2022 جىلى 24 اقپاندا پۋتين ۋكرايناعا سوعىس اشقاننان كەيىن ەۋروپا باستاعان الەم ەلدەرىنىڭ قاتاڭ قارسىلىعىنا ۇشىراپ، سانكتسيا استىندا قالىپ، حالىقارالىق قاۋىمداستىقتاردان شىعارىلىپ، مۇلدە وقشاۋلانىپ قالعانى بەلگىلى.

بيىل قاڭتاردىڭ 20-سى كۇنى ترامپ اق ۇيگە قايتا ورالعاننان كەيىن، ەۋروپالىق ارىپتەستەرىنەن باسقاشا جول ۇستانىپ، كرەملمەن قاتىناسىن قايتا قالپىنا كەلتىرۋگە جول اشتى. سول دەم بەرگەندەي قازىر كرەمل ستراتەگتەرى جەڭىستىڭ 80 جىلدىعىن ساياسي قۇرالعا اينالدىرىپ، الەم باسشىلارىن ماسكەۋگە جيناپ، ءۇش جىلدان بەرگى جوعالتقان ابىرويلارىن ورنىنا كەلتىرىپ، ۇپاي جيناۋعا تىرىسىپ جاتىر.

قازىرگى كۇنگە دەيىن قىزىل الاڭدا وتەتىن اسكەري پارادقا ورتا ازيا باسشىلارىنان بولەك، قىتاي باسشىسى ءسيدىڭ قاتىساتىنى انىق بولدى. ول 7 مامىر مەن 10 مامىردا رەسەيدە رەسمي ساپارمەن بولاتىنى ناقتىلاندى.

ورىس ءتىلدى قازاق اقىنى ولجاس سۇلەيمەنوۆتىڭ ەكىنشى دۇنيەجۇزىلىك سوعىستى –«ەۋروپالىقتاردىڭ سوعىسى» دەپ باعالاعانى بەلگىلى.

كرەملدىڭ «جەڭىس كۇنىن» جەكەشەلەندىرىپ العانى سونشا، دۇنيەجۇزىلىك سوعىستىڭ 80 جىلدىعىن وزگە ەلدەردىڭ دە اتاپ وتۋىنە ءبىر جولاتا تىيىم سالعىسى كەلىپ، ەكىلەنىپ وتىر. ماۋكەۋ دۇنيەنىڭ ورتالىعىنداي، سوعىسقا وزگە ەلدەر ۇلەس قوسپاعانداي كەيىپتە وتىر.

گەرمانيا فەدەرالدى پارلامەنتى مامىردىڭ 8-ءى كۇنى دۇنيەجۇزىلىك سوعىستىڭ 80 جىلدىعىن اتاپ وتۋگە، ەلىندە ورنالاسقان ۋكراينا باستاعان شەتەل ديپلوماتتارىن شاقىرعان. رەسەي مەن بەلارۋس ەلشىلەرىن عانا شاقىرۋسىز قالدىرعان. سوعان كرەمل تارابى بۇلقان-تالقان بولىپ جاتىر.

مەدۆەدەۆ ونى «وتپەن ويناۋ» دەپ باعالاپ، «كەزىندە ناتسيستىك گەرمانيانىڭ وداقتاسى بولعانداردى شاقىرىپ، فاشيزمدى جەڭگەن ءبىزدى شاقىرماعانى نەسى؟» دەپ جىندانارداي بولىپ ءجۇر.

بيىل 80 جىلدىققا وراي بەرليندە 8 مامىر دەمالىس كۇنى بولىپ جاريالاندى.

ءبىزدىڭ ەلىمىزدە دە 1992 جىلى 7 مامىردا ەكس-پرەزيدەنت نۇرسۇلتان نازارباەۆتىڭ جارلىعىمەن قر قارۋلى كۇشتەرى  قۇرىلدى. 7 مامىر – وتان قورعاۋشىلار كۇنى بولىپ بەكىتىلىپ، مەملەكەتتىك دەمالىس كۇنى بولىپ اتالىپ كەلەدى.

بيىل 80 جىلدىعى اتالىپ وتىلەتىن «جەڭىس كۇنىنىڭ» جاقىنداۋىنا 1 ميلليون 200 مىڭ ادامى قاتىسقان، قويناۋى قازىناعا تولى قازاقستاننىڭ دا ۇلەسى زور ەكەنى ايتپاسا دا تۇسىنىكتى.

جەڭىستى ەۋروپالىقتاردان قىزعانىپ وتىرعان كرەمل بۇگىنگى بەيبىت ءومىر ءۇشىن جانىن پيدا ەتكەن اتالارىمىزدىڭ ەرلىگىن ءادىل باعالادى دەپ ايتا المايمىز. «قازاقستاندا اسكەري پاراد نە ءۇشىن 9 مامىردا، ەمەس، 7 مامىردا وتەدى؟» دەپ اقپاراتتىق قىسىم جاساعىسى كەلەدى.

قالاي دەسەك تە، ەۋروپا مەن اقش-تان ءبىر كۇن بۇرىن، كرەملدەن ەكى كۇن بۇرىن بابالار ەرلىگىن ۇلىقتاعانىمىز قاي جاعىنان بولسا دا وڭ شەشىم ەكەنى انىق.

Abai.kz