المالى اۋداندىق سوتى ەكى ادامنىڭ - م. جانە پ.-نىڭ ءىسىن قارادى. ولار ءورت قاۋىپسىزدىگىن ورەسكەل بۇزىپ، سونىڭ سالدارىنان بىرنەشە ادامنىڭ ءومىرىن قيۋعا اكەپ سوقتىردى دەپ ايىپتالدى.

پ. - فورمالدى كەلىسىم، جاۋاپسىزدىق:

ءورت دابىلىن ورناتۋ ءۇشىن جشس-پەن كەلىسىمشارت جاساسقان. الايدا ءوزى نىسانعا بارماعان، جۇمىستى تانىسىنا تاپسىرعان. ورناتۋ ەرەجەگە ساي بولماعان، دىبىس دەڭگەيى تىم تومەن بولعان (75 دب ورنىنا 28,8–58 دب).

م. - ءورت قاۋپىن ەسكەرمەگەن:

جەرتولەدە 6 بولمەلى، 48 ادامعا ارنالعان جاتىن ورىن ۇيىمداستىرعان. ەۆاكۋاتسيا ەسىگىن قۇلىپتاپ قويعان. دالىزگە ماتراستار توسەپ، شىعاتىن جولدى تارىلتقان.

پروكۋرور 4–5 جىل باس بوستاندىعىنان ايىرۋ جازاسىن سۇرادى. جابىرلەنۋشىلەر زاڭعا ساي جازا مەن مورالدىق جانە ماتەريالدىق وتەماقى تالاپ ەتتى. سوتتالۋشىلار كىناسىن مويىندامادى.

سوت ۇكىمى

م. - 5 جىلعا باس بوستاندىعىنان ايىرىلدى (قر قك 292-باپ 3-بولىك).

پ. - 4 جىلعا باس بوستاندىعىنان ايىرىلدى (قر قك 306-باپ 3-بولىك).

ەكەۋىنەن جابىرلەنۋشىلەرگە 7 ملن تەڭگە مورالدىق زيان جانە ماتەريالدىق شىعىن ءوندىرىپ الىنادى.

جەڭىلدەتەتىن جاعدايلار رەتىندە:

م.-نىڭ 6 جابىرلەنۋشىگە ءوز ەركىمەن وتەماقى تولەگەنى جانە 5 بالاسى بار ەكەنى، پ.-نىڭ كامەلەتكە تولماعان بالاسى بارى ەسكەرىلدى.

ۇكىم ءالى زاڭدى كۇشىنە ەنگەن جوق.

2023 جىلى 30 قاراشا كۇنى تاڭعى ساعات 5:33 شاماسىندا ءادي ءشارىپوۆ كوشەسى، 86 مەكەنجايىنداعى Almaty Hostel جەرتولە ءۇي-جايى ورتكە ورانعان. جانۋ الاڭى – 30 ش.م. سالدارىنان 13 ادام قازا تاپتى. ءورت ورنىنان 59 ادام ەۆاكۋاتسيالاندى، ونىڭ ۇشەۋى جەدەل-جاردەممەن اۋرۋحاناعا جەتكىزىلدى.

ءورت فاكتىسى بويىنشا قىلمىستىق ءىس قوزعالدى.

Abai.kz