانى ءۇشىن سوتتالعان. سولاردىڭ ءبىر مىسالى:

2023 جىلدىڭ قاڭتار ايىنىڭ ورتاسىندا اسقار كۋبانىچبەكۇلى دەيتىن ادام ۇستالىپ، سول جىلدىڭ مامىر ايىندا ول 10 جىلعا باس بوستاندىعىنان ايىرىلدى. ۇكىم جاريالانعاننان كەيىن ول رەسەي بيلىگىنەن ازاماتتىق سۇراعان، سودان كەيىن بىرقاتار رەسەيلىك شەنەۋنىك ونى بوساتۋدى تالاپ ەتىپ، رەسەي تولقۇجاتىن بەرۋگە ۋادە ەتكەن.

2024 جىلدىڭ قاڭتارىندا بىشكەك سوتى ونىڭ ءىسىن قايتا قاراپ، جەتى جىلعا باس بوستاندىعىنان ايىرۋ جازاسىنا كەسىپ، ءۇش جىلعا شارتتى تۇردە باس بوستاندىعىنان ايىردى جانە بوستاندىققا شىعاردى. ءساۋىر ايىنىڭ سوڭىندا اسقار كۋبانىچبەكۇلىنىڭ رەسەيگە قاشىپ كەتكەنى بەلگىلى بولدى. رەسەي فەدەراتسياسىنىڭ ادام قۇقىقتارى جونىندەگى كەڭەسىنىڭ مۇشەسى كيريلل كابانوۆ الگى نەمەنىڭ سوعىسقا ەكىنشى رەت بارعانىن ايتتى. بىراق ونىڭ رەسەي ازاماتتىعىن العان-الماعانى بەلگىسىز.

«ورىس ۇيلەرى» – رەسەيدىڭ جۇمساق كۇشى!

«ورىس ۇيلەرى» الەمنىڭ كوپتەگەن ەلدەرىندە، سونىڭ ىشىندە ەۋروپانىڭ كوپ بولىگىندە بار. بۇل ۇيىمدار «روسسوترۋدنيچەستۆو» مۇددەسىن قورعايدى جانە رەسمي مالىمەتتەر بويىنشا، «شەتەلدە تۇراتىن رەسەيلىكتەرگە ءارتۇرلى ءىس-شارالار مەن قىزمەتتەر ۇسىنۋمەن اينالىسادى، سونداي-اق رەسەي مادەنيەتىن، عىلىمىن جانە ءبىلىمىن ناسيحاتتاۋعا جاۋاپتى».

باكۋ مەن كيشينەۆ «ورىس ۇيلەرىن» جاپتى

رەسەيدىڭ شەتەلدەردەگى «جۇمساق كۇشىنىڭ» ىقپالىن ارتتىرۋ ماقساتىندا جۇمىس جاسايتىن «روسسوترۋدنيچەستۆو» جاڭا سىناقتارعا تاپ بولۋدا.

بيىل اقپاننىڭ باسىندا ازەربايجان بيلىگى باكۋدەگى «ورىس ءۇيىن» جاپتى. ماسكەۋگە رەسەيدىڭ «روسسوترۋدنيچەستۆو» اگەنتتىگى قىزمەتىن ەل اۋماعىندا توقتاتاتىنى جايلى رەسمي نوتا جىبەردى. ازەربايجان ءسىم-ءى: «باكۋدەگى «ورىس ءۇيى» زاڭدى تۇلعا رەتىندە تىركەلمەگەن»، - دەدى.

وسىدان كوپ وتپەستەن، 13 اقپاندا مولدوۆا بيلىگى رەسەيدىڭ عىلىم جانە مادەنيەت ورتالىعىن (ورىس ءۇيى) جابۋ تۋرالى شەشىم قابىلداعانىن جاريالادى. كيشينەۆتەگى سىرتقى ىستەر مينيسترلىگى 1998 جىلى جاسالعان مولدوۆا-رەسەي اراسىنداعى مادەني ورتالىقتار قۇرۋ جانە جۇمىس ىستەۋ تۋرالى ۇكىمەتارالىق كەلىسىمدى بىرجاقتى بۇزۋ تۋرالى مالىمدەدى.

جارناماسى جەر جارعان «ورىس ۇيلەرى» قازاقستاندا دا بەلسەندى جۇمىس جاسايدى. استانامەن الماتىدا ورتالىقتارى بار. قازاقستان ازىرگە «ورىس ۇيلەرىنە» شۇيلىگىپ جاتقان جوق... دەسە دە، ولاردىڭ قىزمەتىن قاتال تەكسەرۋ ءھام نازاردا ۇستاۋ ماڭىزدى! ورىس يدەولوگياسىن اشىق ناسيحاتتاپ، ازاماتتاردى سوعىسقا ۇگىتتەيتىن مۇنداي بۇلىكشى ۇيىمعا قازاقستان دا ەسىگىن تارس جاباتىن ۋاقىت جەتتى!

Abai.kz