زاڭ جانە ءتارتىپ – قاۋىپسىز قوعامنىڭ قالقانى. قۇقىقبۇزۋشىلىقتىڭ كەز كەلگەن تۇرىنە توزۋگە بولمايدى.

پرەزيدەنت ناقتى بىرقاتار تاپسىرما جۇكتەدى. وعان كىمدەر جاۋاپتى، قالاي جۇزەگە اسادى؟ قوعامدىق ءتارتىپتى قايتسەك جاقسارتامىز؟ بۇل سۇراقتارعا «ءتۇيىن» اقپاراتتىق-ساراپتامالىق باعدارلاماسىندا ىشكى ىستەر مينيسترلىگىنىڭ اكىمشىلىك پوليتسيا كوميتەتىنىڭ توراعاسى قايسار سۇلتانباەۆ جاۋاپ بەردى.

گەنەرال-مايوردىڭ ايتۋىنشا، قازىر «زاڭ مەن ءتارتىپ» قاعيداسى اياسىندا مەملەكەتتىك اپپارات پەن قوعام ءوزارا بىرلەسىپ، ناتيجەلى باستامالار قولعا الىنىپ جاتىر.

- سوڭعى كەزدە رەسپۋبليكا كولەمىندە «اراقسىز اۋىل» دەگەن 370 استام ەلدىمەكەن پايدا بولدى. بۇل پوليتسيانىڭ، اكىمشىلىكتىڭ، ءدىني قىزمەتكەرلەردىڭ جانە قوعام مۇشەلەرىنىڭ بىرلەسكەن باستاماسىنىڭ ارقاسىندا وسىنداي جۇمىستار جۇرگىزىلدى. ناتيجەسىندە ءبىر جىلدىڭ ىشىندە ول اۋىلداردا بىردە-ءبىر قىلمىس جاسالماعان.

قايسار سۇلتانباەۆ قازاقستاندىقتاردىڭ قۇقىقتىق دەڭگەيى تۋرالى دا ايتتى.

- ازاماتتاردىڭ قۇقىقتىق دەڭگەيى كوتەرىلگەن. كوپتەگەن كىسىلەر قوعامداعى كەز كەلگەن قۇقىق بۇزۋشىلىقتى وزدەرىنىڭ بەينە تىركەگىشتەرىنە ءتۇسىرىپ الىپ، وپەراتيۆتىك باسقارۋ ورتالىعىنا جىبەرىپ وتىرادى. ءبىز ولاردىڭ ءبارىن قاراستىرىپ، زاڭ بۇزعان كىسىلەردى جاۋاپقا تارتامىز. ونداي فاكتىلەر كۇننەن كۇنگە كوبەيىپ جاتىر.

سۇحبات بارىسىندا بەلگىلى بولعانداي، ەلىمىزدە تۇرمىستىق زورلىق-زومبىلىق بويىنشا اسا اۋىر قىلمىستار، اۋىر قىلمىستار، كىسى ءولتىرۋ 15%-دان 30%-عا دەيىن تومەندەگەن.

سۇحباتقا سىلتەمە:

دەرەككوزى: 24.kz

Abai.kz