قازاقستان بىرەگەي تابيعي مۇرا جانە بيوارتۇرلىلىككە باي ەلدەردىڭ ءبىرى بولىپ سانالادى.

ەرەكشە قورعالاتىن تابيعي اۋماقتار ەلىمىزدىڭ 10% - دان استامىن الىپ جاتىر. ولاردىڭ جالپى اۋدانى - 29,3 ملن گا.

رەسپۋبليكادا ومىرتقالى جانۋارلاردىڭ 835 ءتۇرى، ونىڭ ىشىندە سۇتقورەكتىلەردىڭ-178 ءتۇرى، قۇستاردىڭ - 489, باۋىرىمەن جورعالاۋشىلاردىڭ - 49, قوسمەكەندىلەردىڭ – 12 ءتۇرى كەزدەسەدى.

ايتا كەتۋ كەرەك، ومىرتقالى جانۋارلاردىڭ 132 ءتۇرى مەن كىشى تۇرلەرى سيرەك جانە جويىلىپ كەتۋ قاۋپى بار.

قازىرگى تاڭدا سيرەك كەزدەسەتىن تۇياقتى جانۋارلار - توعاي بۇعىسى، قۇلان، ارقار جانە قاراقۇيرىق سانىنىڭ جىل سايىن ارتۋى بايقالادى.

سونداي-اق، كيىكتەردى قورعاۋ جونىندەگى جۇيەلى شارالاردىڭ ارقاسىندا، ولاردىڭ سانىن 2003 جىلى 21 مىڭنان 2024 جىلى 2 ملن.800 مىڭعا دەيىن كوبەيدى. بۇل جانۋاردىڭ الەمدىك پوپۋلياتسياسىنىڭ 98% - ى ءبىزدىڭ ەلىمىزدە شوعىرلانعان.

جابايى جانۋارلاردى رەينترودۋكتسيالاۋ جۇمىستارى بەلسەندى جۇرگىزىلۋدە. وسىلايشا، نيدەرلاندىدان ىلە-بالقاش رەزەۆاراتىنىڭ اۋماعىنا 2 امۋر جولبارىسى اكەلىندى،  مۇندا تۇياقتىلاردىڭ سانىن كوبەيتۋ جۇمىستارى دا جۇرگىزىلگەن.

سونداي – اق، وتكەن جىلدىڭ ماۋسىم ايىندا چەحيا مەن گەرمانيادان 7 باس پرجەۆالسكي-كەرقۇلان، كەرتاعى جىلقىسى جەرسىندىرىلدى، ولار بەيىمدەلۋ كەزەڭىندە "التىن دالا" رەزەرۆاتىنىڭ اۋماعىنداعى ارنايى ۆولەرگە ورنالاستىرىلدى. اعىمداعى جىلى ولاردى تابيعي مەكەندەۋ ورتاسىنا شىعارۋ جانە جاڭا پارتيانى قايتا جەرسىندىرۋ جوسپارلانۋدا.

سونىمەن قاتار، قازاقستاندا 6000-نان استام وسىمدىك ءتۇرى كەزدەسەدى،  ونىڭ 387-ءسى قىزىل كىتاپقا ەنگىزىلگەن.

بيوارتۇرلىلىكتى ساقتاۋ - بۇل ورتاق جاۋاپكەرشىلىك جانە تۇراقتى بولاشاققا قادام. وعان تابيعاتتى قورعاۋ، رەسۋرستاردى ۇتىمدى پايدالانۋ جانە ەكولوگيالىق باستامالاردى قولداۋ ارقىلى اركىم ءوز ۇلەسىن قوسا الادى.

Abai.kz