قازاق ءۇشىن گەوگرافيا بۇل – تاعدىر. قازاقستان تاريحتا ءوزىنىڭ ورنالاسقان گەوگرافيالىق ورنىنىڭ ەرەكشەلىگىمەن ماڭىزدى بولسا، تاۋەلسىزدىكتەن كەيىن ايماقتاعى ءىرى مەملەكەت رەتىندە حالىقارالىق قاتىناستار جۇيەسىنەن ويىپ العان ورنىمەن تانىمال مەملەكەتكە اينالدى.

قازاقستان رەسپۋبليكاسىنىڭ كەڭ بايتاق اۋماعىنىڭ ازيا مەن ەۋروپانى تۇتاستاندىرىپ جاتۋى، ونداعى جەر استى جانە جەر ۇستىندەگى رەسۋرستاردىڭ مولدىعى دامىعان مەملەكەتتەردى قاتتى قىزىقتىراتىنى ءسوزسىز. ويتكەنى دامىعان مەملەكەتتەر تۇراقتى تۇردە دامي ءتۇسۋ ءۇشىن مول ەنەرگەتيكالىق رەسۋرستاردى قاجەت ەتەدى.

ال قازاقستان سياقتى دامۋشى ەلدەرگە ەڭ قاجەتتى نارسە، ول – ينۆەستيتسيا مەن جاڭا تەحنولوگيا. مىنە وسىنداي ءوزارا مۇقتاجدىق قازاقستان مەن الىس-جاقىن دامىعان ەلدەر اراسىن تەز جاقىنداستىردى.

بۇگىن قازاقستانعا مەملەكەت باسشىسى قاسىم-جومارت توقاەۆتىڭ شاقىرۋىمەن قىتاي توراعاسى سي تسزينپين كەلدى.

ساپار بارىسىندا جوعارى دەڭگەيدەگى ەكىجاقتى كەزدەسۋلەر وتكىزۋ جوسپارلانىپ وتىر. سونداي-اق ەكى ەل اراسىنداعى جان-جاقتى ستراتەگيالىق سەرىكتەستىكتى ودان ءارى نىعايتۋ ماسەلەلەرى تالقىلانادى.

17 ماۋسىمدا استانادا ايماقتاعى مەملەكەتتەر باسشىلارىنىڭ قاتىسۋىمەن ەكىنشى «ورتالىق ازيا – قىتاي» ءسامميتى وتەدى.

وسى رەتتە ءبىز بىرقاتار ساندەرەكتەردى نازارلارىڭىزعا ۇسىنعاندى ءجون كوردىك:

* 2024 جىلى ەكىجاقتى ساۋدا كولەمى 30 ملرد دوللارعا جەتكەن;

* قازاقستاننىڭ قحر-عا ەكسپورتى 15,8 ملرد دوللاردى قۇراعان. بۇل قازاقستاندىق تاۋارلارعا دەگەن جوعارى سۇرانىستى جانە ەلدىڭ ازيا باعىتىنداعى پوزيتسياسىن نىعايتۋدى كورسەتەدى.

* 2024 جىلدىڭ قورىتىندىسى بويىنشا ەكى ەل اراسىنداعى اۋىل شارۋاشىلىعى ونىمدەرىنىڭ ساۋدا كولەمى1,4 ملرد دوللارعا جەتىپ، 10,5%-عا ۇلعايعان. ونىڭ 1,1 ملرد دوللارى قازاقستاندىق ەكسپورتقا تيەسىلى.

* قازاقستان جىل سايىن 15-20 ملن توننا استىق وندىرەدى، ال قىتايلىق كومپانيالار قوسىلعان قۇنى جوعارى ءونىم جاساۋ ءۇشىن ونى قايتا وڭدەۋگە بەلسەندى ينۆەستيتسيا سالادى.

* قىتاي قازاقستان ەكونوميكاسىنداعى ەڭ ءىرى ينۆەستورلاردىڭ بەستىگىنە كىرەدى، جيناقتالعان كاپيتال سالىمدارىنىڭ كولەمى 26 ملرد دوللاردى قۇرايدى.

* بۇگىنگى كۇنى 9,6 ملرد دوللار سوماسىنا 12,8 مىڭعا جۋىق جۇمىس ورنىن قۇرۋمەن 63 بىرلەسكەن جوبا ىسكە اسىرىلعان. 14,6 ملرد-قا تاعى 59 جوبا ىسكە اسىرىلۋ ساتىسىندا جانە 14,7 مىڭنان استام جۇمىس ورنىن قامتاماسىز ەتەدى.

تاقىرىپقا تۇزدىق: «قىتايدان ەۋروپاعا قۇرلىق تاسىمالىنىڭ 80 پايىزدان استامى قازاقستان ارقىلى وتەدى»، - دەيدى قر پرەمەر-ءمينيسترىنىڭ ءبىرىنشى ورىنباسارى رومان سكليار.

ال «Bloomberg» باسىلىمى: «سي ەكى جىل بۇرىن قىتايدىڭ سيان قالاسىندا ءبىرىنشى «قىتاي-ورتالىق ازيا» ءسامميتىن وتكىزدى. سي ءتسزينپيننىڭ ون جىلدان استام ۋاقىت بۇرىن كەڭ اۋقىمدى ينفراقۇرىلىمدىق باستاماسىن كوتەرگەن قازاقستانداعى باستى ماقساتى - قىتاي ەكونوميكاسىن اقش-پەن ىقتيمال ۇزىلىسكە دايىنداۋ»، - دەپ جازادى.

Abai.kz