اۋىل شارۋاشىلىعى ءمينيسترى ايداربەك ساپاروۆتىڭ ايتۋىنشا، مال ونىمدەرىنىڭ قاۋىپسىز قوزعالىسىن قامتاماسىز ەتۋ ءۇشىن جاۋاپكەرشىلىكتى كۇشەيتۋ قاجەت.

"جەتكىزۋشىلەر مەن ۆەتەريناريالىق قۇجاتسىز ءونىم ساتىپ الۋشىلارعا قاتىستى جاۋاپكەرشىلىكتى قىلمىستىق جاۋاپكەرشىلىككە دەيىن قاتاڭداتۋ قاجەت. بۇل شارالار مال ونىمدەرىنىڭ قاۋىپسىزدىگىن ارتتىرىپ، زاڭسىز ساۋدانىڭ الدىن الۋعا باعىتتالعان،" – دەيدى مينيستر ۇكىمەت وتىرىسىندا.

ونىڭ ايتۋىنشا، ۆەتەريناريا سالاسىن ترانسفورماتسيالاۋ اياسىندا بىرقاتار ناقتى قادام قاراستىرىلعان. اتاپ ايتقاندا، تسيفرلاندىرۋدى جەتىلدىرۋ، تاۋارلار قوزعالىسىن باقىلاۋ جانە زاڭنامانى كۇشەيتۋ، ۆەتەريناريالىق-سانيتاريالىق جۇك باقىلاۋىن ارتتىرۋ كوزدەلىپ وتىر.

سونداي-اق، مال سىرعالارىن ۇيىمداسقان شارۋاشىلىقتار وزدەرى ساتىپ الاتىن جۇيە ەنگىزىلىپ، بيۋدجەت شىعىنى قىسقارماق.

مينيسترلىك مالىمەتىنشە، قازىرگى تاڭدا ەلدەگى مالدىڭ قوزعالىسى مەن ۆەتەريناريالىق راسىمدەر ارنايى ەلەكتروندىق سەرۆيستەر ارقىلى باقىلانادى.

ء"ار جانۋارعا جەكە ءنومىر بەرىلەدى. بارلىق دەرەك پەن ۆەتەريناريالىق شارالار جۇيەگە تىركەلەدى. فەرمەرلەر مەن ۆەتەرينارلار وسى ەلەكتروندىق جۇيە ارقىلى ۋاقىت ۇنەمدەپ، ادامي فاكتوردان بولاتىن قاتەلىكتەردى ازايتادى،" – دەدى ساپاروۆ.

بۇعان دەيىن مينيستر اسىل تۇقىمدى سيىر مەن قوي ساتىپ الۋعا جەڭىل نەسيە بەرىلەتىنىن ايتتى.